Европа иттифоқининг аксар давлатлари очиқ эълон қилмасдан Россия ичкарисига узоқ масофали қуроллар ёрдамида зарба йўллаш учун Украинага рухсат берди. Бу ҳақда ЕИ дипломатияси раҳбари Жосеп Боррель маълум қилди.
Боррель АҚШнинг Украинага Россия ҳудудидаги 300 км ичкарида жойлашган нишонларга зарбалар беришга рухсат этган қарорини муҳим деб атаган.
“Бу украиналиклар учун жуда яхши янгилик”, деди у.
Боррелнинг сўзларига кўра, ЕИга аъзо баъзи давлатлар Киевга худди шундай рухсатни очиқ, бошқалари яширин тарзда берган.
Боррель шу пайтгача бу масалада қарор қабул қилишдан ўзини тийган Евроиттифоқ давлатлари охир-оқибат АҚШдан ўрнак олишига ва Украинага Россия ҳудудида ўз қуроллари билан зарба йўллашига имкон беришига ишонч билдирган. Шунингдек, у бу таклиф халқаро ҳуқуққа тўлиқ мос келишини қўшимча қилган.
Франция президенти Эммануэль Макрон Рио де Жанейрода бўлиб ўтаётган G20 саммити арафасида АҚШ президенти Жо Байден Россия ҳудудига узоқ масофали зарбаларга рухсат бериш ҳақидаги фикрни изоҳлар экан, “яхши қарор” қабул қилинганини айтган. Макроннинг сўзларига кўра, можарони кучайтириш тўғрисидаги қарор Россия томонидан Шимолий Корея аскарларини ўз қуролли кучларига жалб қилиш орқали қабул қилинган.
“Россия эскалация қилишга қарор қилган ягона давлатдир”, деди Франция президенти.
19 ноябрь куни Владимир Путин Россиянинг ядровий тўхтатиб туриш сиёсатининг янги асосини тасдиқлади. Ҳужжатда, хусусан, ядро давлати кўмагида ядро қуролига эга бўлмаган давлат томонидан мамлакат ва унинг иттифоқчиларига қарши тажовуз қилиш уларнинг биргаликдаги ҳужуми сифатида баҳоланиши таъкидланган. Россия президенти матбуот котиби Дмитрий Песков янги доктринага кўра, Украинанинг Россияга қарши Ғарбнинг ядровий бўлмаган ракеталарини қўллаши ҳам ядровий жавобга олиб келиши мумкинлигини эътироф этган.
Украина АҚШ қуроллари билан Россияга зарба бера олади
17 ноябрь куни The New York Times газетаси ва Reuters агентлиги манбаларга таяниб, АҚШ президенти Жо Байден Украинага АҚШ томонидан етказиб берилган узоқ масофали ATACMS ракеталаридан Россия ҳудудига зарба бериш учун фойдаланишга рухсат этгани ҳақида хабар берди. Давлат департаменти 18 ноябрь куни кечқурун бу маълумотни “ҳозирча тасдиқлай олмасликларини” маълум қилди.
Байден маслаҳатчиларининг Россияга зарба беришда ATACMS’дан фойдаланиш бўйича фикрлари турлича. Улар ҳозирча гап фақат Курск вилоятидаги нишонларга зарба бериш ҳақида кетаётганини айтган. Кейинчалик Байден бу қуролни бошқа жойларда ҳам ишлатишга рухсат бериши мумкин. Дональд Трамп президентлик лавозимини эгаллаганидан кейин Байденнинг бу қарорини бекор қиладими ёки йўқ, ҳозирча номаълум.
Изоҳ (0)