Буюк Британия бош вазири Кир Стармер Россия президенти Владимир Путин “тинчликдан қочаётгани учун товон тўлаши кераклигини” таъкидлади. Бу ҳақда Arab News хабар берди.
“Украина бўйлаб ўлим ва қон тўкилиши давом этаётган бир пайтда, Путиннинг саросимага тушиши ва кечиктириш тактикасига чидаб бўлмайди. Тўлиқ ва сўзсиз ўт очишни тўхтатишга келишиш лозим. Агар Россия музокаралар столига ўтиришни истамаса, Путин бунинг учун товон тўлаши керак," деди Стармер.
16 май куни Альбания пойтахти Тиранада Европа Иттифоқи ва бошқа 20 та давлат аъзоларини бирлаштирган Европа сиёсий ҳамжамияти йиғилиши режалаштирилган. Шунингдек, Россия ва Украина делегациялари Истанбулда Украинадаги можарони тугатиш бўйича музокаралар ўтказиш учун учрашиши айтилган. Аммо, музокараларда Путин ҳам, Украина президенти Владимир Зеленский ҳам иштирок этмаслиги кутилмоқда. АҚШ давлат котиби Марко Рубио эса уларнинг тинчликка эришишига шубҳа билан қарамоқда.
Европа сиёсий ҳамжамияти 2022 йилда Франция президенти Эммануэл Макрон ташаббуси билан Россиянинг Украинага бостириб киришига жавобан ташкил этилган.
Лондоннинг таъкидлашича, агар Россия ўт очишни тўхтатишга рози бўлмаса, яқин кунларда кенг кўламли санкцияларнинг марказий нишони Россия энергетикаси бўлади. Европа Иттифоқи ва Британия 14 май куни Россиянинг нефть флотига қарши янги санкцияларни маъқуллаган.
Изоҳ (0)