Саудия Арабистони 2026 йилдан бошлаб алкоголь маҳсулотларини сотиш ва истеъмол қилишга рухсат беришни режалаштирмоқда. Бу қадам 2034 йилда ўтказиладиган футбол бўйича жаҳон чемпионатига тайёргарликнинг бир қисми ҳисобланади. Бу ҳақда Тhе Economic Times хабар берди.
Спиртли ичимликлар фақат 600 га яқин туристлик жойда сотилиши режалаштирилган. Булар асосан меҳмонхоналар, дам олиш масканлари ва сайёҳлар учун мўлжалланган ҳудудлар бўлади. Пиво, вино ва сидр сотиб олиш мумкин бўлади. Кучлироқ спиртли ичимликлар учун тақиқ бекор қилинмайди.
Бундан ташқари уйда, дўконда ёки жамоат жойларида спиртли ичимликлар ичиш мумкин эмас. Ҳар қандай қоидабузарлик жаримага сабаб бўлади, унинг миқдорига аниқлик киритилмаган.
Мамлакатнинг алкоголь сиёсатидаги ўзгаришлар Саудия Арабистонининг иқтисодий ўсиш бўйича миллий режаси — Vision 2030’нинг бир қисмидир. У туризмни кенгайтиришга қаратилган. Маҳаллий амалдорлар фикрича, бу иш ўринлари яратиш ва хорижий инвестицияларни жалб этишга ёрдам беради.
2024 йил январь ойида Ар-Риёднинг дипломатик кварталида Саудия Арабистонидаги биринчи алкоголь дўкони очилганди. Бу ерда спиртли ичимликларни фақат чет эл дипломатлари ва мусулмон бўлмаган мамлакатлар элчихоналари ходимлари сотиб олиши мумкин.
Маълумот ўрнида, февраль ойида Саудия Арабистонининг Буюк Британиядаги элчиси, шаҳзода Холид бин Бандар Ал-Сауд Жаҳон чемпионати вақтида алкоголли ичимликлар сотилишига рухсат бериш учун қонунлар ўзгармаслигини айтганди.
Ҳар бир мамлакатнинг ўз маданияти бор. Биз меҳмонларни қабул қилишга тайёрмиз, аммо ўз маданиятимизни бошқалар учун ўзгартиришни истамаймиз.
У шунингдек ҳазил билан “Чиндан ҳам, спиртли ичимликларсиз яшай олмайсизми?” дея қўшимча қилганди.
Саудия Арабистонида спиртли ичимликларга қўйилган тақиқ
Саудия Арабистони қўшни Кувайт ва Бирлашган Араб Амирликларининг Шаржа шаҳрига ўхшаб, спиртли ичимликларни тўлиқ тақиқлаган дунёдаги саноқли давлатлардан бири бўлиб қолмоқда.
1950 йилларда Саудия Арабистони монархияси асосчиси қирол Абдулазиз 1951 йилда содир бўлган воқеадан сўнг спиртли ичимликларни тақиқлашни жорий қилди. Қиролнинг ўғилларидан бири шаҳзода Мишари маст ҳолда Жидда шаҳрида Британия вице-консули Сирил Усмонни тасодифан қурол билан ўлдирган.
Мишари умрбод қамоқ жазосига ҳукм қилинган ва қамоққа ташланган, ўз мақоми билан ўлим жазосидан қутқарилган. Мишари қирол Сауд даврида қамоқдан озод қилинган.
Озодликка чиққандан сўнг у АҚШ ва Буюк Британияга кетган. У ерда 1973 йилгача авиация бўйича таҳсил олган ва Саудия Арабистони тарихидаги биринчи учувчига айланган.
Шаҳзода Мишари 2000 йил 23 майда Нью Йоркда 68 ёшида вафот этган. У қироллик оиласининг бир қанча аъзолари ва таниқли шахслари каби Ал-Адл қабристонига дафн қилинган.
Изоҳ (0)