Чехия Россия билан уруш тугаганидан кейин Украинадаги тинчликпарвар миссияга қўшилади. Бу ҳақда мамлакат президенти Пётр Павел “Европейская правда” газетасига берган интервьюсида маълум қилди.
Президент сўзларига кўра, Прага аллақачон Украинанинг Россия билан келишувларига риоя этилишини назорат қилиш учун қўшинлар юборишни хоҳловчилар коалициясига кирган. Ҳозирда бунинг муҳокамаси давом этмоқда ва “контингентни жўнатишга умумий тайёргарлик бошлангач, Чехия унинг бир қисми бўлади”, деди Павел.
Шунингдек, у Чехия Украинага хавфсизлик кафолатларини тақдим этадиган давлатлар қаторига киришини таъкидлади. Сиёсатчи буни “ўзимизни (Чехияни) ҳимоя қилиш” учун керак деб атади. Павел бу борада турли фикрлар бўлса-да, қўшин юборишга тайёр кучли Европа давлатлари гуруҳи таркибида Чехия бўлиши кераклигини айтди.
У Украинадаги хавфсизликни иккита асосий омил таъминлашини қайд этди: Европа тинчликпарвар кучлари ва АҚШ бизнесининг фаол иштироки. Павелнинг фикрига кўра, Украина НАТОга аъзо бўлиш масаласини кўриб чиқишдан воз кечмаслик керак. Чунки “сиёсатчилар келиб, кетади” ва уч йил ичида АҚШда янги ҳукумат бўлиши мумкин, у ўз қарашларига эга бўлади.
Украинага хорижий контингентни юбориш масаласи
Россия билан уруш тугаганидан кейин Украинага тинчликпарвар кучларни юбориш миссиясига Буюк Британия ва Франция бошчилик қилмоқда. Туркия, Канада ва Австралия ушбу мақсадлар учун ўз қўшинларини ажратишга аллақачон рози бўлгани айтилмоқда. Яна 30 дан ортиқ давлат миссияни, жумладан, қурол-яроғ ва моддий-техник жиҳатдан қўллаб-қувватлашга тайёр.
Украинага 30 минггача тинчликпарвар кучларни юбориш масаласи муҳокама қилинмоқда. Британия ўз ҳарбийларини муддатсиз жойлаштиришни режалаштирмоқда, яъни “тинчлик битимини сақлаб қолиш ва Россияни ушлаб туриш учун қанча керак бўлса, шунча”. 27 март куни коалиция мамлакатлари мажбуриятларнинг тафсилотларини муҳокама қилиш учун яна йиғилади.
Бу орада Хитой ташаббусга эътибор қарата бошлади. Европа Иттифоқи дипломатик доираларидаги манбаларга кўра, Пекин ўз дипломатлари орқали миссияда иштирок этиш масаласини кўтарган. Манбалар мазкур қадам Украинага тинчликпарвар кучларни юбориш эҳтимолини оширишини айтмоқда.
Россия қандай муносабатда?
Bloomberg агентлигининг Кремлдаги манбалари Россия президенти Владимир Путин тинчликпарвар кучлар сифатида айнан Хитой ёки бошқа “нейтрал” давлатлар қўшинларини кўришни истаётгани, Европа контингенти иштирокига қарши чиқаётганини маълум қилган. Ташқи ишлар вазири Сергей Лавровнинг тушунтиришича, Украинада НАТО кучларининг ҳар қандай байроқ остида пайдо бўлиши урушнинг “асосий сабаблари” йўқолмаганини англатади.
Изоҳ (0)