Туркия ўз ҳарбийларини Украинага тинчликпарвар кучлар сифатида юборишга тайёр. Бу ҳақда манбаларга таяниб, Bloomberg хабар берди.
Хабарга кўра, мамлакат президенти Ражаб Тоййиб Эрдўған февраль ойи бошида Анқарада бўлиб ўтган учрашувларда украиналик ҳамкасби Владимир Зеленский ва Россия ташқи ишлар вазири Сергей Лавров билан бу масалани муҳокама қилган.
Туркиянинг ўт очишни тўхтатиш режимини мониторинг қилишда ёрдам беришга тайёрлиги Европадаги иттифоқчилар, жумладан, тегишли режаларни ишлаб чиқаётган Буюк Британия ва Франция учун муҳим аҳамиятга эга.
Бироқ Анқара барча маслаҳатлашувларда ва уни шакллантиришга тайёргарлик кўриш бўйича бошқа тадбирларда иштирок этмаса, ҳеч қандай тинчликпарвар миссиянинг бир қисмига айланишни истамайди, дейди манбалар.
Bloomberg материали эълон қилинганидан кўп ўтмай, Россиянинг “РИА Новости” агентлиги Эрдўғон маъмуриятига асосланиб, Туркиянинг Украинадаги вазиятни тартибга солиш учун дипломатик воситачилик қилишга тайёр эканини, аммо ҳарбий кучларни юбормаслигини хабар қилди.
Бизда бундай маълумот йўқ, бу борада расмий баёнот берилмаган. Расмий баёнотларга таянинглар, дея Туркия президенти маъмурияти жавобидан иқтибос келтиради агентлик.
Россия Украинада НАТО давлатларидан тинчликпарвар кучлари бўлишини хоҳламайди
Россия ТИВ раҳбари Сергей Лавров 18 февраль куни мамлакат Украинада НАТОга аъзо давлатлардан тинчликпарвар кучларнинг бўлишини номақбул деб ҳисоблашини айтди. Лавровнинг айтишича, Саудия Арабистонида АҚШ делегацияси билан ўтказилган музокаралар давомида Россия томони “можаро ҳал этилгандан ёки келишувга эришилгандан сўнг, қандайдир қуролли кучлар ёки тинчликпарварларни жойлаштириш имконияти” масаласини кўтарган.
Биз НАТО давлатларидан бўлган қўшинлар ва қуролли кучларнинг бошқа байроқ остида, масалан Европа Иттифоқи ёки миллий байроқлар остида пайдо бўлиши вазиятни ўзгартирмаслигини тушунтирдик. Бу, албатта, биз учун қабул қилиб бўлмайдиган ҳолат, дея таъкидлади вазир.
Британия Украинага қўшин жойлаштиришга тайёр
Буюк Британия бош вазири Кир Стармер унинг мамлакати хавфсизлик кафолатларини таъминлаш учун Украинага қўшин юборишга тайёрлигини айтди.
Бу, шунингдек, зарурат туғилганда, ўз қўшинларимизни жойлаштириш орқали Украина хавфсизлигини таъминлашга ҳисса қўшишга тайёр эканимиз ва истагимизни англатади. Украина хавфсизлигини таъминлашга кўмаклашиш қитъамиз ва мамлакатимиз хавфсизлигини кафолатлашга ёрдам беради, деди Стармер.
Шунингдек, Буюк Британия уруш тугаганидан сўнг Украина ҳаво ҳудудинини қўриқлаш учун Тйпҳоон қирувчи самолётларини юборишни режалаштирмоқда.
Украинага хавфсизлик кафолатлари нима учун керак?
Украина президенти Владимир Зеленский АҚШ ўт очишни тўхтатишни исташи ва бу улар учун урушни тўхтатишни англатиши, бироқ Украина учун етарли эмаслиги ва кафолатлар кераклигини таъкидлаган.
Ишончим комилки, улар буни ҳақиқатан ҳам катта муваффақият, Путин яна ҳужумга журъат этмайди, деб ҳисоблайди. Бизда хавфсизлик кафолатлари бўлиши керак, деб ҳисоблаймиз, деган сиёсатчи.
Зеленскийнинг сўзларига кўра, хавфсизлик кафолатисиз ноаниқлик ҳукм суради ва ҳар доим Россиянинг такрорий ҳужуми хавфи бўлади.
Изоҳ (0)