Франция президенти Эммануэл Макрон 30 давлат Украина хавфсизлигини таъминлашда иштирок этишга тайёрлигини маълум қилди. У қўшинлар фронт чизиғида жойлашиши шарт эмаслиги, бироқ улар кафолат сифатида ҳозир бўлишини таъкидлади. Бу ҳақда Fox News хабар берди.
Мен Европанинг 30 етакчиси ва иттифоқчиларимиз билан гаплашдим, уларнинг кўпчилиги бундай битимнинг бир қисми бўлишга, у ёки бу кўринишдаги хавфсизлик кафолатларига тайёр, деди у.
Франция президентига кўра, бу давлатлар Россия келишувларни бузган тақдирда АҚШдан қўллаб-қувватлаш сигналини кутмоқда. Бунга қадар Франция президенти Украина учун хавфсизлик кафолатларини муҳокама қилиш мақсадида Европа етакчиларини икки марта — 17 ва 19 февраль кунлари йиғган эди.
Бунга АҚШнинг янги раҳбарияти вакилларининг танқидий баёнотлар сабаб бўлган. Хусусан, Мюнхен хавфсизлик конференцияси АҚШ президентининг махсус элчиси Кит Келлог Украинадаги можарони ҳал этиш бўйича музокараларда Европа Иттифоқи жисмонан иштирок этмаслигини айтган.
Макрон 24 февраль куни АҚШ президенти Дональд Трамп билан Украина бўйича музокаралар ўтказиш учун Вашингтонга келди, кейинроқ Британия бош вазири Кир Стармер АҚШга ташриф буюради.
Британия Украинага қўшин жойлаштиришга тайёр
Буюк Британия бош вазири Кир Стармер унинг мамлакати хавфсизлик кафолатларини таъминлаш учун Украинага қўшин юборишга тайёрлигини айтди.
Бу, шунингдек, зарурат туғилганда, ўз қўшинларимизни жойлаштириш орқали Украина хавфсизлигини таъминлашга ҳисса қўшишга тайёр эканимиз ва истагимизни англатади. Украина хавфсизлигини таъминлашга кўмаклашиш қитъамиз ва мамлакатимиз хавфсизлигини кафолатлашга ёрдам беради, деди Стармер.
Шунингдек, Буюк Британия уруш тугаганидан сўнг Украина ҳаво ҳудудинини қўриқлаш учун Typhoon қирувчи самолётларини юборишни режалаштирмоқда.
Украинага хавфсизлик кафолатлари нима учун керак?
Украина президенти Владимир Зеленский АҚШ ўт очишни тўхтатишни исташи ва бу улар учун урушни тўхтатишни англатиши, бироқ Украина учун етарли эмаслиги ва кафолатлар кераклигини таъкидлаган.
Ишончим комилки, улар буни ҳақиқатан ҳам катта муваффақият, Путин яна ҳужумга журъат этмайди, деб ҳисоблайди. Бизда хавфсизлик кафолатлари бўлиши керак, деб ҳисоблаймиз, деган сиёсатчи.
Зеленскийнинг сўзларига кўра, хавфсизлик кафолатисиз ноаниқлик ҳукм суради ва ҳар доим Россиянинг такрорий ҳужуми хавфи бўлади.
Ноаниқлик бутун дунё учун ёмон. Бундан ҳамма ютқазади. Биз ютқазяпмиз, америкаликлар ютқазяпти, чунки сен ўт очишни тўхтатган бўлсанг ва бир йилдан кейин уруш бошланса, ғолиб бўлиб кўриниш мумкинми? Россияликлар эса тайёргарлик кўради ва кейин яна ҳужум бошланади, дея тушунтирди президент.
Шу сабабли у урушнинг қайноқ босқичи тугаши ҳақида гап кетса, бу қандай тугаши, ҳамкорлар қандай хавфсизлик кафолатларини бериши зарурлигини таъкидлаган.
Изоҳ (0)