Fransiya prezidenti Emmanuel Makron AQSH prezidenti Donald Tramp o‘zining rossiyalik hamkasbi Vladimir Putin uni aldaganini tushunib yetganini, shu bois g‘azab hamda sabrsizlik his etayotganini ta’kidladi. Uning so‘zlarini Le Monde gazetasi keltirmoqda.
“Menimcha, prezident Tramp prezident Putin unga tinchlikka tayyor ekanligini aytganida, yolg‘on gapirganini angladi. So‘nggi soatlarda biz yana Donald Trampning g‘azabini ko‘rib turibmiz. Bu sabrsizlikning namoyon bo‘lishidir”, dedi u.
Fransiya rahbarining qo‘shimcha qilishicha, ro‘y berayotgan voqealar munosabati bilan uning asosiy istagi Trampning g‘azabi “amaliy harakatlarga”, ya’ni Moskvaga bosim o‘tkazishga qodir bo‘lgan Rossiyaga qarshi keng qamrovli sanksiyalar paketiga aylanishidir.
Bundan tashqari, Makron yana bir bor tomonlarni o‘t ochishni to‘xtatish bo‘yicha kelishuvga erishishga chaqirdi.
Rossiya qo‘shinlari 25-mayga o‘tar kechasi Ukrainaga dronlar va raketalar bilan eng yirik aviazarbani amalga oshirdi. Mazkur aviahujumga 298 ta dron jalb etildi. AQSH prezidenti Donald Tramp bunga munosabat bildirib, rossiyalik hamkasbi Vladimir Putinni keskin tanqid qildi.
“Men har doim Vladimir Putin bilan juda yaxshi munosabatda bo‘lganman, lekin unga nimadir bo‘lgan. U butunlay aqldan ozibdi! U bekordan bekorga ko‘p odamlarni o‘ldiryapti, men faqat harbiylar haqida gapirayotganim yo‘q. Raketalar va dronlar hech qanday sababsiz Ukraina shaharlari bo‘ylab uchirilmoqda”, dedi Tramp.
Izoh (0)