Эрон АҚШ президенти Дональд Трампнинг кучайиб бораётган таҳдидлари фонида эҳтимолий жавоб учун ракеталарини шай ҳолатга келтирди. Бу ҳақда Tehran Times хабар берди.
Маълум қилинишича, гап Эрон қуролли кучларининг АҚШга алоқадор объектларга зарба бера оладиган ракеталари ҳақида кетмоқда.
Учиришга тайёр бўлган ушбу ракеталарнинг катта қисми бутун мамлакат бўйлаб ҳаво ҳужумларига бардош бера оладиган тарзда лойиҳалаштирилган ерости иншоотларига жойлаштирилган, дейилади хабарда.
Эрон олий раҳнамоси Оятуллоҳ Али Хоманаий эса АҚШнинг ташқаридан зарба бериши эҳтимоли камлигини айтмоқда.
Ёвузлик ташқаридан амалга оширилиши даргумон, аммо агар у амалга оширилса, улар, албатта, қаттиқ жавоб зарбасини олади, деган у.
АҚШ президенти таҳдиди ва Эрон жавоби
Трамп март ойи бошида Эрон олий раҳнамосига мактуб йўллаб, унга янги ядровий келишув тузиш учун икки ой муҳлат берган эди. Мактубда янги ядровий битим бўйича музокаралар ўтказиш қатъий талаб қилинган. Трамп таклифни рад этиш оқибатларидан огоҳлантирган. АҚШ мактуб мазмуни ҳақида бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Эрон олий раҳнамоси 12 март куни мактубни олгач, Трампнинг музокаралар ҳақидаги таклифини “алдов” деб атади. 30 март куни эса Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортди. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Икки томон ўртасида тўғридан тўғри музокаралар ўтказиш имконияти рад этилган бўлса-да, билвосита музокаралар учун йўл очиқлиги таъкидланди, деган Эрон президенти
Бунга жавобан Трамп агар келишув бўлмаса, Эронни бомбардимон қилиш билан таҳдид қилди.
Агар улар келишувга эришмаса, унда бомбардимон бўлади. Бу улар ҳеч қачон кўрмаган бомбардимон бўлади, деган АҚШ раҳбари.
Ядровий келишувдан чиқиш
2015 йилда Буюк Британия, Германия, Хитой, Россия, АҚШ, Франция ва Эрон ядровий келишувни — Эрон ядровий дастурига чекловлар эвазига санкцияларни бекор қилишни назарда тутувчи Қўшма кенг қамровли ҳаракатлар режасини имзолади. АҚШ Трамп президентлиги даврида 2018 йилнинг май ойида ушбу келишувдан чиққан ва Теҳронга қарши санкцияларни тиклаган. Бунга жавобан Эрон келишув бўйича ўз мажбуриятларини босқичма-босқич қисқартириш, ядровий тадқиқотлар, центрифугалар ва уранни бойитиш даражасидаги чекловлардан воз кечишини эълон қилган.
Трамп қайта президентликка сайлангач, Эронга “максимал босим ўтказиш” кампаниясини бошлади. Унинг мақсади Исроилнинг асосий душманини заифлаштириш, Эрон ядровий бомбаси яратилишига йўл қўймаслик ва Эрон баллистик ракеталарининг узоқлигини чеклашдир.
Вашингтоннинг асосий рақиби ҳисобланган Хитой эса Эронга қарши ноқонуний санкцияларга чек қўйишни таклиф қилмоқда. У буни ядро дастури бўйича музокараларни боши берк кўчадан олиб чиқишга ёрдам беради, деб ҳисоблайди. Март ойи ўрталарида Хитой Эрон ва Россия делегацияларининг учрашувини қабул қилганди, бир ҳафта олдин эса Россия Трамп маъмуриятига Эрон билан мулоқотда ёрдам беришга рози бўлгани ҳақида хабарлар пайдо бўлган эди.
Изоҳ (0)