АҚШ Украина можаросини ҳал қилиш бўйича музокаралар жараёнидан тинчлик йўлида олдинга силжиш бўлмаса чиқиши мумкин. Бу ҳақда АҚШ Давлат департаменти матбуот котиби Темми Брюс маълум қилди.
“Ҳозирги босқичда икки томон ҳам ушбу можарони тугатиш бўйича аниқ таклифлар тақдим этиши лозим. Бундан кейинги ҳаракатларимиз ҳозирда президентнинг қўлидаги қарордир. Агар илгари силжиш бўлмаса, биз бу жараёндаги воситачилик ролимиздан воз кечамиз”, деди Брюс.
Бироқ у АҚШ президенти Дональд Трамп ва давлат котиби Марко Рубио можарони ҳал қилиш учун қандай муддатлар белгилаши мумкинлигини аниқлаштирмаган. Шунингдек, Брюс тақдим этилиши керак бўлган таклифлар тўлиқ ва барқарор ўт очишни тўхтатиш ҳамда можарони тугатиш билан боғлиқ бўлиши лозимлигини таъкидлаган.
Илгари Оқ уйда Трампнинг Украина ва Россиядан можарони ҳал қилишда олдинга силжиш йўқлиги сабабли кўнгли қолаётгани айтилганди. У ерда яна Киев ва Москва “инқироздан чиқиш” учун музокараларни бошлаши кераклиги таъкидланган.
Бундан олдин Трамп Украина инқирозини ҳал қилиш учун ўзи учун сўнгги муддатни белгилаганини айтганди. “Менинг ўз муддатим бор”, деган у. Аммо айнан қайси муддатлар ҳақида гап кетаётганини аниқлаштирмаган. Шу билан бирга, ўтган ҳафта АҚШ президенти Украинадаги келишув бўйича музокаралар илгарилаб бораётганини таъкидлаган эди.
Ўз навбатида, Трампнинг миллий хавфсизлик бўйича маслаҳатчиси Майк Уолц The National Interest журнали учун ёзган мақоласида Москва ва Киев имкон қадар тезроқ Украина масаласини ҳал қилиш бўйича келишувга эришиши лозимлигини таъкидлаган.
Изоҳ (0)