Мичиган штатидан Демократик партия вакили Шри Танедар АҚШ президенти Дональд Трампга қарши импичмент жараёнини бошлашга ташаббус кўрсатди. Бу ҳақда у ўзининг Х ижтимоий тармоғидаги саҳифасида маълум қилди.
У давлат раҳбарини конституцияни бузишда ва ҳокимиятни эгаллаб олишга уринишда айблаган ҳамда ҳамкасбларини уни қўллаб-қувватлашга чақирган.
“Бу мамлакатда қироллар эмас, президентлар бор. Бу шунчаки қилмиш эмас, балки импичментга лойиқ қилмишдир. Бу етакчилик эмас, балки золимликдир. Агар биз бунга йўл қўйсак, президент қонундан устун, Қўшма Штатлар конституцияси мажбурий эмас деган бўламиз”, деди Танедар ўз видеомурожаатида.
Умуман олганда, конгрессмен еттита айбловни илгари сурди: жумладан, қонун чиқарувчининг фикрича, Трамп ижро ҳокимиятини суиистеъмол қилмоқда, одил судловга тўсқинлик қилиб, суверен давлатларга ҳарбий босқин билан таҳдид солмоқда ва ўз танқидчилари ҳамда оммавий ахборот воситаларига қарши чиқиш орқали сўз эркинлигига тажовуз қилмоқда.
Бундан ташқари, Танедар президентни зулм ўтказишда, коррупцияда, шунингдек, “ноқонуний органлар” ташкил этишда айблади, чунки у АҚШ ҳукумати фаолияти самарадорлигини ошириш бўйича идора (DOGE) тузган ва Илон Маскка конституцияни бир томонлама бузиш ҳуқуқини берган.
Илгари конгрессмен Эл Грин (Техас штатидан демократ) президентга қарши импичмент жараёнини бошлаш ниятини билдирган эди. Трампнинг биринчи муддати пайтидаёқ қонун чиқарувчи уни ҳокимиятдан четлатиш таклифи билан бир неча бор ҳужжат киритган, аммо барча уринишлар муваффақиятсизликка учраган. Март ойи охирида Axios портали ўз манбаларига таяниб, Вакиллар палатаси аъзоси Илхон Умар (Миннесота штатидан демократ) Демократик партиядаги ҳамкасблари билан президентнинг миллий хавфсизлик бўйича ёрдамчиси Майк Уолц, мудофаа вазири Пит Хегсет ва Марказий разведка бошқармаси директори Жон Ретклиффга нисбатан импичмент тартибини бошлаш имкониятини муҳокама қилаётгани ҳақида хабар берган эди.
Ҳозирги пайтда Трампни қўллаб-қувватловчи Республикачилар партияси Сенатда ҳам, Конгресс вакиллар палатасида ҳам кўпчилик овозга эга, бу эса импичментга уринишни деярли имконсиз қилади.
Трамп АҚШ тарихида импичмент жараёни икки марта бошланган биринчи президентдир —- иккала ҳолат ҳам унинг 2019 ва 2021 йиллардаги биринчи президентлик даврида содир бўлган ва Сенат томонидан рад этилган.
Изоҳ (0)