Россия президенти Владимир Путин Москва томони Украина можаросини ҳал қилиш бўйича музокаралар столига қайтишга тайёрлигини айтди.
Унинг сўзларига кўра, Украина Ар-Риёдда Россия ва АҚШ делегациялари учрашувида иштирок этмагани учун “ваҳимага тушишга” асос йўқ, чунки Киевни ҳеч ким музокаралар жараёнидан четлатмаяпти.
Россия ҳеч қачон Украина билан музокаралар жараёнидан бош тортмаган. Аксинча, ҳамкорларимиз музокараларни рад этди, европаликлар Россия билан алоқани тўхтатди, Украина томони эса ўзига музокаралар олиб боришни тақиқлади, Истанбулдаги музокаралар жараёнидан чиқди ва буни очиқчасига эълон қилди, деди Путин журналистларга.
Россия етакчисининг аниқлик киритишича, Дональд Трамп телефон орқали мулоқот чоғида музокаралар жараёни Россия ва Украина иштирокида ўтишини таъкидлаган.
Путинга кўра, у Дональд Трампга Россия–Украина можаросини қисқа вақт ичида ҳал қилишнинг иложи йўқлиги ҳақида айтган, Америка президенти эса бу борада кўпроқ маълумот олгач, “ўз позициясини ўзгартирган”.
Ҳа, олти ой кераклигини айтдим. Ҳозир муддатлар ҳақида гапирмаймиз. Лекин бу табиий, бу ерда айтарли ҳеч нарса йўқ, деб тушунтирди Путин.
Жорий йилнинг 18 февраль куни Ар-Риёдда бўлиб ўтган АҚШ ва Россия делегацияларининг музокараларида Украинадаги можарони ҳал қилиш учун музокара гуруҳларини тузишга қарор қилинди.
Зеленский ўша куннинг ўзида 19 февраль кунига режалаштирилган Саудия Арабистонига ташрифи кечиктирилганини эълон қилди.
У бугунги Россия ва АҚШ расмий вакиллари ўртасидаги учрашувдан сўнг “тасодифлар” бўлишини истамаслигини таъкидлади.
У ерда ким қолади, ким кетади, ким қаерга боришини билмайман. Очиғини айтсам, менга фарқи йўқ. Лекин ҳамкорларимиз биз ҳақимизда ортиқча фикр юритишларини истамайман. Мен тасодифларни хоҳламайман, шунинг учун эртага Саудия Арабистонига бормайман, деди Зеленский Туркия президенти Ражаб Тоййиб Эрдоғон билан учрашувдан сўнг Анқарада ўтказилган матбуот анжуманида.
Украина етакчиси, шунингдек, АҚШ ва Россия делегацияларининг ўтган учрашувига изоҳ бериб, Украина Россиянинг ультиматумларини қабул қилмаслигини яна бир бор қайд этди. У уруш бошида Россия Украинага шарт қўйганини, хусусан, Украина армияси сонини камайтириш, ҳудудий ён беришлар, шунингдек, мамлакат раҳбариятига Россия тарафдори бўлган раҳбариятни қўйишни талаб қилганини айтди.
Изоҳ (0)