Кремль АҚШ президенти Дональд Трамп маъмуриятига Россия табиий ресурслари бўйича келишувни таклиф қилди, деб хабар бермоқда The Moscow Times.
Россия АҚШ нефть компаниялари мамлакатга қайтиши мумкинлигига ишонади, бундан ташқари, АҚШ билан Арктикада қўшма лойиҳалардан манфаатдор, деди Саудия Арабистонидаги музокаралар бошланишидан олдин Россия тўғридан-тўғри инвестициялар жамғармаси раҳбари Кирилл Дмитриев.
Ар-Риёдда америкаликлар билан учрашиш учун Владимир Путин томонидан танланган учта делегатдан бири Дмитриевнинг сўзларига кўра, Москва АҚШ билан иқтисодий ҳамкорликни тиклаш муҳим деб ҳисоблайди.
Дмитриев, АҚШнинг йирик нефть компаниялари Россияда “жуда муваффақиятли бизнес”га эга бўлганини таъкидлаб, улар қачондир қайтиб келишига ишонч билдирди.
Биз қўшма лойиҳалар амалга оширишимиз керак, жумладан, Арктикада ҳам, бошқа соҳаларда ҳам. Қўшма лойиҳалар бизга янада муваффақиятли бўлишимизга имкон беради, дея давом этди Дмитриев.
Унинг сўзларига кўра, Америка компаниялари гўёки Россияга қарши санкциялардан 300 миллиард доллар йўқотган, Жо Байден маъмурияти эса Россия иқтисодиёти ҳолати ҳақида “жуда кўп нотўғри хабарлар берган”.
Россия–Украина уруши бошланишидан олдин Россияда нефть қазиб олиш билан фақат битта йирик Америка компанияси шуғулланган: бу “Сахалин-1” лойиҳасининг 30 фоизига эгалик қилувчи Exxon Mobil эди. Санкциялар жорий этилгандан сўнг, компания лойиҳадан чиқишини эълон қилди, бироқ улушини сота олмади, дастлаб бу 2023 йилда содир бўлиши кутилган эди, аммо Кремль муддатни икки марта узайтирди — охирги марта 2026 йил охиригача.
Уруш бошланганидан сўнг, Американинг етакчи нефть хизматлари компаниялари — Halliburton, Schlumberger ва Bakeр Hughes ҳам Россияни тарк этишини маълум қилди. Улар ёрдамида мамлакат СССР қулаши оқибатида юзага келган нефть қазиб олиш таназзулидан кейин ишлаб чиқаришни тиклашга эришган эди. Президент Владимир Путин 2025 йилга қадар мамлакатда углеводородларни бурғулаш ва қидириш бўйича ўз технологияларини яратишни ҳамда уларнинг улушини 80 фоизга етказишни талаб қилган.
Россия ва АҚШ Ар-Риёдда музокаралар ўтказди
Дмитриевдан ташқари, 18 февраль куни Россиядан Саудия Арабистонида бўлиб ўтган музокараларда ТИВ раҳбари Сергей Лавров ва президент ёрдамчиси Юрий Ушаков иштирок этди. Дмитриев музокараларни “ижобий” дея баҳолади. Учрашувда АҚШдан давлат котиби Марко Рубио, Трампнинг миллий хавфсизлик бўйича маслаҳатчиси Майк Уолц ва Яқин Шарқдаги махсус вакили Стив Уиткофф иштирок этди. Украина ҳамда Европа давлатлари музокараларда иштирок этмади.
Музокара 4,5 соат давом этди. Ушаков музокаралар самарали ўтганини, томонлар келажакда бир-бирининг манфаатларини инобатга олишга келишиб олганини маълум қилди.
Биз шунчаки бир-биримизнинг манфаатларимизни ҳисобга олишга келишиб олдик. Шу билан бирга, икки томонлама муносабатларни ривожлантириш устида ҳам ишлаймиз, чунки бу Москва ва Вашингтон учун бирдек муҳим, деди Ушаков журналистларга.
Делегациялар, жумладан, Россия ва АҚШ раҳбарлари Владимир Путин ва Дональд Трампнинг учрашувини ҳам муҳокама қилишди.
Изоҳ (0)