AQSH prezidenti Donald Tramp Ukrainadagi urushni tugatish uchun rossiyalik hamkasbi Vladimir Putinga uch kun muhlat berdi. Bu haqda The Guardian xabar berdi.
Tramp hafta oxirigacha o‘t ochishni to‘xtatish taklifi bo‘yicha Putinning javobini kutishini ta’kidladi.
Ularning javobini shu hafta eshitamiz, aslida, yaqin orada. Biz qotilliklar to‘xtashini istaymiz, dedi AQSH rahbari.
U bir hafta ichida, ya’ni 24-aprelgacha AQSH va Ukraina o‘rtasida tabiiy resurslar bo‘yicha kelishuv imzolanishi mumkinligini ham aytdi. Tramp ko‘rsatilgan harbiy yordamga javoban Ukrainaning foydali qazilmalaridan foydalanish huquqini qo‘lga kiritmoqchi. Shunga qaramasdan, Kiyev harbiy yordam uchun AQSHga qarz to‘lashi kerak bo‘ladi. Tomonlar o‘rtasidagi mineral resurslar bo‘yicha muzokaralarda qarz miqdori 300 milliarddan 100 milliard dollargacha kamaytirilgan.
Axios manbalariga ko‘ra, agar Putin aprel oyi oxirigacha sulhga rozi bo‘lmasa, AQSH Rossiyaga qarshi yangi sanksiyalar joriy etishga tayyor. Avvalroq Tramp rossiyalik hamkasbidan norozi ekani va u muzokaralar jarayonini ataylab cho‘zayotganini aytgandi. Rossiya sulhga rozi bo‘lmasa, uning “yashirin floti”ga qarshi qattiq cheklovlar qo‘llanishi mumkin. Trampning o‘zi avvalroq Rossiya neftini sotib oluvchi mamlakatlarga nisbatan 500 foizgacha boj joriy etish bilan tahdid qilgandi.
18-aprel kuni urush ishtirokchilarining energiya obyektlariga o‘zaro zarbalarga moratoriy tugaydi va Kreml uni uzaytirishga tayyorligini hali bildirmagan.
Rossiya tomoni moratoriy atrofidagi vaziyat munosabati bilan amerikalik hamkorlarga “muayyan signallarni” yetkazadi, degan edi Putinning yordamchisi Yuriy Ushakov.
Rossiya prezidenti matbuot kotibi Dmitriy Peskov esa AQSH bilan Ukrainadagi vaziyatni tartibga solish bo‘yicha muzokaralar qiyinchiliklarga duch kelganini aytgan.
Ish ancha murakkab ketmoqda, degan u va bunga “Kiyev rejimi” aybdor ekanini da’vo qilgan. Kreml pozitsiyasidan xabardor The Moscow Times manbalariga ko‘ra, Putin Ukraina bo‘yicha muzokaralarda maksimalistik talablarni saqlab qolmoqda.
♦ Ukrainaning urushni tugatish shartlari
♦ Rossiya shartlari
Izoh (0)