AQSH prezidenti Donald Tramp yaqin kunlarda o‘t ochishni to‘xtatish bo‘yicha taraqqiyotni ko‘rmasa, Rossiya va Ukraina o‘rtasida tinchlikka erishishda vositachilik qilishni to‘xtatadi. Bu haqda Davlat departamenti rahbari Marko Rubio ma’lum qildi.
Biz bu ishni haftalar va oylar davomida davom ettirmoqchi emasmiz. Shuning uchun biz juda tez qaror qabul qilishimiz kerak — va men bir necha kun haqida gapiryapman — bu yaqin bir necha hafta ichida amalga oshirilishi mumkinmi? Agar “ha” bo‘lsa, biz ishni davom ettiramiz. Agar “yo‘q” bo‘lsa, boshqa ustuvor vazifalarimiz bor, ularga diqqatimizni qaratishimiz kerak, dedi Rubio.
Shu bilan birga u Tramp hamon kelishuv tuzishdan manfaatdor ekani, biroq kelishuv imkoniyati haqida tezkor va aniq signallar ko‘rmasa, boshqa yo‘nalishga o‘tishini aytdi. Saylovoldi kampaniyasi davomida Tramp Oq uyga qaytganidan so‘ng 24 soat ichida urushni tugatishga va’da bergan edi. Prezidentlik lavozimiga kirishgach, kelishuvda to‘siqlarga duch kelgani sababli muddatni aprel—may oylariga ko‘chirdi. Endi esa muzokaralarda taraqqiyot bo‘lmasa, vositachilik qilmasligi ta’kidlanmoqda.
Rubio yuqoridagi bayonotni 17-aprel kuni Parijda bo‘lib o‘tgan Yevropa Ittifoqi va Ukraina vakillari bilan uchrashuvdan so‘ng e’lon qildi. U suhbat konstruktiv bo‘lganini aytdi.
O‘ylaymanki, Buyuk Britaniya, Fransiya va Germaniya bizga ishni “o‘lik nuqta”dan olib chiqish va uni hal qilishga yaqinlashtirishda yordam berishi mumkin, degan AQSH davlat kotibi.
New York Times nashrining yozishicha, “Trampning sabr kosasi to‘lib bormoqda”. Parijdagi muzokaralarda ishtirok etgan rasmiylar kelasi hafta Londonda uchrashishga kelishib olgan. Rubio ham bu uchrashuvda qatnashishi mumkin.
Rubio 17-aprelda Rossiya tashqi ishlar vaziri Sergey Lavrov bilan telefon orqali muloqot qildi. Rossiya Tashqi ishlar vazirligiga ko‘ra, Lavrov “Ukraina inqirozining asl sabablarini bartaraf etish uchun Moskva amerikaliklar bilan hamkorlikni davom ettirishga tayyor”ligi bildirgan.
Rubio suhbatdoshini Ukraina bo‘yicha ehtimoliy kelishuvning asosiy tamoyillari bilan tanishtirgan. U bu kelishuvni Parijdagi uchrashuvda ham ma’lum qilgan.
Tramp va AQSH urushning tugashini xohlaydi. Barcha tomonlarga mustahkam va uzoq muddatli tinchlik loyihasi taqdim etildi, deyiladi Oq uy xabarida.
AQSH prezidenti qaror qabul qilish uchun rossiyalik hamkasbiga uch kun muhlat bergan. Tramp hafta oxirigacha o‘t ochishni to‘xtatish taklifi bo‘yicha Putinning javobini kutishini ta’kidlagan.
Biz qotilliklar to‘xtatilishini istaymiz, degan u. Axios manbalariga ko‘ra, agar Putin aprel oyi oxirigacha sulhga rozi bo‘lmasa, AQSH Rossiyaga qarshi yangi sanksiyalar joriy etishga tayyor.
Izoh (0)