АҚШ маъмурияти Украинадаги фойдали қазилмаларни қазиб олиш бўйича келишувнинг “такомиллаштирилган” версиясини Киевга юборди. Бу ҳақда Axios хабар берди.
Сўнгги кунларда минераллар бўйича келишмовчилик АҚШ ва Украина муносабатларида кескин бурилиш бўлди. Президент Дональд Трамп украиналик ҳамкасбини Россия билан урушни танлаган “сайланмаган диктатор” сифатида қоралади, Зеленский эса бунга жавобан уни Россиянинг “дезинформация”сини ютиб юборганликда айблади.
Икки томондаги манбалар эндиликда АҚШга Украина минералларидан фойдаланишга рухсат берувчи битим имзоланишини айтмоқда. Зеленский битимнинг дастлабки версияси мамлакат манфаатларини ҳимоя қилмагани учун вазирларга мазкур ҳужжатни имзоламасликни буюрганди. Такомиллашган битим шартлари Украина президентига манзур келиши кутилмоқда.
Манбаларга кўра, ҳужжатга “сезиларли яхшиланишлар киритилган” ва у “Украина қонунчилигига мос келади”. Битим “Зеленскийнинг айрим хавотирларини ҳисобга олиши” қайд этилган. Хусусан, унда битим Нью Йорк суди юрисдикциясига тегишли бўлиши ҳақидаги банд чиқариб ташланган. Бошқа тафсилотлар эса келтирилмаган.
Зеленскийнинг бир нечта маслаҳатчилари унга Трамп билан “янги келишмовчиликлардан қочиш” ва унга Украинани қўллаб-қувватлашни асослаш имкониятини бериш учун янгиланган ҳужжатни имзолашни маслаҳат берди, дейилади хабарда.
Миллий хавфсизлик бўйича маслаҳатчи Майк Валс Украина раҳбари фойдали қазилмалар масаласида “столга қайтиши” кераклигини айтди.
Бу музокара. Музокарада эса сиз музокара қиласиз. Украина фойдали қазилмалар бўйича музокаралар олиб бормоқчи, шунинг учун биз бу ҳақда гаплашяпмиз, деди Оқ уй расмийси.
Зеленский Украина минерал ресурсларининг 50 фоизига бўлган ҳуқуқларни АҚШга бермоқчи эмас
Украина президенти тегишли келишувни имзолашдан бош тортди. У, шунингдек, АҚШ вакиллари билан Украина конституциясига мувофиқ тайёрланган тоғ-кон бўйича келишув бўйича ўз таклифини муҳокама қилди.
АҚШ сенатори Брайан Шац Украина президенти билан учрашувдан сўнг Трампнинг таклифини “яхшилаш зарурлигини” айтди, бироқ тафсилотлар ҳақида гапиришдан бош тортди. У, Зеленскийнинг “келишувнинг бир томонламалиги ҳақидаги даъволари адолатли” эканини таъкидлади.
Хавфсизлик кафолатлари эвазига Украина ресурсларидан фойдаланиш
Трампнинг сўзларига кўра, у Зеленский билан Россия билан бўлажак тинчлик шартномасида хавфсизлик кафолатлари эвазига америкалик инвесторларга Украинадаги нодир металлар конлари ва газ конларига кириш ҳуқуқини бериш бўйича 500 миллион долларлик келишув тузмоқчи.
Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.
3 февраль куни Трамп бу вариант ҳақида яна гапира бошлади, бу Ғарб сиёсатчилари ва оммавий ахборот воситаларида катта шов-шувга сабаб бўлди. 7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди.
Изоҳ (0)