Трамп Украина тез орада мағлуб бўлишини ва ўзи бу мамлакатни қутқаришга уринаётганини билдирди

АҚШ президенти Дональд Трамп Аtlantic журнали билан суҳбатда Украина жуда тез орада “мағлуб бўлишига” ишонч билдирди ва ўзи бу мамлакатни қутқаришга уринаётганини таъкидлади.

“Мен бу мамлакатни қутқармоқчиман. Менимча, бу мамлакат тез орада мағлуб бўлади... Келинг, ҳақиқатга юзма-юз бўлайлик”, деди Америка раҳбари ўз интервьюсида.

Трамп ўзининг биринчи президентлик муддатида Киевга танкка қарши Javelin бошқариладиган ракеталарини “берганини” эслатди. Шунингдек, у Украина ҳозирги можарода яна кўпроқ ҳудудларни йўқотиши мумкинлигига билдирди.

“Албатта, қурол бўлиши шарт эмас. Қуролнинг турлари кўп. Ўқли қурол бўлиши шарт эмас. Бу санкция қуроли бўлиши мумкин. Бу банк тизими қуроли бўлиши мумкин. Бу бошқа кўплаб қуроллар бўлиши мумкин”, деди Оқ уй раҳбари.

Шунингдек, Трамп Украинадаги можаро ҳозирча америкаликлар ҳаётига таҳдид солмаётганини, бироқ учинчи жаҳон урушига айланиб кетиши мумкинлигини айтган.

Трамп Украина можаросининг кучайишидан бир неча бор огоҳлантирган. Февраль ойида у ўзидан олдинги Жо Байден маъмурияти яна бир йил ҳокимиятда қолганида, дунё “учинчи жаҳон урушига кириб қолиши, энди эса бундай бўлмаслигини” айтган эди. Бундан ташқари, март ойида Владимир Зеленский билан учрашувда Трамп унинг “учинчи жаҳон уруши билан ўйнашаётганини” таъкидлади.

Тинчлик сулҳи

Россия Федерацияси президенти Владимир Путин Ғалабанинг 80 йиллиги муносабати билан уч кунлик вақтинчалик сулҳ эълон қилди. Унга кўра, 7 майдан 8 майга ўтар кечаси соат 00:00 дан 10 майдан 11 майга ўтар кечаси соат 00:00 гача Россия томонидан барча жанговар ҳаракатлар тўхтатилиши кўзда тутилган.

Украина президенти Владимир Зеленский эса Россия Федерацияси президенти Владимир Путиннинг май ойидаги уч кунлик сулҳ таклифини рад этди.

25 апрель куни Владимир Путин АҚШ президентининг махсус вакили Стив Уиткофф билан учрашди. Унда Россия ва Украина ўртасидаги тўғридан тўғри музокараларни қайта бошлаш имконияти муҳокама қилинди. Бу Уиткоффнинг сўнгги уч ой ичида Россияга тўртинчи ташрифи ва АҚШ президентининг махсус вакили ва Путин ўртасидаги учинчи учрашув ҳисобланади.

11 апрель куни Санкт-Петербургда бўлиб ўтган учрашувда Уиткофф ва Путин Украинадаги можарони ҳал қилиш масалаларини муҳокама қилган эди. Ўшанда Россия президенти АҚШдан доимий тинчликни таъминлашни сўраганди.