АҚШ президенти Дональд Трамп яқин кунларда ўт очишни тўхтатиш бўйича тараққиётни кўрмаса, Россия ва Украина ўртасида тинчликка эришишда воситачилик қилишни тўхтатади. Бу ҳақда Давлат департаменти раҳбари Марко Рубио маълум қилди.
Биз бу ишни ҳафталар ва ойлар давомида давом эттирмоқчи эмасмиз. Шунинг учун биз жуда тез қарор қабул қилишимиз керак — ва мен бир неча кун ҳақида гапиряпман — бу яқин бир неча ҳафта ичида амалга оширилиши мумкинми? Агар “ҳа” бўлса, биз ишни давом эттирамиз. Агар “йўқ” бўлса, бошқа устувор вазифаларимиз бор, уларга диққатимизни қаратишимиз керак, деди Рубио.
Шу билан бирга у Трамп ҳамон келишув тузишдан манфаатдор экани, бироқ келишув имконияти ҳақида тезкор ва аниқ сигналлар кўрмаса, бошқа йўналишга ўтишини айтди. Сайловолди кампанияси давомида Трамп Оқ уйга қайтганидан сўнг 24 соат ичида урушни тугатишга ваъда берган эди. Президентлик лавозимига киришгач, келишувда тўсиқларга дуч келгани сабабли муддатни апрель—май ойларига кўчирди. Энди эса музокараларда тараққиёт бўлмаса, воситачилик қилмаслиги таъкидланмоқда.
Рубио юқоридаги баёнотни 17 апрель куни Парижда бўлиб ўтган Европа Иттифоқи ва Украина вакиллари билан учрашувдан сўнг эълон қилди. У суҳбат конструктив бўлганини айтди.
Ўйлайманки, Буюк Британия, Франция ва Германия бизга ишни “ўлик нуқта”дан олиб чиқиш ва уни ҳал қилишга яқинлаштиришда ёрдам бериши мумкин, деган АҚШ давлат котиби.
New York Times нашрининг ёзишича, “Трампнинг сабр косаси тўлиб бормоқда”. Париждаги музокараларда иштирок этган расмийлар келаси ҳафта Лондонда учрашишга келишиб олган. Рубио ҳам бу учрашувда қатнашиши мумкин.
Рубио 17 апрелда Россия ташқи ишлар вазири Сергей Лавров билан телефон орқали мулоқот қилди. Россия Ташқи ишлар вазирлигига кўра, Лавров “Украина инқирозининг асл сабабларини бартараф этиш учун Москва америкаликлар билан ҳамкорликни давом эттиришга тайёр”лиги билдирган.
Рубио суҳбатдошини Украина бўйича эҳтимолий келишувнинг асосий тамойиллари билан таништирган. У бу келишувни Париждаги учрашувда ҳам маълум қилган.
Трамп ва АҚШ урушнинг тугашини хоҳлайди. Барча томонларга мустаҳкам ва узоқ муддатли тинчлик лойиҳаси тақдим этилди, дейилади Оқ уй хабарида.
АҚШ президенти қарор қабул қилиш учун россиялик ҳамкасбига уч кун муҳлат берган. Трамп ҳафта охиригача ўт очишни тўхтатиш таклифи бўйича Путиннинг жавобини кутишини таъкидлаган.
Биз қотилликлар тўхтатилишини истаймиз, деган у. Axios манбаларига кўра, агар Путин апрель ойи охиригача сулҳга рози бўлмаса, АҚШ Россияга қарши янги санкциялар жорий этишга тайёр.
Изоҳ (0)