Россия президенти Владимир Путин Украина билан урушнинг асосий мақсадларига аллақачон эришилган, деб ҳисоблаб, энди Россия иқтисодиётидаги номутаносибликлардан кўпроқ ташвишланмоқда. Бу ҳақда Кремлга яқин манбалар Reuters агентлигига маълум қилди.
Путин урушнинг асосий мақсадларига, жумладан, Россиянинг материк қисмини Қрим билан боғлайдиган ҳудудларни назорат қилиш ва Украина армиясини заифлаштиришга эришилди, деб ҳисоблайди, дея манба сўзларидан иқтибос келтиради нашр.
Унинг қайд этишича, Россия президенти юқори фоиз ставкалари ҳарбий бўлмаган корхоналар ва саноатга кучли таъсир ўтказаётгани сабабли урушнинг иқтисодиётга кўрсатаётган босимини англамоқда.
Россия мудофаа харажатларини посцовет даврининг энг юқори кўрсаткичи — ялпи ички маҳсулотнинг 6,3 фоизигача оширди, бу бюджет харажатларининг учдан бир қисмини ташкил этади. Ишчи кучи етишмаслиги билан биргаликда, бу иш ҳақининг ошишига олиб келди.
Нефть, газ ва фойдали қазилмаларни экспорт қилиш билан ҳаракатланадиган Россия иқтисодиёти Украинага бостириб киргандан кейин киритилган кўплаб санкцияларга қарамай, сўнгги икки йил ичида барқарор ўсишни намойиш этди. Бироқ сўнгги ойларда ички фаоллик ишчи кучи етишмаслиги ва рекорд даражадаги ҳарбий харажатлар фонида тезлашган инфляцияга қарши курашиш учун жорий этилган юқори фоиз ставкалари туфайли кескинлашди, деб ёзади нашр.
Бундан ташқари, ҳукумат бюджет тақчиллигини қисқартириш мақсадида солиқ тушумларини оширишга интилмоқда.
Россия Марказий банки раисининг собиқ ўринбосари Олег Вюгин юқори ставкаларнинг сақланиб қолиши корхоналар ва банклар балансларига босим ўтказишини айтган. 2024 йил сентябрь ойида у Россия ҳарбий ва мудофаа харажатларини кескин оширгани сабабли иқтисодий бузилишлар кучайиши хавфини таъкидлаган эди.
Путиннинг норозилиги 16 декабрь куни кечқурун Кремлда бизнес раҳбарлари билан бўлиб ўтган учрашувда яққол кўриниб қолди. У ерда у юқори иқтисодий амалдорларни танқид қилди. Путин кредитлар нархи туфайли хусусий инвестициялар қисқарганини эшитиб, очиқдан-очиқ норози бўлди, дея маълум қилди икки манба.
Путин 19 декабрь кунги изоҳларида “ставка бўйича мувозанатли қарор”га чақирган эди. Эртаси куни пул-кредит сиёсати бўйича ўтказилган йиғилишда Марказий банк бозорнинг 200 базис пунктга ошиши кутилаётганига қарамай, ставкани 21 фоиз даражасида сақлаб қолди.
Аввалроқ АҚШ президенти Дональд Трамп агар Россия Украина билан урушни тўхтатиш тўғрисидаги битимни қабул қилмаса, Россия сотадиган барча маҳсулотларга бож, солиқ ва санкциялар жорий этишини маълум қилганди.
Трамп Россия ва Украина президентлари билан “улар хоҳлаган вақтда” учрашишга тайёрлигини таъкидлади. Бундан ташқари, у Украинадаги уруш қурбонларининг расмий сонини шубҳа остига қўйди. Трамп уруш аллақачон “миллионлаб одамларнинг” ҳаётига зомин бўлганини таъкидлади.
Америка президентининг ҳисоб-китобларига кўра, Москва 800 мингга яқин, Киев эса 600 дан 700 минггача одамни йўқотди. Трамп, шунингдек, АҚШ Украинага ёрдам бериш масаласида НАТОнинг бошқа мамлакатларига нисбатан номутаносиб юқори молиявий юкни кўтараётганини яна танқид қилди. У альянс давлатларини мудофаа харажатларини ялпи ички маҳсулотнинг 5 фоизигача оширишга чақирди.
Изоҳ (0)