АҚШ президенти Дональд Трамп Украинадаги урушни тугатиш учун россиялик ҳамкасби Владимир Путинга уч кун муҳлат берди. Бу ҳақда The Guardian хабар берди.
Трамп ҳафта охиригача ўт очишни тўхтатиш таклифи бўйича Путиннинг жавобини кутишини таъкидлади.
Уларнинг жавобини шу ҳафта эшитамиз, аслида, яқин орада. Биз қотилликлар тўхташини истаймиз, деди АҚШ раҳбари.
У бир ҳафта ичида, яъни 24 апрелгача АҚШ ва Украина ўртасида табиий ресурслар бўйича келишув имзоланиши мумкинлигини ҳам айтди. Трамп кўрсатилган ҳарбий ёрдамга жавобан Украинанинг фойдали қазилмаларидан фойдаланиш ҳуқуқини қўлга киритмоқчи. Шунга қарамасдан, Киев ҳарбий ёрдам учун АҚШга қарз тўлаши керак бўлади. Томонлар ўртасидаги минерал ресурслар бўйича музокараларда қарз миқдори 300 миллиарддан 100 миллиард долларгача камайтирилган.
Axios манбаларига кўра, агар Путин апрель ойи охиригача сулҳга рози бўлмаса, АҚШ Россияга қарши янги санкциялар жорий этишга тайёр. Аввалроқ Трамп россиялик ҳамкасбидан норози экани ва у музокаралар жараёнини атайлаб чўзаётганини айтганди. Россия сулҳга рози бўлмаса, унинг “яширин флоти”га қарши қаттиқ чекловлар қўлланиши мумкин. Трампнинг ўзи аввалроқ Россия нефтини сотиб олувчи мамлакатларга нисбатан 500 фоизгача бож жорий этиш билан таҳдид қилганди.
18 апрель куни уруш иштирокчиларининг энергия объектларига ўзаро зарбаларга мораторий тугайди ва Кремль уни узайтиришга тайёрлигини ҳали билдирмаган.
Россия томони мораторий атрофидаги вазият муносабати билан америкалик ҳамкорларга “муайян сигналларни” етказади, деган эди Путиннинг ёрдамчиси Юрий Ушаков.
Россия президенти матбуот котиби Дмитрий Песков эса АҚШ билан Украинадаги вазиятни тартибга солиш бўйича музокаралар қийинчиликларга дуч келганини айтган.
Иш анча мураккаб кетмоқда, деган у ва бунга “Киев режими” айбдор эканини даъво қилган. Кремль позициясидан хабардор The Moscow Times манбаларига кўра, Путин Украина бўйича музокараларда максималистик талабларни сақлаб қолмоқда.
♦ Украинанинг урушни тугатиш шартлари
♦ Россия шартлари
Изоҳ (0)