Украина президенти Владимир Зеленский мамлакат уч йиллик уруш мобайнида ҳеч қачон бугунгидай тинчликка яқин бўлмаганини айтди. Сиёсатчи эҳтимолий музокаралар ва Европанинг ҳарбийлар юбориш имкониятини баҳолади.
Биз курашмоқдамиз, яшамоқдамиз, тинчликка эришиш учун барча ҳаракатларни амалга оширмоқдамиз. Биз уч йиллик уруш мобайнида ҳеч қачон бугунгидай тинчликка яқин бўлмаган эдик. Биз ўз давлатимизни, мустақиллигимизни, мамлакатимизни, пойтахтимизни, кўплаб шаҳар ва қишлоқларимизни ҳимоя қилдик, деди у.
Зеленский Россия президенти Владимир Путин тинчлик музокараларини истамаслиги ва уларни бузишга ҳаракат қилишини айтди.
У Украинада урушни тугатиш имкониятидан қочиш учун турли баҳоналар ўйлаб топади — Украина билан музокаралар столида ҳам, деди президент.
Украина раҳбари музокаралардаги иштирок Путин учун мағлубиятга айланиши, у эса бундан “қўрқиши”ни қайд этди. У Россия президенти Украина билан эмас, балки Ғарб билан урушаяпман деб ўйлашини таъкидлади.
Путин ҳақиқий музокараларни истамайди. Унинг тасаввурида Россия билан Ғарб ўртасида уруш кетмоқда, Кремль эса ғалаба қозонмоқда. Бироқ Украина, барча қийинчиликларга қарамай, унинг ғалабасига йўл қўймади. АҚШ президенти Дональд Трамп унга Украинанинг музокаралар столида бўлиши зарурлигини айтганида, Кремль диктатори яна музокаралар жараёнини издан чиқариш учун Украина президентининг гўёки ноқонунийлиги ҳақидаги ҳикояга қайтади, деди Зеленский.
Украинага Европа қўшинларини юбориш
Президент Украинада хорижий ҳарбий контингентни жойлаштириш ғоясига изоҳ берар экан, бу хавфсизлик кафолатлари ҳақидаги мунозаранинг бир қисми экани, бироқ қўшин юборишнинг ўзи етарли бўлмаслигини айтди.
Бу фақат қоғоздаги рамзий мавжудлик бўлиши керак эмас, деди сиёсатчи.
Украина ушбу ҳарбий контингентнинг ваколатлари ва уни ким бошқаришини аниқ тушуниши лозим. Президентнинг айтишича, ҳақиқий хавфсизлик кафолатлари Қўшма Штатлар иштирокида кенг қамровли бўлиши зарур. Улар кучли Украина армиясини, мудофаа-саноат мажмуасига сармояларни, Америка лицензияси асосида қурол ишлаб чиқаришни ва узоқ муддатли ҳарбий кўмакни ўз ичига олиши керак.
♦ Украинанинг урушни тугатиш шартлари
Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донецк, Луганск, Херсон ва Запорожье вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.
♦ Россия шартлари
Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запорожье вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш. Зеленский бу таклифни “ишониб бўлмайдиган” ультиматум деб атади.
Изоҳ (0)