АҚШ президенти Дональд Трампнинг махсус вакили Стив Уиткофф Таcкер Карлсонга интервью берди. Суҳбат давомида у Украинадаги уруш масаласига ҳам тўхталиб, сулҳга тўсқинлик қилайтган энг катта омилни айтиб ўтди. Сиёсатчига кўра, Россия томонидан босиб олинган Қрим ва тўрт минтақа "асосий муаммо" бўлиб турибди.
Менимча, бу можародаги энг катта муаммо тўртта минтақа: Қрим, Донбасс, Луганск ва яна иккита ҳудуд (эҳтимол, Херсон ва Запорожье вилоятлари назарда тутилмоқда — таҳр.). Улар рус тилида сўзлашувчи ҳудудлар бўлиб, у ерда референдумлар (халқаро ҳамжамият уларни тан олмаган — таҳр.) бўлиб ўтган. Фикримча, бу асосий масала, деди Уиткофф.
Маслаҳатчининг даъво қилишича, босиб олинган ҳудудларда ўтказилган референдумлар гўёки аксарият аҳоли Россия таркибига киришини исташини кўрсатган.
Стив Уиткофф Украина баъзи ҳудудларидан воз кечиши борасида ҳеч ким гапиришни истамаганини айтиб, буни "хонадаги фил" га қиёслади. Яъни очиқ-ойдин кўриниб турган, аммо ҳеч ким тилга олишни истамайдиган муаммо деб атади.
Хонадаги фил – бу Украинадаги конституциявий масалалар. Яъни улар баъзи ҳудудларидан воз кеча оладими? Россия усиз ҳам бу минтақаларни де-факто назорат қилмоқда. Савол шуки, дунё уларни Москва тасарруфида деб тан оладими? Агар Украина президенти Зеленский бунга кўнса, сиёсий жиҳатдан омон қолиши мумкинми? Можародаги марказий масала шудир, дея қўшимча қилди Уиткофф.
Бироқ бу Уиткоффнинг Украина урушига оид баҳсли баёнотларининг биринчиси эмас. Трамп маслаҳатчиси аввалроқ Ғарб давлатлари етакчиларининг Россия урушни тўхтатишни истамаётгани ҳақидаги баёнотларига қўшилмаган эди. Уиткоффга кўра, яқин келажакда тинчлик келишуви имзоланиши учун "яхши тенденциялар" мавжуд.
Бундан ташқари, у Россия бутун Украинани босиб олишга интилмаётганини таъкидлаб, ҳозиргача босиб олинган вилоятлар ва Қрим Москва учун етарли эканини иддао қилган.
Изоҳ (0)