Озарбайжонлик хонанда Роза Зергерли “Истедим” таронаси билан нафақат Озарбайжонда, балки бутун МДҲ мамлакатларида машҳурликка эришди. Зергерли бугунги кунда Ўзбекистонда ўтказилаётган турли маданий тадбирлар ва тўйларнинг доимий иштирокчисига айланди. У 2025 йилнинг 14 апрелида “Халқлар дўстлиги” саройида концерт дастурини тақдим этишни режалаштирмоқда. Биргина қўшиғи орқали оламшумул машҳурликка эришган хонанданинг ҳаёт ва ижод йўли кўпчиликка қизиқ бўлса керак.
Роза Зергерли (Роза Заргар қизи Аллаҳвердиева) 1979 йили Россиянинг Тюмен вилоятида ҳарбий хизматчилар оиласида туғилган.Ёшлигидан мусиқага бўлган муҳаббати уни аввал ўрта махсус мусиқа мактабига ундан сўнг мусиқа техникумига олиб борган. Бу ерда Роза аккордеон ва фортепиано мутахассисликлари бўйича таълим олган, 2001-2008 йилларда эса Озарбайжон Маданият ва санъат университетининг оммавий тадбирларнинг режиссёрлик факультетида ўқиган ва 2015 йили “Режиссёрлик санъатининг тарихи ва назарияси” мутахассислиги бўйича магистратурани аъло баҳолар билан тугатган.
20 йиллик ижодий фаолияти давомида Роза Зергерли Мингечевир давлат драма театрида саҳналаштирувчи режиссёр бўлиб ишлаган, кўплаб спектаклларнинг бош режиссёри сифатида турли образларни яратган. Жозибали овози ва ижро маҳорати билан ажралиб турадиган артист, шунингдек, эстрада хонандаси сифатида, Озарбайжонни халқаро мусиқа фестивалларида муносиб тарзда намоён қилган.
Роза режиссёр сифатида ижодини доимо такомиллаштириб, бир қатор ҳужжатли фильмларни суратга олган. 2002 йили суратга олинган “Қорабоғнома” фильми ЮНЕСКО нинг қўллаб-қувватлаши билан Францияда ўтказилган фестивалда биринчи ўринни эгаллаган.
Актриса сифатида ҳам кўпчиликнинг эътибори марказида бўлган Роза Зергерли 2000 йилларнинг ўрталаридан бошлаб кўплаб сериалларда турли характердаги Озарбайжон аёлларининг образларини яратган. У бир неча бор фронтга бориб, аскарлар учун қизиқарли концерт дастурлари уюштирган. 20 га яқин клип ва 6 та альбом чиқарган актриса 2014 йилдан бери турли телеканалларда намойиш этиладиган “Боку вақти бўйича” дастурининг бошловчиси ва муаллифи ҳисобланади. Дастурда Озарбайжон маданият арбобларининг ҳаёти ва ижоди ёритилади.
Роза Зергерли, шунингдек, бир неча биографик романларнинг муаллифи ҳисобланади. 2018 йили “Сибир гули” номли автобиографик романи “Қайсин Кулиев” номидаги ордени билан тақдирланган. У туркий тилли халқларнинг маданий алоқаларини ривожлантиргани учун “Турксой” медали билан тақдирланган. Шунингдек, Лермонтов номидаги Ёзувчилар уюшмасининг фахрий аъзоси ва Кавказ бизнеси илмий жамоатчилик академиясининг академиги унвонига эга.
Иқтидорли педагог Роза Зергерли Боку хореография академиясининг санъат факультетида дарс беради ва докторлик даражасини олишга ҳаракат қилмоқда. У “Мустақиллик давридаги Озарбайжон театрида туркий тилли халқларнинг драматургиясини саҳналаштириш” мавзусида диссертация ёзмоқда.
У шунингдек, хайрия ишлари билан ажралиб туради. 4 фарзандидан 3 нафарини меҳрибонлик уйидан асраб олган Роза Зергерли янги лойиҳалар устида ишламоқда ва санъаткор сифатида фаолиятини давом эттирмоқда.
-wa6t2VDV.jpg)
Розанинг “Истедим” (Истадим) номли композицияси эса ҳақиқий хитга айланди ва рекордларни янгиламоқда.
Қўшиқнинг сўзлари ва мусиқаси, шунингдек, реcординг/мих мастер Элвин Гасановга, аранжировкаси Риёд Мамедовга тегишли. “Истедим” қўшиғига ишланган клип YouTubeда 5 ой ичида 56 миллион марта томоша қилинган.
Хит ҳатто жаҳон юлдузи Жан-Клод Ван Даммнинг ҳам эътиборини тортди, у ўз TikTok саҳифасида ушбу қўшиқнинг бир парчасини ўз сурати билан бирга жойлаштирди.
Изоҳ (0)