Ўзбекистонда хизмат кўрсатган артист, кўплаб хит қўшиқлар муаллифи, хонанда, бастакор Анвар Ғаниев “Дарё”га берган интервьюсида қайси қўшиқ уни машҳур қилгани, онасидан айрилиб куй ёзгани ва унга нисбатан қилинган ноҳақлик ҳақида гапирди.
— Болалигимда Ўзбекистон халқ артисти, раҳматли Шерали Жўраевнинг қўшиқларини магнитофонда йиғлаб эшитардим. Шу инсоннинг қўшиқларини тинглаб, маза қилиб, завқланиб, санъатга кириб келганман десам ҳам бўлади.
Анча йиллар аввал “Кўнгил кўчалари” номли сериал чиққанди. Шу сериал ижодкорлари сериалга саундтрек ёзиб, ўзим куйлаб беришимни сўраган. Шеър берилган, мен куйга солиб, ижро қилишим керак эди. Ўша вақтда 30 ёш эдим, шунча буюк устоз санъаткорлар турганда, менга ишониб топширилди дея, қўшиқни юракдан ижро этганман. Ўзимнинг нолаларим дард-у ҳасрат билан куйлаганим сабаб бу саундтрек сериалнинг ажралмас қисмига айланган, ҳаммага манзур бўлган. Ўша даврдан ҳозиргача қаерга борсам, шу қўшиғимни айтмасдан кетолмайман. Сабаби концерт бўладими, тўй бўладими, шуни айтиб беринг дейишади, дейди Анвар Ғаниев.
“Шу тариқа яқинларим “Шундай юраверасанми, кўзга кўринарли бирор нима қил, телевиденияга бор” деган. Телевиденияда 10-15 кишилик энг яхши қўшиқчи, шоир ва бастакорлардан иборат бадиий кенгаш бўларди. Кенгаш жуда қаттиқлиги сабаб неча йиллаб синовдан ўтолмай юрганмиз. Қўшиқчи бадиий кенгашдан ўтмаса қўшиқлари на телеканалларда, на радиода кетарди. Ҳақиқатан меҳнат қилиб, ҳаракат қилиб охири қабул қилинганман”.
— Янги ижод намуналаридан 3-4 тасини тайёрлаяпман, битиб қолган. Она ҳақида қўшиқни мендан кўп сўрашади. Аввалги интервьюларнинг бирида тўрт мисра айтгандим, шуни ҳалигача сўрашади. Қўшиқ тайёр, насиб бўлса, яқин кунларда чиқараман. Она ҳақидаги қўшиқларда бу зотга мурожаат қилинади, лекин кўплар бундай қўшиқларни ижро қилиб бера олмайди. Сабаби ёш ўтганидан кейин бошқача ижро қилинади-да. Менинг онам ҳам вафот этган, қўшиқда “Онажоним, сизни қаердан топарман?” деган кечинмаларим бор. Севги ҳақида, айрилиқ ҳақида ҳам ижод қиламан, лекин кўпроқ ҳаётий нарсаларга эътибор қаратаман. Илгари қўшиқ матнини шоирлардан олардим, Ўзбекистон халқ шоири Муҳаммад Юсуф билан ишлаганман, ҳозир ўзим ёзяпман, деди хонанда.
Ижодим давомида кўп яхши қўшиқлар айтдим, масалан, “Оҳ, севаман кўзларингни” деган қўшиғим ўз пайтида хит бўлди. Тарона Рекордс томонидан бериладиган “Йилнинг яхши қўшиқчиси”, “Энг яхши қўшиқ” деган мукофотлар бор эди. У йиллар “Оҳ, севаман кўзларингни” қўшиғим ҳам мукофотланган, лекин мукофотни биз олмаганмиз, бошқаларга берилган. Майли, Худога шукр, қўшиқларим халқимиз томонидан севиб эшитилади, мухлислари бор, дея ижодкор ўша вақтларни эслади.
— Яхши қўшиқ қиламан деганлар жуда кўп. Лекин ҳаммага манзур қиламан, маъқул қиламан деса-ю, Худодан истеъдод берилмаса, ўз-ўзидан бандасининг қўлидан келмайди. Ёшларга бир тавсиям бор: инсон самимий бўлиши ва касбини севиши керак. Ўз устида ишлаш лозим. Демоқчиман-ки, Аллоҳдан берилган истеъдод бўлмаса, санъаткор бўлолмайди. Ҳам меҳнат, сабр ва таваккал қилиш керак. Шундагина маълум бир даражага эришамиз. Инсонларга бир нарсани маъқул қилиш жуда қийин, деди ижодкор.
Изоҳ (0)