“Кўз ёшлар маликаси”, “Мен ақлдан озганман, лекин ҳаммаси жойида”, “Продюсерлар” ва бошқа драмалардаги роллари билан танилган жанубий кореялик актёр Ким Су Хён 24 ёшли актриса Ким Се Рон билан муносабатда бўлганликда ва унинг жонига қасд қилишига сабабчи бўлганликда айбланмоқда.
Актёрнинг ўтмиши ҳақида маълумотлар ёритилган янги видео эса унга нисбатан кўплаб танқид ва салбий муносабатларга сабаб бўлди. Мазкур ролик 11 март куни Гаросеро тадқиқот институтининг YouTube каналида эълон қилинди.
Видеомурожаатда 2025 йил 16 февралда вафот этган актриса Ким Се Роннинг холаси кўрсатма берди. Унинг сўзларига кўра, жияни Ким Се Ро актёр Ким Су Хён билан 15 ёшидан бошлаб 6 йил давомида — 2015 йилнинг кузидан 2021 йилгача учрашиб юрган. Бу миш-мишлар аввалроқ оммавий ахборот воситаларида пайдо бўлган эди, аммо маълумот иккала томондан рад этилган эди.
Уларнинг иккиси ҳам “Gold Medalist” агентлигининг аъзоси эди. 2022 йилда актриса маст ҳолатда машина ҳайдагани туфайли можаролар марказига тушиб қолди, шундан сўнг ўша йилнинг май ойида лейблни тарк этди. Актёр унга товон пулини тўлашда ёрдам берди, бироқ агентлик шундан сўнг яна 700 миллион вон миқдорда товон пули талаб қилди. Молиявий қийинчиликлар ва қарздорлик ҳам Ким Се Роннинг ўз жонига қасд қилишига сабаблардан бири бўлган.
Видеода журналистлар Се Роннинг тириклигида ёзган мактубларини эълон қилди, у ерда актриса ёрдамга муҳтож бўлганида Ким Су Хён билан боғланишга уринган, аммо барчаси беҳуда бўлгани ёритилган:
Шартномани узайтириш ўрнига мен молиявий мажбуриятларни ўз ичига олган янги ҳужжатни имзолашга мажбур бўлдим. Шартномани янгилаш вақти келганида агентлик ва Ким Су Хённинг ўзи билан боғланишга ҳаракат қилдим, лекин у мени назарга илмади. Сўнг менга таҳдидларга тўла юридик хабарнома келди.
Актриса кўп мартта Ким Су Хёндан ёрдам сўрамоқчи бўлган, аммо у алоқага чиқмаган. Шу сабабли Ким Се Рон ижтимоий тармоқларда собиқ қаллиғи билан бирга тушган архив суратларни жойлаштирган. Бу эса уларнинг ўтмишдаги муносабатларига биринчи далил бўлган.
Бундан аввал “Gold Medalist” агентлигининг буюртмасига кўра марҳуманинг обрўсига путур етказадиган турли мақолалар эълон қилинди, бу эса актрисанинг қадр-қимматини тушириб юборди. Обрўсизлантирувчи руҳдаги мақолаларнинг барчаси актрисага нисбатан жамоатчиликнинг салбий муносабатини келтириб чиқарди, бу эса унинг ўлимига олиб келди. Шу сабабли Ким Се Рон қариндошлари оммавий видеобаёнот беришга мажбур бўлди.
Видео эълон қилингач, нафақат Жанубий Кореядаги барча мухлислар, балки хориждаги интернет фойдаланувчилари ҳозирда Ким Су Хённи қаттиқ қораламоқда. Аммо агентлик унга тегишли барча айбловларни рад этди.
Ҳозирда Ким Су Хён нафақат Се Роннинг ўз жонига қасд қилишига сабабчи бўлганликда, балки бир неча йил аввал ўша пайтда вояга етмаган қиз билан муносабат ўрнатганликда айбланмоқда.
Фото: The Girl
Изоҳ (0)