Ўзбек актёри Абдулғофур Исахонов қандай қилиб русийзабон ёшларнинг энг севимли хонандасига айланди?(фото+видео)

«Сой қўшиғи», «Новда», «Дадам бетоб» ва «Элпарвар» каби фильмлардаги турли образлари билан томошабинларга яхши таниш Абдулғофур Исахонов ҳозирги кунда русийзабон мусиқа ихлосмандларининг севимли хонандасига айланиб улгурган. Унинг «Лоллипоп» деб номланган таронаси Yandex Music дастуридаги энг кўп тингланаётган қўшиқлар рейтингида узоқ вақт биринчи ўринни эгаллаб турди. Ушбу тарона аудиоси 2020 йилнинг июль ойида YouTube’га жойланган ҳамда ҳозирга қадар салкам 37 миллион марта томоша қилинган. Гафур сифатида танилган Абдулғофур яқинда «Калейдоскоп» номли илк альбомини мухлислар эътиборига ҳавола этди. Альбомдан ўрин олган барча қўшиқлар хит даражасига кўтарилди ҳамда мухлислар томонидан севиб тингланмоқда. Қуйида Абдулғофурнинг муваффақият йўли ҳақида ҳикоя қилинади.

1998 йил Тошкентда туғилган Абдулғофур Исахоновда болалигида совға қилинган Майкл Жексоннинг альбоми туфайли мусиқага қизиқиш пайдо бўлди. У кумирига айланган поп қироли − Майкл Жексоннинг қўшиқларини тинглаб, рақсга тушишни машқ қила бошлайди. Аммо санъатга бўлган эътибори тобора кучайиб бораётган Абдулғофурнинг ота-онаси уни тиш шифокори бўлишини хоҳлаган. Натижада уларнинг қистови билан тиббиёт коллежида 3 йил давомида таҳсил олган. Фақатгина у ўзи ёзган қўшиқни ижро қилганидан сўнг оиласининг фикри тамоман ўзгарди. Улар мусиқа ва рақсга бўлган муҳаббати туфайли тинимсиз ижод қилаётган ўғлининг фаолиятини қўллаб-қувватлашга қарор қилди.

Актёрлик фаолияти

Абдулғофур 12 ёшида «Сой қўшиғи» фильмида дебют ролини ижро этди. Ҳали ёш бўлишига қарамай ўз истеъдодини тўлалигича намоён этган жажжи актёр шу тарзда режиссёрлар назарига тушди.

Шундан сўнг бир неча реклама ва роликларда иштирок этди. Ҳаттоки ўзини телебошловчи сифатида ҳам синаб кўрди. Бора-бора санъат сирларини ўрганаётган актёр таниқли режиссёр Зулфиқор Мусоқовнинг «Новда» фильмида рол ижро этди.

Айнан шу фильм орқали халқ эътиборига тушган актёрга тарихий кинодан ҳам таклифлар тушди. «Элпарвар» фильмдаги ижроси бироз танқид остига олинган бўлса-да, актёр ўзига берилаётган эътибордан ранжимади.

Муваффақиятга қадам

Хўш, ўзбек фильмларида эндигина кўрина бошлаган ёш актёр қандай қилиб россиялик ёшларнинг севимли юлдузига айланишга улгурди? Буларнинг барчаси кутилмаганда рўй берди.

Дастлаб актёр иштирок этган «Элпарвар» фильми Москвада бўлиб ўтган «Ўзбек киноси ҳафталиги»да кейинчалик Канн тақдимотида намойиш этилди, шунингдек, Оскар мукофотига ҳам номзод бўлди. Фильм суратга олиниш жараёнида актёр барча талабларни каскадёр ёрдамисиз амалга оширди. Бу кўплаб нохуш жароҳатларга олиб келган бўлса-да, баҳо ва тажриба сақланиб қолди.

Мусиқага муҳаббат

Актёр бирор мусиқий даргоҳда таълим олмаган бўлса-да, мустақил равишда ўз устида ишлай бошлади. У cover ижроларини Instagram саҳифасига жойлашдан бошлади. У «Юлдузлар фабрикаси» гуруҳи аъзоси ҳамда cover ижроси билан шуғулланадиган Элман Зейналовни кузатиб борди.

Шунингдек, Андронинг «Олов хоним» трекини эшитиб кўрди. Композицияни ёқтириб қолган актёр уни сотиб олиш учун қўшиқ муаллифига мурожаат қилди, аммо ўша пайтда 300 обуначиси бўлган Андро битимдан бош тортди. Шу билан бирга, янги трек ёзиш ҳақида Абдулғофурга таклиф киритди. Шу тарзда хонандалар ўртасида доимий алоқа ўрнатилди, улар бир-бирининг ижод маҳсуллари билан Instagram тармоғи орқали танишиб борди.

Тез орада Абдулғофур мусиқа танловида қатнашиш учун Россияга учиб кетди. Ижодий сафар мобайнида RAAVA Music лейбли асосчилари билан танишди, лекин шунда ҳам ҳамкорлик ҳақида ҳеч қандай гап-сўз бўлмади. Ўзбекистонга қайтган Абдулғофур ижод қилишда давом этди.

Бу орада интернет оламида Егор Криднинг «Вақт келмади» номли қўшиғи Абдулғофур ижро этган ашулага ўхшашлиги туфайли баҳс-мунозаралар пайдо бўлди. Шундан сўнг Элман бўлажак хонанданинг барча ижод маҳсулини тинглаб кўрди ва Ғофурга янги қўшиқ ёзилса, уни гуруҳ аъзоси этиб олиш таклифини киритди.

Қисқа муддат ичида ёзилган «Айёр илон» қўшиғи шу тарзда дунёга келди ва гуруҳ аъзолари янги шеригини қўллаб-қувватлади. Москвага кўчиб кетган актёр ўзининг хонандалик фаолиятини шундай кутилмаган ҳолатда бошлади.

Хонанданинг таъкидлашича, RAAVA Music лейбли шунчаки оддий гуруҳ эмас, у ерда мустаҳкам дўстлик мавжуд. Жамоа чиндан ҳам бир оилага айланган. Машҳурлик ўз йўлига, аммо гуруҳда ҳамма бир-бирига ёрдам беради.

2019 йил декабрда хонанданинг «Ой» номли янги клипи намойиш этилди. Қисқа вақт ичида ярим миллион томошага эга бўлган композициянинг муваффақияти хонанданинг шахсий ҳаётини ўз ичига олганлиги билан боғлиқ. Буни унинг ўзи ҳам тан олган.

Айни дамда Россияда ижод қилаётган Абдулғофурнинг маълум қилишича, у ўз оиласини соғинган, шунингдек, уйда палов тайёрлашини ҳам таъкидлаб ўтган. Шу билан бирга, у барча ижтимоий тармоқлардан келган хабарлар ва шарҳларни жавобсиз қолдирмайди. Унинг фикрича, мухлислари унинг мусиқалари ҳақидаги таассуротларни ёзишдан тортинмаслиги керак.

«Лоллипоп» таронасига ишланган клипдаги Гафур ва Jony’нинг рақслари ёшлар ўртасида оммалашди. Ушбу ҳаракатлар айниқса TikTok ижтимоий тармоғида челленжга айланди.

Хонанданинг россиялик мухлислари қандай қарши олишига гувоҳ бўлинг.