Озода Нурсаидованинг “Дилбарим” клипи съёмкасида машина уриб кетган актриса Сабрина Жабборова омманинг назарида эканлиги ҳеч кимга сир эмас. Унинг мурожаатида режиссёр сифатида тилга олинган Шуҳрат Мавлонов “Дарё”га берган интервьюсида воқеа қандай рўй бергани ва вояга етмаган қизни ким машина рулига ўтқизгани ҳақида гапирди.
— Шунча кун андиша қилдим, аммо бу менга қимматга тушди. Аҳад Қаюмга бир неча марта оммага ростини айтгин, дедим. Аммо у индамади ва саёҳатга кетди. Шу боис ҳаммасини ўзим айтишга қарор қилдим.
Суратга олиш майдончасида авария бўлгани рост, аммо баъзи туҳматлар ҳам бўлди. Тарқалган маълумотларда мени клип режиссёри деб ёзишибди, аммо мен у клипда оператор вазифасини бажарганман. Қайси актриса суратга тушади ва эпизодларни кимлар ижро этиши менга номаълум бўлган. Вазифам жараённи суратга олиб бериш бўлган. Клип режиссёри Дониёр Ражабов бўлган, икки кун ўзи съёмкага келди, аммо учинчи кун тўйи бўлганлиги учун қатнашолмади. “Сиз бўлмасангиз иш кўнгилдагидек бўлмайди”, десам ёрдамчиси бориб, сценарийни ўқиб туришини айтди. Айнан шу куни авария билан боғлиқ фожиа юз берди, дейди Шуҳрат Мавлонов.
Озода Нурсаидова бош рол ижро этишининг машина бошқариши билан боғлиқ саҳна сценарийда бўлмагани ҳақида гапирганди. Шуҳрат Мавлонов эса бу гапни инкор этди.
— Балки сценарий ўзгаргандир, аммо бундан хабарим йўқ. Билганим, у эпизодни менга ёрдамчи режиссёр ўқиб берган. Суратга олиш ишлари бошланишидан аввал биз маслаҳатлашиб турганимизда Аҳад Қаюм машина рулида бўлган актриса Севинч Маъруфовна билан инстаграм учун видеолар олди. Қиз машинани бошқарди. Буни мендан ташқари, бошқалар ҳам кўрди. Суратга олиш ишлари бошлаганидан кейин қизнинг машина ҳайдолмаслигини билдим ва “яшириб оламиз, қиз машинани ҳайдамай, ундан тушиб келса ҳам бўлади”, дедим. Аммо Аҳад қиз бемалол машина ҳайдай олишини ва у билан вилоятларга борганда ҳам бошқарганини айтди. Гапига ишониб, машинанинг институт ҳудудига кириб келиш саҳнасини 10 тадан кўп дубль олдик. Аммо фожиа содир бўлганидан кейин Аҳад унинг вояга етмагани айтяпти. Нима қилишимни билмай қолдим, Аҳад менга “ҳавотир олманг ҳаммаси яхши бўлади. Мен рулда эдим, дейман”, деди. Хуллас, ҳаммаси бир неча сонияда содир бўлди. Севинч нега рулни бошқаролмаганини ҳам, Сабрина нега машина олдида пайдо бўлиб қолганини ҳам тушунмай қолдик, дейди Шуҳрат Мавлонов.
Шуҳрат Мавлонов жабрланувчи Сабрина Жабборованинг машина уриб юборгандан кейинги ҳолатини қуйидагича эслади.
— Мен камерани бошқа ракурсга қўйиб, тасвирга олаётгандим. Бақир-чақир бошланди ва ортимга ўгирилсам, бир йигит дод солаётганди. Мен уни машина уриб юборибди деб тушунибман. Сабрина ерда ётарди, олдига бордим ва ҳозир тез ёрдам келишини айтдим. У оёқлари оғриётганини айтиб йиғларди. Биринчи ёрдам кўрсатилди, ундан кейин касалхонага олиб кетишди. Олти соатлик операция давомида суратга олиш ишлари тўхтатилиб турди. Операциядан чиққанини эшитгандан кейин қолган кичик эпизодни суратга олдик. Мурожаатда айтилганидек, у эътиборсиз қолиб кетгани ва кўп қон йўқотгани йўқ, дейди Шуҳрат Мавлонов.
Шуҳрат Мавлонов одамларнинг гап-сўзлари оғир ботгани ва эмоцияда жабрланувчи ҳақидаги гапирган гапларидан афсусланиши ҳақида гапирди.
— Бу ишда Озода Нурсаидованинг айби йўқ. У ҳақиқатан суратга олиш майдончасига келмаганди. 20 йиллик фаолиятим давомида мен ҳам бундай вазиятга илк марта тушдим. Сабринага ҳам қийин, ҳеч қачон унга осон тутмайман. Уни имкон борича қўллаб-қувватлашга ҳаракат қилдик. Шахсан мен ўзим уч марта касалхонага кўргани бордим, мириқиб суҳбатлашдим. Кўнгли очиқ қиз экан. Аммо орада қўнғироқ қилганимда онаси қаттиқ жеркиб берди, шундай кейин қайта телефон қилмадим.
Мурожаат тарқалган пайтда мени режиссёр ва “Газни бос” деб машина бошқарган қизга буйруқ берган шахс сифатида кўрсатишгандан кейин қаттиқ ранжидим. Эмоцияга берилиб, мен ҳам видеомурожаатда иштирок этибман. Ҳозир шулардан афсусланаман.
Терговчилар ишни ўрганишаётганда, ўша ҳудуддаги кузатув камераларини ҳам назардан четда қолдирмасликларини сўрайман. Бундан ташқари, ўша ерда бўлган ҳаммани сўроқ қилишларини истайман, дейди Шуҳрат Мавлонов.
Видеони тўлиқ ҳолда YouTubeдаги “Дарё лифестайле” каналида томоша қилишингиз мумкин.
Изоҳ (0)