Ханна 26 ёшда: Бозордаги сотувчи қиз қандай қилиб машҳур блогер ва тадбиркорга айланди?

“Фитна”, “Саодат” каби сериаллардаги роли билан томошабинларга яхши таниш бўлган актриса Хонзода Қамбарова 12 март куни 26 ёшни қаршилади. Хўш, актриса, блогер ва омадли бизнес эгаси бўлган Хонзода Қамбарованинг муваффақият сири нимада? Келинг, қуйида бу каби саволларга жавоб излаймиз.

“Болалигим ҳавас қилгудек ўтмаган”

 Хонзода Қамбарова санъатдан бутунлай йироқ бўлган оилада кенжа фарзанд бўлиб дунёга келган. Унинг опаси ва акаси бор.

— Ҳаёт инсонни тарбиялаш билан бирга феъл-атворига ҳам ўз таъсирини ўтказар экан. Болалигимда уятчан, ювошгина қиз бўлганман. Афсуски, оиламиздаги моддий қийинчиликлар сабаб, болалик гаштини ҳам ҳис қилолмаганман.

Мен туғилмасимдан аввал дадам тадбиркорлик билан шуғулланиб, Ўзбекистонда “Волга” автомобили сотиш билан шуғулланган экан. Опам ва акамнинг болалиги асилзодалар сингари ўтган. Мен туғилгач, дадамнинг иши чаппасига кетиб, касодга учраган. Хуллас, молиявий қийинчиликлар сабаб болалигим ҳавас қилгудек ўтмаган.

7 ёшимдан бошлаб сут, қатиқ сотиб, мустақил пул топишни бошлаганман. Актриса бўлгунга қадар ширинлик, хўжалик совуни ва кийим-кечак ҳам сотиб кўрганман, дейди актриса.

“Санъаткор бўлсанг оёғингни уриб синдираман”

Хонзода Қамбарованинг санъаткор бўлишига биринчилардан бўлиб отаси қаршилик қилади. Аммо онасининг қўллаб-қувватлаши сабаб у бошқаларга айтмай санъат коллежига ўқишга топширади.

— Онам санъатга қизиққан бўлса-да, дадам бу соҳани танлашимни истамаган. Ҳатто мактабни битиришим арафасида “Санъат коллежига ҳужжат топширсанг, оёғингни синдираман. Бир умр уйда ўтирасан”, деб огоҳлантирган. Мактаб шаҳодатномасини олгач, онамга қўнғироқ қилиб, “Қайси коллежга ҳужжат топширай?”, деб сўраганман. “Билмадим, кўнглинг нима деса, шуни қил”, деб гўшакни қўйган. Онамнинг бу гапи куч бағишлаб, Тошкент маданият коллежига ҳужжат топширганман. Рости, кириш имтиҳонларига умуман тайёргарлик кўрмаганман. Шунинг учунми, менинг ўқишга киришимга ҳеч ким ишонмаган. Имтиҳонга киришдан аввал интернет орқали монолог нима эканлигини ўқиб олганман. Ижодий имтиҳондан юқори балл олиб, драма актёрлиги бўлимига ўқишга қабул қилинганимда ҳамма шокка тушган. Аммо бу бўлимда ўқиш насиб этмади. Боиси драма актёрлиги бўлимидаги машғулотлар шомга қадар давом этар экан. Афсуски, оилавий шароит сабаб узоқ вақт ўқишда қололмасдим. Чунки дадамнинг ишлари юришмай қолгач, ҳаммамиз ишлашга мажбур бўлганмиз.

Онам “Абу Сахий” бозоридаги сотувчиларга дўконма-дўкон юриб, косметика сотарди. Акам ўқишдан кейин ярим кечга қадар чойхонада ишларди. Мен эса овқат қилиш ва онамга ёрдамлашишга масъул эдим. Онам билан оғир халталарни кўтариб, ҳар бир дўконга кириб “Косметика олинглар, насияга ҳам берамиз”, деб чиқардик. Хуллас, кечгача ўқиш менга тўғри келмасди. Шунда кимдир анъанавий хонандалик бўлимида ўқишни тавсия қилган. Чунки уларда дарс тушдан кейин тугар экан. Ана шу жиҳати маъқул бўлгани учун драма актёрлиги бўлимида ўқишдан воз кечганман. Аммо у пайтда мақом қўшиқлар бўйича ўқиш хаёлимга ҳам келмаганди, дейди актриса ва блогер Хонзода Қамбарова.

 “Тўйларда 50 минг сўм эвазига хонандалик қилардим”

Хонзода тўйларга чиқиб пул топишга мажбур бўлгани ва баъзи пайтлари бундан афсусланиши ҳақида айтиб ўтди.

— Коллежнинг биринчи курсида ўқиётганимизда устозларимиз тўйга олиб чиқишган. Адашмасам, ўшанда 50 минг сўм пул беришганди. Мана шундан кейин тўйларга чиқиб, бек-вокал хонандаси сифатида ишлаб, пул топишим мумкинлигини тушунганман. Ижарага кўйлак олиб, тўйларга чиқишга қарор қилганман. Чунки ўша пайтда онам кун бўйи ишлаб 50 минг, акам 30 минг топса, мен битта тўйдан 150 минг сўм ҳақ олардим. Рўзғоримиз яхшиланаётганидан оила аъзоларим ҳам қувонган. Аммо мен баъзида бундан афсусланаман. Чунки ўқувчилик йилларимнинг энг ширин пайтлари тўйдан тўйга югуриш билан ўтган. Аммо тўйнинг ҳам яхши томонлари бор. Жуда кўплаб машҳур санъаткорлар ҳам тўй хизматлари сабоғини олиб, машҳурлик чўққисига етган, дейди Хонзода Қамбарова.

 “18 ёшимда машина сотиб олганман”

Актриса тўйлардан олган даромадини тўплаб, илк машинасини сотиб олгани ҳақида ҳам эслаб ўтди.

— 17 ёшимдан бошлаб, жамоа бўлиб тўй-тантаналарда иштирок этардик. Бир йил давомида ишлаб топган пулимни йиғиб, машина олишга қарор қилганман. Чунки машина оиламиз учун жуда керак эди. 18 ёшимда ўзимга Spark сотиб олганман. Ундан кейин тўйимни ўтказганман, дейди блогер Хонзода Қамбарова.

 “Оилали бўлгач режаларим ўзгарди”

Кино ва сериаллардаги роллари билан санъат оламига кириб келган Хонзода Қамбарова келинлик уйидаги қаршиликлар сабаб, вайнер бўлишга мажбур бўлгани ҳақида гапирди.

— 2014 йили “Мен ёлғончиман” номли фильмда суратга тушганман. Бу ҳаётимда туб бурилиш ясаган. 2017 йили Зарина Низомиддинова билан “Саодат” сериалида суратга тушиб, бир миллион сўм гонорар олганман. Ундан кейин “Браво” кулги жамоасига таклиф этилганман. 2019 йили жамоа билан катта саҳнага чиқиш бахтига муяссар бўлдим. Афсуски, куз ойида турмушга чиққанимдан кейин ижодий режаларим ўзгарди. Келинларнинг съёмкаларга бориши мумкин эмаслигини айтишгач, уйда вайнерлик фаолиятимни ривожлантиришга эътибор қаратдим, дейди актриса.

“Турмуш ўртоғимнинг оиласига актрисалигим ёқмади”

Шу кунгача кўплаб оилавий муаммоларга учраган актриса нега турмуш ўртоғини танлагани ва оилавий низоларни қандай енгиб ўтганини очиқлади.

— Аввалдан оила учун санъатни ташлайман, деган фикр бўлмаган. Чунки мен болалигимдан карьера ва оиласига бирдек эътибор берадиган аёлларни ҳурмат қилганман. Турмуш ўртоғим узоқ йил Россияда яшагани ва фикрлаш доираси европача бўлгани учун уни танлагандим. Аммо оиласи соф ўзбекона бўлгани учун ўртамизда баъзи тушунмовчиликлар бўлди. Яъни уларга санъаткор эканим ва вайнлар суратга олишим ёқмади. Санъатни танлаб, киносъёмкаларда иштирок этмаслигим мумкин. Аммо севимли ишим билан шуғулланишимга рухсат беришларини истагандим. Чунки аёл киши ҳам оиласи ва фарзандидан ортиб, ўзи учун ҳам яшаши керак-ку.

Мен бойликка учган ёки карьера учун оилани бир четга сурган инсон эмасман. Агар шундай бўлганида бадавлат инсон билан танишиб, оила қуришни ҳам ортга суриб юрган бўлардим. Аммо бундай яшаш менга тўғри келмайди.

Низолар ҳатто судга ажрим беришгача бориб тақалди, мен у инсондан алоҳида ҳам яшадим. Аммо кейин ўтириб ҳаммасини очиқчасига гаплашиб олдик. Бир-биримиз нима исташимизни билдик, кейин ҳаммасини бошидан бошладик, дейди Хонзода Қамбарова.

“Яхши ролни сотиб олса ҳам бўлади”

Актриса нега сериалларда суратга тушмаётгани ҳақидаги саволга қуйидагича жавоб берди.

— Сериал ва киноларда кам суратга тушаётганимнинг иккита сабаби бор. Яхши сценарийлар деярли йўқ, баъзан нима ҳақида сериал суратга олишаётганини ҳам билишмайди. Кейин сериал гонорари жуда кам. Бир неча ой суратга олинадиган сериалда 10-15 миллион сўм гонорар берамиз, дейишади. Аммо мен Instagram’даги битта реклама постини 1000 АҚШ долларига жойлайман. Шу боис, деярли рол ижро этишни истамаяпман. Кейин баъзи машҳур актрисалар пул бериб бўлса ҳам яхши ролларни сотиб олишяпти. Мен ҳам шундай қилсам бўлади, аммо “жиз” этадиган сценарий йўқ. Яхши рол бўлса гонорарсиз ҳам суратга тушишга тайёрман, аммо ҳозирча бунақаси учрамаяпти.

“Аристократларни нега танлагансиз?

Илк ижодини “Браво” кулги жамоасида бошлаган актриса кейинчалик нима учун “Аристократлар” жамоаси йигитлар билан ижод қилаётгани ҳақида айтиб ўтди.

— Жаҳонгир билан аввалдан танишмиз. Бир-икки марта “Аристократлар” кўрсатувига меҳмон сифатида чақиришгандан кейин “Жамоага қабул қиласизларми, шунчаки иштирок этиб юравермайман-ку?”, дедим. Бўлмаса, Отабек Мирзахолов билан гаплашиб, яна “Браво” жамоасида иштирок этаман, деб режалаштиргандим. Чунки “Браво” жамоасининг 2019 йилги концерт дастурида иштирок этиб, тажриба орттирганман. Жаҳонгир Хўжаев “Агар бизнинг жамоада иштирок этсангиз, бошқа концертларда иштирок этолмайсиз”, деди.

Шундан кейин “Аристократ”лар жамоасини танладим. Аммо ҳали “ярқ” этиб кўзга кўринадиган рол ижро этганим йўқ. Чунки жамоа катта рол беришдан аввал мени синаши, феъл-атворимни ўрганиши керак. Жамоа аъзолари келаётган йил бошида концерт беришни режалаштирмоқда. Агар соғлигим кўтарса, концертда иштирок этаман, дейди Хонзода Қамбарова.

“Instagramъдан кўпроқ пул топаман”

Бугунги кунда блогер ва вайнерлик энг даромадли соҳалардан бири ҳисобланади. Актрисаликдан кетиб бор эътиборини Instagramъга қаратаётган Хонзода Қамбарова қанча даромад топади?

— Ҳозирги кунда барча даромадим Instagram’дан деёлмайман чунки гўзаллик салонинг ва келин кўйлаклари ижараси билан ҳам шуғулланаман. 18 ёшимда ўз кучим билан Spark олиб, 23 ёшимда эса Captiva харид қилдим. Ундан кейин уй, машина, хусусий бизнес. Шундан даромадим ҳақида билиб олсангиз бўлади. Ҳозир ҳам рекламалар кўп келади, аммо аввалгидек ижодий видеолар олишга вақтим йўқ. Учта бола билан ҳеч нарсага улгуролмайман, дейди Хонзода Қамбарова.