Ўрни билинаётган Ҳалима, саҳнадаги баҳор нафаси ва махсус гримхона: Юлдуз Усмонованинг янги концертидан репортаж (видео)

Февраль ойи Юлдуз Усмонованинг мухлислари учун ҳақиқий байрам. Сабаби Ўзбекистон, Қорақалпоғистон ва Тожикистон халқ артисти 8 февралдан 27 февралга қадар 20 кунлик концерт дастурини мухлислари эътиборига ҳавола қилмоқда. “Дарё” жамоаси концертнинг илк кунига ташриф буюриб, энг қизиқарли ва қайноқ жараёнларни тасвирга олди.

Концертга Сирдарё, Самарқанд, Жиззах, Қашқадарё, Қўқон ва бошқа вилоятлардан, қолаверса, қўшни давлатлар Қозоғистон ва Қирғизистондан, Россиянинг Москва шаҳридан келган меҳмонлар ҳам бўлди.

Қиш бўлишига қарамай, Юлдуз Усмонова ҳар йилгидек саҳнада баҳор кайфиятини барчага ҳис эттирди. Саҳна безакларидан тортиб хонанданинг либосларигача гуллар билан безалди.

Тўрт мингдан зиёд томошабинни ўз бағрига сиғдира оладиган санъат саройида бирорта ҳам бўш ўриндиқ қолмади — бу мухлислари хонандани қанчалик севишидан дарак.

“Халқлар дўстлиги”нинг гримхоналари эса Юлдуз Усмонова учун буткул ўзгартирилди. Хонанда стилистининг айтишича, улар барча иш қуроллари билан санъат саройига 20 кунга “кўчиб келишган”.

Юлдуз Усмонова саҳнада мухлислари билан гаплашаётганда кутилмаганда Ботир Қодиров парда ортидан чиқиб, “санъатдаги онаси”га гуллар тақдим этди ва хонандани навбатдаги концерт билан табриклади.

— Бугун саҳнада бирга куйламаймиз. Саҳна ортида қандай ёрдам керак бўлса, қўллаб-қувватлаб турамиз. Аввалги концертларда дуэт куйлаганмиз, лекин ҳали алоҳида клип ишланмади.

Бу йил “Халқлар дўстлиги”да концерт қўймайман, бошқа нарсани режа қилганмиз, мухлислар учун ҳам совға бўлади. Зўр TV биносида рамазон ойида бир тадбир қилишни режалаштирдик. Жойлар чегараланган бўлади, сабаби у ердаги жой катта эмас. Уни ҳам концерт деса бўлаверади. Кейинчалик насиб қилган пайтда “Халқлар дўстлиги”да ҳам концерт бераман, дейди Ботир Қодиров.

Хонанда анъанага содиқ қолган ҳолда навбатдаги концертида ҳам сўз устаси Шукрулло Исроиловга бошловчилик вазифасини ишониб топширди.

— Бугун синов куни, бошланиши ёмон эмас. Доимгидек хушчақчақ, соғинган мухлислар йиғилган. Ўтган йили ҳам шу ерда кўришгандик, бирпасда бир йил ўтиб кетибди, деб мухлисларга ҳам айтдим. Юлдуз ҳақида узоқ гапиришнинг ҳожати йўқ, у кимлигини исботлаб қўйган аёл. Бу аёлда “Дюрасел” батареяси бор, “Қаримагин” ва “Чарчамагин” деган иккита таблетка ичиб юради, деб ҳазиллашаман, дейди сўз устаси.

Шукрулло Исроилов концертнинг иккинчи режиссёри Ҳалима Ибрагимова йўқлиги ҳақида ҳам гапириб ўтди.

— Ҳалиманинг жойи жаннатдан бўлсин, уни саҳнага биринчи бўлиб ўзим олиб чиққанман. Ўзига яраша бир олам қиз эди. Ҳеч ким бировнинг ўрнини босолмайди, албатта, ўрни билиняпти. Унинг ўзига яраша “бақир-чақир”и бор эди, Юлдуз Усмонова ҳам унга ўрганиб қолганди, она-бола бўлиб кетишганди. Яқинларига Аллоҳ сабр берсин, дейди қизиқчи.

Концерт сўнгида хонанда Малик билан куйланган “Ёр биё” ҳамда тожикча қўшиқлар барчани оёққа турғазди. Ёш-у қари бирдек рақсга тушди.

“Муҳаббат” рақс мактаби устози, раққоса Муҳаббат Қурбонова шогирдлари бу йил илк бор бундай катта масштабдаги концертда иштирок этаётганидан фахрланиб, кучли ҳаяжондалигини ҳам айтди.