“Оқ атиргуллар” қўшиғи билан элга танилган Умида Мирҳамидова 2 март санасида 51 ёшни қарши олди. Ушбу сана муносабати билан ижодкор ҳақида кўпчилик билмайдиган қизиқарли маълумотларни эътиборингизга ҳавола этамиз.
Хонанда Умида Мирҳамидова Паркент туманининг Чангчи қишлоғида санъаткор Мирсобит Мирҳамидов оиласида таваллуд топган. Оила боши санъаткор бўлса-да, у қизининг бу соҳанинг этагидан тутишини истамади.
— Болалигим жуда гўзал ўтган. Тўнғич фарзанд бўлганим учун онамнинг дастёри эдим. 3-4 синфда ўқиб юрган пайтимдаёқ чақалоқни қандай йўргаклаш, ухлатишни яхши билардим. Санъатга қизиққаним учун туман ижодиёт марказидаги тўгаракларга қатнардим. 1989 йили мактабни тамомлаб, санъат бўйича ўқийман деганимда дадам жиддий қаршилик қилган. Қишлоғимиз тоғлар орасида жойлашгани учун шу ерларда номим чиқмай қолиб кетаманми деб, хат ёзиб уйдан кетганман, дейди хонанда Умида Мирҳамидова.
У ота-онасига хат ёзиб, автобусга ўтириб, Тошкентда яшайдиган холасининг уйига келмоқчи бўлгани аммо йўлдан адашиб қолгани ҳақида кулиб эслайди.
— Тошкент ҳақида умуман тасаввурим йўқ эди. Қишлоқдек бир жой бўлса керак, ҳамма бир-бирини танийди деб ўйлабман. Холамнинг Қўйлиқда яшашини биламан холос. Гўёки шу ерга келиб холамнинг номини айтсам биров уйини кўрсатиб юборади, деб ўйлаганман. Аммо Тошкентга келиб адашиб қолганман ва бир аёл менга йўлни кўрсатиб юборишини айтиб Паркентга кетадиган автобусга яна ўтирганман. Аммо унгача кеч тушган, ота-онам шўрлик мени анча вақтдан бери излашаётган экан. Мана шу воқеадан кейин қиз болага қанчалар қийинлигини ва унинг ҳар бир қадами ота-онага маломат ёғдиришини тушуниб етганман. Чунки маҳалла-кўй орасида “Қадами ўзгариб қолганди, айнибди, қочиб кетибди”, деган гаплар тарқалган.
Мана шу воқеадан кейин Мирсобит Мирҳамидов қизидаги санъатга бўлган иштиёқнинг қатъийлигини билиб, пойтахтдаги Юнус Ражабий номидаги мусиқа билим юртига ўқишга киришига рози бўлади. 1991 йили билим юртини тамомлаб, Муқимий театрига хор ижрочиси бўлиб ишга киради. Бу ерда Зулайҳо Бойхонова билан танишиб, ундан қўшиқ айтиш сирларини ўрганади.
— Тўй хизматларига кўп таклиф этишарди. Насиба Абдуллаева ва Юлдуз Усмонованинг қўшиқларини худди улардек айтишга ҳаракат қилардим. Табиийки, ижром бошқаларга ҳам ёқарди. Бир куни тўйда раҳматли Муҳриддин Ҳолиқов мени кузатиб турган экан. Ёнимга келиб “Умида, ижронгиз жуда яхши. Наҳотки, ўз муаллифлик қўшиғингиз бўлишини истамайсиз?” деган. Ўйлаб қарасам ҳақиқатан ҳам 7 йил мобайнида бирорта муаллифлик қўшиғимни чиқармаган эканман. Ана шу гапдан кейин “Сайранг булбулим” номли қўшиқни ижро этганман. Қўшиқ халқ орасида танилишимга сабабчи бўлган, дейди хонанда.
У пайтлари аёл хонандаларга совчи қўядиган инсонлар камдан-кам эди. Аммо Умида Мирҳамидовани бир аёл ёқтириб ўғлига келин қилмоқчи бўлади.
— Турмушга чиққанимда 23 ёшда эдим. Қайнонам билан жуда илиқ муносабатда эдик. Катта оиланинг еттинчи келини бўлганман. Ярим кечаси тўйдан қайтиб, эрталаб кўзимни очолмасдим. Қайнонам эса эрта туриб, худди мен супургандек ҳовли ва кўчаларни тозалаб қўярди. Айбимни яширишга ҳаракат қилишини дилдан ҳис қилардим. Ниҳоятда самимий, кўнгли тоза аёл эди. Аммо турмушимиз узоққа чўзилмади. Ўғлим туғилгач, турмуш ўртоғим билан муносабатларимиз узоққа боролмаслигини тушундим, дейди хонанда.
Умида Мирҳамидова собиқ турмуш ўртоғи ниҳоятда ғурурли бўлгани ва санъат ёки оилани танлаш шарт қўйилганида у карьерасини танлаганини қуйидагича изоҳлайди.
— Мен санъатдан осонликча воз кечиб кетолмасдим. Санъатда ўз ўрнимни топишни чин дилдан истардим. Бу вазиятда турмуш ўртоғимга ҳам осон бўлмаган. Чунки ҳамма ҳам аёлнинг санъаткор эканлигини тўғри тушунмасди. Мендан яхши аёл чиқмаслиги ҳам аниқ эди. Биз келишган ҳолда ажрашганмиз. Аммо бу қароримдан умуман афсусланмаганман. Ўғлим туғилиши керак бўлган, биз оила қурганмиз. Агар у инсонда менга нисбатан ишонч бўлганида ажрашмаган бўлардик, дейди хонанда Умида Мирҳамидова.
Ўзбекистонда хизмат кўрсатган артист Умида Мирҳамидованинг “Оқ атиргуллар” қўшиғи ҳамон ўз мухлисларига эга, десак муболаға бўлмайди. Қўшиқ премераси 2000 йилда ўтказилган. Орадан шунча йил ўтган бўлишига қарамай, қўшиқ ҳамон мухлислар эътиборида.
— Бу қўшиқни ижро этишни истамаганман, ҳатто ғояси икки йилгача шкафдаги керакcиз қоғозлар сақланадиган қутичада ётган. Ўзим хушламай ижро этган қўшиқ кутилмаганда муваффақиятга эришди. Рости, уни тўйларда ижро этишга хижолат бўламан. Висол оқшомида айрилиқ ҳақида куйлаш бир оз ноқулай. Аммо халқимизга бу қўшиқ ёқади ва уни бир неча бор қайта-қайта тинглашдан ҳам бош тортишмайди, дейди хонанда Умида Мирҳамидова.
Бу қўшиқ Умида Мирҳамидованинг хит таронасига айланади. 1994 йилда ижро этган “Эй нозанин”, 2000 йилда ижро этган “Оқ атир гуллар” қўшиқлари ҳам хонанданинг хит тароналар поғонасидан жой олади. Ҳозирги кунгача хонанданинг бир нечта мусиқий тўпламлари мухлислар эътиборига ҳавола этилган. 1999 йилда эса Умида Мирҳамидова “Халқлар дўстлиги” санъат саройида “Меҳмоним бўлинг” деб номланган концерт дастурини ўз мухлисларига ҳавола этади.
Умида Мирҳамидова бир неча фильмларда комик ролларни ижро этган, ҳатто қизиқчилар билан кўплаб саҳна кўринишларида ҳам иштирок этган.
— Актрисаликка даъвом йўқ, шунчаки табиатан ҳазил-мутойибага мойиллигим бор. Қариндошларим орасида сўзга чечан аёллар кўп, балки шу учун тилим бурродир. Аммо ролларим ўзимга умуман ёқмайди, дейди Умида Мирҳамидова.
Хонанда турмуш ўртоғи билан ажрашгач оила қурмади. У ўғли Ҳамидуллони ёлғиз тарбиялашни истади. Ҳамидулло Сайфуллаев айни кунда ҳисобчилик соҳасида таҳсил олади. У онаси каби санъаткор эмас балки банк ходими бўлишни афзал кўрди.
— Ўғлимга отасининг ёнимизда эмаслигини билдирмаслик учун ҳар нарсага тайёрман. Ҳаётда унга отадек бўлолдим, керак пайтида моддий жиҳатдан қўллаб-қувватладим. Аммо она бўлиб ҳар доим ҳам ёнида бўлолмадим. Ўғлим ҳеч қачон “Отам нега биз билан эмас”, деган саволни бермади. Аксинча, ҳамиша мени тушунди, дейди хонанда.
Умида Мирҳамидовани кўпчилик Ўзбекистонда хизмат кўрсатган артист деб билади. Аммо у 31 йиллик меҳнати давомида бирорта мукофотни қўлга киритмаган. Хонанда бундан ўксинмаслиги, муҳими халқ орасида яшаётган қўшиқлари борлигини айтади.
Хонанданинг уйи билан боғлиқ қизиқарли ҳикояси
Умида Мирҳамидова интервьюларидан бирида пул зарурлиги учун сотган севимли уйини йиллар ўтиб яна қайтариб сотиб олгани ҳақида айтиб берган.
— Ҳозирги уйимни биринчи топган пулларимга сотиб олганман. Ўша йиллари оиламизнинг бошига мушкул иш тушиб, орада укамнинг ҳам қаттиқ мазаси бўлмай қолди. Шундай вазиятда мана шу хонадонимни сотиб, қўлимда қолган озгина пулга бошқа жойдан 2 хонали уй олиб чиқиб кетганман.
Бу хонадон сотилишидан аввал ўша “Оқ атиргуллар” қўшиғимизнинг клипида ишлатилган жуда чиройли сунъий атиргуллар бўларди. Гулларни чиройли идишга солиб, йўлакка қўйиб қўйгандик. Уйга келган ҳамма меҳмонларнинг кўзи биринчи ўша гулларга тушарди. “Вой, ўша клипдаги гуллар-ку”, дейишарди. Уйни сотганимда ҳамма нарса чиқиб кетган. Ҳамма нарсани тарқатворганман.
8 йил давомида Юнусобод туманида яшаб келдик. Бу уйимга қайтиб келишим мўжиза бўлган. Ҳалигача ҳайратланиб гапираман. Ўшанда уйни сотганимда мен йўлакда туриб, уйим билан хайрлашганман, “мен сени ташлаб кетмоқчи эмасдим, мендан хафа бўлма, мен, албатта, қайтиб келаман”, деб йиғлаганман. Бир ой ичида сотилиб кетган бўлса, шу вақт ичида мана шу уй кўкариб кетган. Хафа бўлганиданми, шу уйнинг энергияси тугаб қолганиданми, билмадим.
Бир ой ичида кўчиб чиқиб кетдик, лекин уйимни соғиниб 8 йил йиғладим. Қўшниларим билан жуда ҳам иноқ эдик. Шу йиллар ичида уч марта уйнинг эгаси алмашди. Бошқа уй олиш учун ҳаракатда юрган пайтимизда қўшниларимдан қўнғироқ бўлди: “Умида, уйингиз сотиляпти”, дейишди. Шунақанги югуриб келиб, 10 дақиқа ичида ишимиз ҳал бўлди. 15 кундан кейин уйимга қайтиб кўчиб кирдим. Қандай йиғлаб чиқиб кетган бўлсам, шундай йиғлаб қайтиб келдим. “Уйим, ассалому алайкум, мен қайтиб келдим, ишонганмидинг қайтишимга?”, деб яна йиғладим. Мана ҳозир севимли уйимда яшаётганимга 3 йил бўлди, дейди хонанда.
Нью Йоркдан келин олган
Умида Мирҳамидова 2024 йилнинг 8 августида ёлғиз фарзанди Ҳамидуллани уйлантирди. Хонанда интервьюларидан бирида келини Америкада туғилиб-ўсгани ҳақида айтиб берган.
—Тўй қилганга 40 йил тегма, деган гап бекорга айтилмаган экан. Чунки югур-югурларга нафақат пул, балки соғлиқ ҳам кетиб қолар экан. Жуда чарчар экансиз. Мен ўзимга келишим учун 2 ой вақт керак бўлди. Тўғрисини айтсам ўзимни қайнонадек ҳис этмаяпман ҳали. Баъзилар, “ҳали вақт бор, озгина вақт ўцин бошланади ҳаммаси”, дейди. Ҳамма нарсанинг бошланиши гўзал бўлади, ишқилиб охиридан суюнтирсин. Келиним мени телевизорда қаттиққўл қайнона образида кўп кўргани учун ҳаётда ҳам шунақа деб ўйлаган экан. “Онажон, мен сизни қўлига елпиғичлар олиб ўтирадиган қайнона бўлсангиз керак, деб ўйлагандим”, деди.
Келиним Ўзбекистондан эмас. У АҚШнинг Нью Йорк шаҳрида туғилиб ўсган. Қудаларим билан узоқ йиллардан бери танишмиз. Ҳеч қачон узоқ юртдан келиб қиламан, деб ўйламагандим. Лекин тақдир тақозоси. Келинимдан уйингизни соғинмаяпсизми, деб кўп сўрайман. “Йўқ, Тошкент менга жуда ёқади”, дейди. Мана яқинда уйига бориб келди 1 ойга. Узоқ бўлгани учун бундан кам муддатга бора олмайди, дейди хонанда.
Изоҳ (0)