Кинода рол ўйнаш учун актёрлар нафақат қийин диалогларни ёд олишлари, балки ҳар бир саҳнада ҳис-туйғуларни табиий етказиб бериш учун фильмдагидек муҳитда бўлишлари талаб этилади. Бейонсе учун кино саноати мураккаб кечди ва хонанда 2008 йилда “Кадиллак Рекордс” фильмидаги оғир ролидан сўнг актрисалик фаолиятини тугатишга қарор қилди. Бу ҳақда хонанданинг онаси Тина Ноулз ўзининг Instagram саҳифасида маълум қилди.
Хонанда 2000 йилларда кинода фаол бўлди. Бейонсе гавдалантирган образлар орасида “Остин Пауверс” фильмидаги Клеопатра, “Пушти пантера” фильми ва “Орзудаги қиз” каби лойиҳалар юқори эътироф этилди.
“Кадиллак Рекордс” (2008) мусиқий биографик драмасидан сўнг эса Бейонсе фақат мусиқа соҳасида ишни давом эттиришни лозим кўрди. Мазкур фильм Чикагодаги нуфузли овоз ёзиш компанияси раҳбари Леонард Чесс ва Chess Records учун мусиқа ёзган бир неча мусиқачиларнинг ҳаёти ҳақида ҳикоя қилади. Бейонсе америкалик қўшиқчи Этта Жеймс ролини ўйнаган. У 1960 йилларнинг ўрталари ва 1970 йилларнинг бошларида героинга қарамликдан азият чеккан.
Сўнг Бейонсе “Қирол шер” да Нала образига ва “Муфаса” анимацион фильмида Қиролича Тарага овоз берди.
Хонанданинг онаси Тина Ноулз Бейонсенинг Этта Жеймс ролидаги видеосини саҳифасига жойлаштирар экан, эндиликда фарзанди бадиий фильмларда суратга тушмаётганидан афсусда эканлигини билдирди:
“Мазкур лавҳага ҳозиргина кўзим тушди. Лойиҳа менинг энг севимли фильмларимдан бири эди. Бейонсе эса унда ўз образини қойилмақом ижро этган эди. Этта Жеймс образи ишонарли чиқиши учун қизим наркология марказига қатнар эди” дея постни якунлаган Ноулз.
Бейонсенинг гиёҳванд беморларнинг реабилитация марказига ташрифи унинг блюз юлдузи ролига тайёргарликнинг бир қисми бўлган.
Изоҳ (0)