“Тўйда пичоқ билан таҳдид қилишган”. Шахсий ҳаёти ҳақидаги саволлардан безган ва ногирон жониворни парвариш қиладиган Манзура 46 ёшда (фото)

Хонанда Манзуранинг ижод оламига кириб келганига 27 йил бўлди. Бу йил 46 ёшни қаршилаган ижодкор шу кунгача ўндан ортиқ хит қўшиқлар ва муваффақиятли ролларни ижро этди.

Рассом оиласида туғилган Манзура

Хонанда Манзура интервьюларида тўкис оилада улғайгани ва болалиги гўзал хотираларга бой ўтгани учун ота-онасидан миннатдор эканлигини таъкидлайди. 

— Болалигим ҳақиқатан гўзал ўтган. Ўзим ҳам юзлари дўмбоқ, беғубор қиз бўлганман. Жуда кичиклигимдан бошлаб санъатга қизиқардим. Дадамнинг устахонасидаги жараён ҳам менга завқ улашарди, — дейди хонанда Манзура.

Манзуранинг отаси ўз даврининг таниқли рассомларидан бири бўлган. Шу боисдан ҳам Муборак Йўлдошев қизларидаги санъатга бўлган меҳрни эрта пайқайди. Беш ёшидаёқ қизидаги ноёб истеъдодни сезган ота, дўсти Каримхожи билан маслаҳатлашиб, уни Успенский номидаги мусиқа мактабига ўқишга беради. Ёш хонанда “Неймер” оркестри билан “Карубина” ариясини маҳорат билан куйлайди. Унинг овоз диапазони тенгдошларига нисбатан анча кучли экани устозларини ҳам ҳайратлантиради.

Узоққа бормаган “Себону”

Ўзбек эстрадасида учлик гуруҳни “Сетора” билан боғлашади. Ундан аввал ўзбек эстрадасида “Себону” номли гуруҳ ташкил этилганди. Уч қиздан иборат гуруҳни илк бор Манзура опаси Нигина ва дугонаси Наргиза билан бирга 1996 йил тузади. Иқтидорли хонанда Равшан Зокиров бошчилигида трио 2 та қўшиқ ёзиб, “Офарин-96” кўрик танловида 2-ўринни эгаллайди. Кутилмаган бурилиш ҳар уч ижодкорни ҳам қувонтирди. Натижада солист Манзура шу йили Успенский номидаги мусиқа мактабини тугатиб, Тошкент Давлат Консерваториясида ўқишни давом эттиради. У пайтга келиб гуруҳдаги Наргиза ўзини санъатшуносликка бағишлайди. Омадли трио эса “Осиё” дуэтига айланади.

Опаси санъаткор бўлишни истамади

Опа-сингиллардан ташкил топган “Осиё” гуруҳи аввалига сермазмун ижод қилди. Бир йилдаёқ “Ёлғизим” номли альбомни тақдим этиб, икки қўшиғи оммалашди. Аммо опа-сингиллар ижодда кўп бор молиявий қийинчиликларга учрарди. Қўшиқ ва клип яратиш учун фирмалардан ёрдам сўрар, даромадлари ҳаминқадар бўлса-да, борини ижодга сарфлашарди. Афсуски, 2000 йилга бориб Манзура ижодда ёлғизланиб қолди. Опаси Нигина келажагини бу соҳада кўролмай, ўзини дизайнерлик соҳасида синаб кўриш учун “Осиё”ни тарк этди. Шундан сўнг у клипмейкер, ҳозирда эса таниқли режиссёр бўлган Рустам Саъдиев билан ҳамкорлик қилишни бошлади. Продюсер билан ҳамкорлик хонандага катта омад ва машҳурлик олиб келди. 

Продюсери уни актрисага айлантирди

Манзуранинг танилишини кўпчилик “Тоҳир ва Зуҳра” фильмидаги “Манзура” қўшиғи ва унга ишланган клип билан боғлайди. Ноодатий имиж ва қўшиқ Манзуранинг одамлар ёдида қолишига сабаб бўлди. 

2002 йили хонанда учун омадли келди. У “Ниҳол” номидаги давлат мукофотини қўлга киритди. Продюсери Рустам Саъдиев унинг актрисалик маҳоратини пайқаб, ўзи суратга олган “Муҳаббат синовлари” фильмига таклиф этди. Хонанда ижро этган рол ҳам, унга куйлаган саундтрек ҳам томошабинлар орасида оммалашди. Шундан сўнг актрисани фильм саундтрекларига ва сёмкаларига кўп таклиф этадиган бўлишди. Албатта, бунда продюсери Рустам Саъдиевнинг ҳиссаси катта.

“Сиздан бошқа совуқ юз тополмадик”

2007 йилда хонандани технологик фильм бўлган “Севгинатор”га таклиф этишади. 3 йил давомида Мунаввара Абдуллаевадан актёрлик маҳоратидан сабоқ олган Манзура иккита образни гавдалантириши керак эди.

— “Севгинатор”да рол ижро этишни унчалик истамаганман. Ҳатто эртаси куни сёмка дейилганда ҳам “Ўрнимга хонанда Лолани олинглар” деганман. Шунда режиссёр ёнимга келиб, “Сиздек совуқ юз бошқа йўқ-да” деган, — дейди хонанда Манзура. 

Асирга олишгани ҳақида...

Хонанда интервьюларининг бирида у ва жамоасига қилинган суиқасд, жиддий шикаст етказишгани ва асирга олингани ҳақида айтиб ўтган.

— Бундан йигирма йилча аввал тўйда жамоадаги болаларни урмоқчи бўлиб, пичоқ билан келиб, ўлдириб юбормоқчи бўлишган. Мен ҳам жуда “духи” баланд қиз эдим. Отдан тушсам ҳам, эгардан тушмаганман. Улар нима деган бўлса, худди шундай жавоб қайтарганман. Ҳар хил гап-сўзлардан сўнг, улар бизни қўйиб юборган. Улар бизни ўраб олишган, маъмуримни тепишган эди. Бундай ҳолатлар эсласак, кўп чиқаверади, — дейди хонанда.

Омадсиз тадбиркор

Хонанда Манзура опаси Нигина билан биргаликда “Манзура” либослар бутиги фаолиятини йўлга қўйганди. У либослар дизайни ва уларнинг рекламалари устида ишлаб, махсус фотосессиялар ҳам ўтказганди. Айниқса, турк фотографи Тайфун билан Бали оролида ўтказилган махсус фотосессияси кўплаб муҳокамаларга сабаб бўлган.

— Баъзида қўшиқчиларнинг бошқа бизнеси бўлади. Бир хилларининг ота-онаси бой бўлади. Биз опам билан бошқа бизнес қила олмаганмиз. Клипларимга, рекламаларга ўзим пул тўлаганман. Булар учун ҳам катта пул сарфлаганман. Масалан, тўйдан пулни олиб, телевидениега бераман, шу пулни олиб режиссёрга, овоз ёзишга, хуллас, ўзимда кундалик харажатлар учун пул қолган, холос. Биз ҳам ҳар бир ўзбекка ўхшаб секин-секин уйнинг пулини бўлиб-бўлиб тўлашга сотиб олганмиз. Бирдан сотиб олишга имконимиз етмаган, — дейди хонанда.

“Депрессияга тушдим”

Хонанда интервьюларининг бирида кейинги йилларда ҳаёт тарзидан тортиб, фикрлари ҳам бутунлай ўзгаргани ҳақида айтиб ўтган. 

— 5-6 йил аввал қаттиқ депрессияга тушдим. Бунга одамларнинг “Қачон оила қурасиз? Фарзандли бўлолмай қоласиз? Ҳаётингизнинг мазмуни йўқолади”, деган гаплари сабаб бўлди. Шунда интернетга “Ҳаёт мазмуни нима?” дея қидирув бердим. Бир маълумот эътиборимни тортди. “Мусулмонлар учун иймон ва итоат” деган гапни ўқиб, юрагим жунбишга келди. Шундан кейин фикрларим ҳам, ҳаётга бўлган қарашларим ҳам ўзгарди. Насиб этса, оила қуриб, фарзандли бўларман, — дейди хонанда Манзура.

“Турмуш ўртоғим ўзимдек рус табиатли бўлсин, аммо”

Хонанда қандай эркак билан оила қуришни исташи ва қайси тоифадагилари билан яшолмаслиги ҳақида ҳам айтиб ўтган.

— Кўп тилни биладиган, динимизни қаттиқ эмас, юмшоқ қабул қиладиган, аёлларга меҳрибон эркакларни ҳурмат қиламан. Аёлларга зулм қилиб, фақат уйда ўтирасан, дейиш ярамайди. Аёл киши ҳам эмоционал инсон, унинг руҳиятини синдириб қўйиш осон. Турмуш ўртоғим ўзимга ўхшаган рус табиатли инсон бўлса-да, мусулмон бўлса ва қизиқишларимни ҳурмат қилса, деб ният қиламан. Фақат мол-дунё ва керакмас қадриятлар билан яшайдиган инсонларни унчалик тушунмайман. Масалан, Илон Маск миллиардер инсон бўлса-да, оддий квартирани ижарага олиб яшайди. Аммо унинг мақсадлари жуда улкан. У Марс сайёрасига бориб, ўша ерда яшашни орзу қилади. У баъзи одамларга ўхшаб, умрини данғиллама уй-жой қуришга сарфлаётгани йўқ. У яратган қанчадан қанча техникалар инсонларнинг оғирини енгил қиляпти. Айтмоқчи бўлганим, эркак кишининг дунёқараши кенг бўлса, аёл киши ҳам унга қараб интилади. Аёл дегани фақат битта мебелни артиб, қозон-товоқни тозалаш билан умри ўтиб кетмаслиги керак. Мен ҳам барча аёллар сингари уй ишларини қилиб зерикиб кетаман. Айтмоқчи бўлганим, эркак ва аёл бир-бирини тўлдириши, олий мақсадлар сари интилиши керак, — дейди хонанда Манзура.

“Ота-онамдан бирин-кетин айрилдик”

Манзура ота-онасини йўқотганидан кейин тушкунликка тушгани ва қийин кунларни бошдан кечиргани ҳақида айтиб ўтди.

— Ота-онамни йўқотганимдан кейин ҳеч нарсага қизиқишим қолмади, депрессияга тушиб қолдим. Бир уйда тўрт киши яшардик. Ота-онам, опам ва мен. Тасаввур қилинг, тўрт ой ичида иккита инсон вафот этди. 

Отам раҳматли Янги йил байрами дастурхонига қўйиладиган оливье салати ва норинни яхши кўрарди. Дастурхон тузаб, оила даврасида телевизор кўришни яхши кўрардик. 2018 йилнинг ёзида ота-онамдан кетма-кет айрилдик ва Янги йил дастурхонида Нигина опам билан ёлғиз ўтирибмиз. Бу ҳолат инсон руҳиятига жуда қаттиқ таъсир этаркан. Ҳатто шундай кунлар ҳам бўлдики, уйни таъмирлатиш керак бўлганида шу ишни ҳам қилишни истамадик. Чунки уйнинг ҳар бурчагидан ота-онамнинг юз-кўзлари кўринарди. Уйдаги ҳар бир нарса улар билан боғлиқ хотираларни эслатарди. 

Ота-онам билан 40 ёшимга қадар бирга яшадим. Баъзан ҳатто уларни набиралик қилолмадим, деб ўксинардим. Аммо Яратганнинг хоҳиши билан инсон турмушга чиқади, фарзандли бўлади. Самодан никоҳ тушмагунича бир эркакка яқинлашиб бўлмайди. Демак, шундай бўлиши керак эди, деб ўзимни юпатаман. 
Ота-онам билан саёҳат қилишни, айниқса, Анталиядаги денгиз соҳилларига боришни ёқтирардим. Аммо ота-онамни йўқотганимдан кейин саёҳатга бориш ҳам кўнглимга сиғмай қолди. Инсон ҳаётида ота-онанинг ўрни катта, афсуски, уларни йўқотгандан кейин буни янада кучлироқ ҳис қиларкансиз, — дейди хонанда Манзура.

 “Ёш кўринишимнинг сири фарзанд кўрмаганимда”

Хонанданинг доимо ёш кўринишига сабаб нима? Бу саволга у қуйидагича жавоб берди.

— Ёш кўринишимнинг биринчи сири — турмушга чиқмаганим. Фарзанд кўрмаганим, чунки биламан, фарзанд катта қилиш ҳам жуда машаққатли меҳнат. Шу нарса ҳам қаритиб юборади. Менда бу неъмат ҳозирча йўқ. Худо хоҳласа бўлади. Кейин косметологга мунтазам бораман. “Ўзим шунақа чиройлиман”, десам ёлғон бўлади, — дейди хонанда.

“Ёлғизликдан чарчамадингизми?”

Хонанда интервьюларининг бирида ёлғизликдан зериккани ва тақдирга ишониши ҳақида айтиб ўтган.

— Бунақа саволларни охирги пайтда менга жуда кўп беришади. Бу савол аёл кишининг дилини жуда оғритади. Лекин мен кўникиб кетдим. Ёлғизликдан ҳамма зерикса керак. Мен ҳам оддий аёлман, албатта ёлғизликдан зерикаман. Лекин бу қазойи қадар. Аллоҳ берган тақдир. Шу қазойи қадарни мен қабул қилиб, шукр қилиб яшашим керак. Чунки биз билмаймиз, Аллоҳ бизни қандайдир мусибат, мушкулотлардан асраётгандир, куйдирги турмуш ўртоқ, куйдирги фарзанддан асраётгандир. Шу учун ҳаётдан баҳра олиб, шукр қилиб яшашим керак, — дейди хонанда Манзура.

Хонанда интервьюларидан бирида ногирон мушукчани парваришлаши ҳақида сўзлаб берган.


“Facebookда кўчада қолган ногирон мушукчани кўриб қолиб, топиб парваришладим. Агар уни топшириб юборсам. Дарҳол эвтаназия қилишади. Кечаси юзини юзимга босиб, “Мени бериб юборма” деб ялинаётгандек бўлади. Гимнастика қилсам, келиб гиламчага ётиб, ўз қилиқлари билан мени кулдиради”, — деган эди хонанда.