Бу кулгили корейс қўшиқчиси бутун дунёни ўзи билан бирга рақсга тушишга ва жўшқин қўшиқнинг содда сўзларини айтишга мажбур қилди. Унинг Гангнам Style клипи интернетни шунчалар ҳайратга солдики, машҳур видеохостинг кодларини ўзгартиришга мажбур бўлди, чунки ҳеч ким кўришлар сони миллиардларга етишини тасаввур ҳам қила олмасди. Бироқ кўп ўтмай, бир қанча мамлакатларга тўфондек кириб борган PSY тўсатдан кўздан ғойиб бўлди. Аммо унинг бундай қилишига жиддий сабаблар бор эди.
Корея “Рубльёвка”сидан чиққан бойвачча
PSY 2012 йилда Гангнам Style клипи билан бутун дунёни лол қолдирди. Клип 2 миллиарддан ортиқ кўрилди ва бундай катта рақамларга ўрганмаган энг машҳур видео хизматининг ҳисоблагичини ишдан чиқарди. PSY тахаллусли ижрочи атиги бир неча кун ичида дунёдаги энг машҳур шахслардан бирига айланиб, мухлислар армиясига эга бўлди. Экранда кулгили ҳаракатлар қилаётган қўшиқчининг аслида ким эканини фақат корейслар яхши билишарди.
Пак Чже Сан (хонанданинг ҳақиқий исми) камбағал оиланинг фарзанди эмасди. У Корея ёшларининг энг ёрқин вакилларидан бири бўлиб, ҳеч қачон бирор нарсага муҳтож бўлмаган. Унинг отаси яримўтказгичлар ишлаб чиқарадиган йирик корпорациянинг ижрочи директори, онаси эса бир нечта шахсий ресторанларидан катта даромад оларди. Пак Чже Сан эса отасининг ишини давом эттириш ёки ресторан бизнесини юритишни хоҳламасди.
Пак тенгдошлари билан тил топиша олмасди, бироқ уларнинг юзига табассум югуртира оларди. У ҳазиллашар, қилиқлар қилар, дарсларни бузар ва атрофдагиларни кулдирарди. Пак мунтазам равишда дарсларни бузиб, ўқитувчиларнинг сабрини синарди. Ўсмирлик пайтида у мусиқага қизиқиб қолади ва севимли рэперларига тақлид қилиб, треклар ёза бошлайди. Аммо у мусиқа билан шуғулланиш истагини отасига айтганида, тушуниш ўрнига рад жавобини олади.
Ўша пайтда у ота-онасига қарши чиқмайди, шунинг учун мактабни тугатгандан сўнг бизнесни бошқариш усуллари ва техникасини ўрганиш учун Бостон университетига ўқишга киради. Ота-она ўғиллари улардан узоқда мустақил ва масъулиятли бўлиб, ватанига кучли мутахассис бўлиб қайтишига ишонарди. Бироқ ҳаммаси бутунлай тескари бўлди. Назорат йўқлиги, талабаларнинг эркин ҳаёти ва эркинлик Пак учун айни муддао эди.
Ота-онаси юборган пулларни у кўнгилхушликларга сарфларди, маърузаларда деярли қатнашмасди, лекин отасининг университет раҳбариятига “ўғлига яна бир имконият бериш” илтимоси маълум вақт уни ўқишдан ҳайдашдан сақлаб қолди. Аммо Пак ўқишни давом эттиришни истамаслигини айтади. У ҳужжатларини олиб, инглиз тили курсини тамомлайди ва Беркли мусиқа коллежига ўқишга киради. Аммо у бу ерда ҳам узоқ ўқимайди, тез орада у мусиқий карьерасини қуриш ниятида Кореяга қайтиб келади.
Услубга мос тахаллус
Хонандалик карьераси учун Пак Чже Сан услуби ва дунёқарашига тўлиқ мос келадиган тахаллус танлайди. Тахаллус эса унинг одамлар кўз ўнгида қандай кўринишини тўлиқ акс эттирган. PSY — инглизча “псих” сўзидан олинган бўлиб, қўшиқчининг ўзи буни оддийгина тушунтиради: у ақлдан озар даражада мусиқа ва рақсни яхши кўради.
Дарвоқе, ижрочининг саҳнадан ташқаридаги хатти-ҳаракати ҳам анча ғалати. У доимо қандайдир воқеаларга дуч келарди, тақиқланган моддаларни истеъмол қиларди. Аммо унинг шон-шуҳратга интилиши ҳам эътибордан четда қолмайди. 2000 йилда Корея телевидениесида ўзига хос чиқишидан сўнг, PSY продюсерлар эътиборини тортади.
Телевидениеда дастлабки чиқишидан бир йил ўтмай, қўшиғи Корея хит-парадларининг биринчи қаторларига кўтарилади. Биринчи диски ҳам жуда тез сотилади. Бироқ расмийлар уни номақбул деб топиб, жаримага тортишади. Аммо бу ижрочига юлдуз бўлишга тўсқинлик қила олмайди, шунчаки энди унинг альбомлари тингловчиларнинг чекланган ёшини англатувчи ёрлиқ билан чиқади.
Дарвоқе, ёшларга унинг қўшиқлари ёқарди, кекса авлод эса бундай санъатни номақбул деб ҳисобларди. Аммо у жуда яхши композицияларни ҳам ярата олди, улардан бири 2002 йилги футбол бўйича жаҳон чемпионатининг норасмий мадҳиясига айланди ва Корея мусиқа мукофотининг лауреати бўлди. PSY учта альбом чиқарди, шундан сўнг машҳурлиги пасая бошлади. Концертлари аввалгидек мухлислар армиясини тўпласа-да, янги композициялар энди чартларда кўтарилмасди.
Шундан сўнг PSY ўзига хос, ҳар доим танқидга учраган услубидан воз кечади. Бу вақт ичида уйланиб, эгизак қизларнинг отаси бўлади. Кейинчалик PSY турли лойиҳалар устида ишлай бошлайди, саҳнага камроқ чиқади. У энди кутилмаган ва бемаъни ишлар қилмасди, аммо PSY ҳар доим ажаблантиришни биларди. Ва у Гангнам Style номли композицияни чиқаради, бу клип унга жаҳон миқёсида шуҳрат келтиради, К-попнинг портлашига сабаб бўлади.
Уникал композиция ва оламшумул муваффақиятдан кейинги ҳаёт
Ушбу қўшиқ Сеулнинг энг нуфузли тумани, Жанубий корея “Рубльёвкаси” — Каннамгуга бағишланган эди. Хонанда шу ерда туғилиб ўсган, шунинг учун ушбу ҳудуднинг урф-одатлари, қоидаларини жуда яхши биларди. Клипда хонанда Лондондаги (ёки Сеулдаги) данди кийимида пайдо бўлиб, мутлақо ҳиссиётсиз юз ифодаси билан куйлайди. Ҳеч ким Гангнам Style YouTube тарихидаги энг кўп томоша қилинган клипларнинг бирига айланиши ва унинг дастурий кодлари икки миллиарддан ортиқ кўриш учун ҳисобланмаганлигига ишонмаганди.
Гангнам Styleъни бутун дунё тинглади, рақсга тушишди, одамлар хонанданинг ҳаракатларини такрорлашди. PSYни биринчи даражали поп-юлдузлар билан саҳнада чиқиш учун таклиф қилдилар, кўпчилик ҳеч ким танимаган одам қандай қилиб битта клип орқали 5 миллион доллардан ортиқ пул ишлаб олиши, кўришлар сони бугун ҳам тўхтамаётганидан ҳайратда қолишди.
Сўнгра у яна бир нечта ҳитлар чиқарди, лекин Гангнам Style даражасига ета олмади. 2018 йилда эса ижрочи кутилмаганда оммавий ахборот воситаларидан йўқолди. Бу айнан ўша пайтда содир бўлди, чунки у ўзини танитган продюсерлик агентлиги билан ҳамкорликни тугатди. Ижрочи ўзининг продюсерлик компаниясини очди, оиласи билан Лос-Анжелесга кўчиб ўтди ва жуда ёпиқ ҳаёт тарзида яшай бошлади.
Мухлислар у карьерасини якунлаган деб ўйлашди. Бироқ 2022 йилда PSY янги “9тҳ” номли альбоми билан саҳнага қайтиб, Кореяда турли шаҳарларда гастроллар ўтказди. Унинг концертларида минглаб томошабинлар йиғилиб, стадионларда ҳақиқий шов-шув кўтарилди.
2022 йилда у хотини ва қизлари билан Кореяга қайтиб келади. Бир нечта концертлардан сўнг, у келажакда К-попнинг янги талантларини ривожлантиришга йўналтирган мусиқий продюсер сифатида фаолият юритмоқчилигини айтади. Бироқ у ҳозирда ҳам Кореяда кўплаб гастроллар ўтказмоқда ва концертларидан олган ҳиссиётларсиз яшай олмаётганини айтади.
Айнан PSY билан бошланган К-попга бўлган қизиқиш, Жанубий Корея қўшиқчилари ва мусиқий гуруҳларининг машҳурлиги тобора ошди, улар бугун авлоднинг кумирларига айланишди.
Изоҳ (0)