Ҳинд кинолари режиссёри, продюсери ва актёри Амир Хон 30 йилдан ортиқ кинодаги фаолияти давомида ўзини ҳинд киносининг энг машҳур ва нуфузли актёрларидан бири сифатида кўрсатди. Томошабинлар унинг иштирокидаги фильмлар чиқишини интиқлик билан кутишган. Фаолиятининг бошидаёқ Амир Хон ўзининг комедиядаги роллари билан машҳур бўлиб, актёр ҳеч қачон тажрибалардан қўрқмаган ҳамда кутилмаган ўзгаришларга ва қийин вазифаларга тайёр бўлган. Жорий йил 14 март куни 60 ёшни қарши олган Амир Хон ижод ва ҳаёт йўли ҳақида маълумот берамиз.
Болалик ва санъатга илк қадам
Амир Хон 1965 йил 14 март куни Ҳиндистоннинг Мумбай шаҳрида туғилган. Унинг тўлиқ исми Муҳаммад Амир Ҳусайн Хон бўлиб, у кино саноатига яқин оилада улғайган. Амир Хон оиланинг тўнғич фарзанди, унинг бир укаси ва икки синглиси бор. Отаси Тоҳир Ҳусайн кино продюсери, амакиси Носир Ҳусайн эса машҳур режиссёр бўлган. Унинг жияни Имрон Хон ҳам Болливудда аллақачон машҳурликка эришган.
Бўлажак актёр мактабни уч марта ўзгартирди, кейин иқтисод коллежида таҳсил олди. Сўнг у ҳаётини актёрлик касбига бағишлашга қарор қилиб, таълим муассасасини тарк этди. Ўсмир ёшида Амир Хон “Авантар” театр гуруҳида ишлади.
Амир Хон мактабда яхши ўқимаган ва ҳатто синфдаги тартибни доим бузган. У ёшлигида шахматга жуда қизиққан ва мактабни ташлаб, профессионал шахматчи бўлиш ҳақида ҳам ўйлаган.
Амир Хон иштирокидаги фильмлар
Хон фильмдаги дебютини 1973 йилда, амакисининг “Хотиралар карвони” фильмида эпизодик роли билан бошлаган. Бир йил ўтгач, у амакиваччасининг фильмида суратга тушди. Унинг роли жуда кичик бўлса-да, бошловчи санъаткор учун катта тажриба бўлди.
Узоқ танаффус сўнг, Амир Хон 80 йилларда кинога қайтди. 1985 йилда ёш дўсти Ашутош Говарикер уни “Ҳоли” фильмига таклиф қилади, бироқ бу фильм ҳам халқнинг эътибордан четда қолади.
1988 йилда Амирнинг ижод йўли “Ҳукм” асари билан бойитилди, айнан шу асардан шундан сўнг Хон ва унинг ҳамкасби Жуҳи Чавла иккиси юлдузга айланди. Ҳиндча Ромео ва Жулетта ҳикояси томошабинларни қалбидан чуқур жой олган эди. Фильм Ҳиндистоннинг Фильмфаре мукофотларини қўлга киритди ва йилнинг энг яхши фильми сифатида Миллий кино мукофотига ҳам сазовор бўлди.
“Ҳукм” дан кейин режиссёрлар ва продюсерлар актёрга кўплаб таклифлар билан чиқди. Амир ҳам актёр, ҳам сценарий муаллифи сифатида иштирок этган “Муҳаббат сари” юқори эътироф этилди. Унинг драматик роли барчага манзур эди.
Танқидчилар томонидан салбий билан қабул қилинган ва муваффақиятсиз бўлиши башорат қилинган “Миллионернинг қизига уйланаман” (1994) фильми эса кутилмаганда оммабоп фильмга айланди. Амир ва унинг ҳамкасби Салмон Хоннинг актёрлик маҳоратида томошабинларда катта таассурот қолдирди. 90 йилларда намойиш этилган “Исёнкор қалб” ва “Кўнгил истайди” лойиҳалари ҳам омадли бўлди.
2001 йилда Амир Хон ўзининг Ааmir Khan Productions кино компаниясини таъсис этди ва ўзини продюсерлик ва режиссёрлик соҳасида синаб кўрди. Компания ташкил этилган йилда яратилган “Lagaan: Бир куни Ҳиндистонда” мусиқий драмаси саккизта Миллий кино мукофоти, тўққизта Фильмфаре мукофоти ва ҳаттоки “Оскар” номинациясини қўлга киритди. Хоннинг “Ердаги митти юлдузлар” фильми алоҳида таҳсинга лойиқ. У ҳам “Оскар”га номзод бўлган.
Кўпгина ҳинд актёрлари бир йилда бир неча фильмда суратга тушади, аммо Амир Хон аксинча – ҳар йили атиги битта фильм устида ишлайди ва унга максимал эътибор қаратади. Шу сабабли у “Перфексионист” лақабига эга.
“Уч тентак” фильмида Амир Хон 40 ёшдан ошган бўлган, аммо талаба йигит ролини ижро этиш учун актёр кўп вазн йўқотди ва ёш ҳамкасблари билан уйғун кўриниш вазифасини уддалади.
Бу актёрнинг ташқи қиёфасини ўзгартиришга доим тайёрлигини кўрсатган ягона воқеа эмас. Амир Хон “Дангал” фильми учун 30 кг вазн тўплади ва қаҳрамоннинг ёшлигини ижро этиш учун яна озди.
2015 йилда “Пикей” комедияси чиқди, унда актёр Худони излаётган ўзга сайёраликни гавдалантирди. Фильм ҳам кулгили, ҳам фалсафий саволларни ўртага ташлаган. Амир Хон унда актриса Анушка Шарма билан ишлаган.
Амир Хон ҳинд фильмларининг Хитой бозорига киришига сабабчи бўлган илк режиссёрдир. Унинг бу хизматлари мамлакатда бир неча бор эътироф этилган. Ҳиндистонда муваффақиятсизликка учраган “Махфий супер юлдуз” фильми Хитойда мамнуният билан қабул қилинган.
Унинг кейинги лойиҳаси “Ҳеч ким билмайди” фильми бўлди. 2022 йилда бутун дунё бўйлаб “Лаал Сингх Чаддҳа” комедияси чиқди, фильм Том Хенкс иштирокидаги Американинг “Форрест Гамп” номли фильмининг ҳиндча ремейки эди.
2023 йил январь ойи ҳолатига кўра, Амир Хон Болливудда энг кўп касса даромадлари келтирган еттита фильмда рол ўйнади. Ҳозирда актёрнинг бутун дунёдан мухлислари бор.
Шахсий ҳаёт
Амир Хон икки марта турмуш қурган. Дастлаб у Рина Дутта исмли қўшниси билан ҳаётини боғлади. Қиз бошқа динга мансуб бўлганлиги ота-оналар тўйга рози бўлмаган, шунинг учун ёшлар қочиб кетиб, яширинча турмуш қуришган. Маълум вақт ўтиб улар ота-онасининг дуосини олиш учун уйга қайтган. Бу никоҳда рафиқаси Жунайд ва Айра исмли ўғил ва қиз дунёга келган. Уларнинг турмуши 16 йил давом этди, ажримдан кейин фарзандлар онаси билан қолишга қарор қилди.
Амирнинг иккинчи рафиқаси режиссёр ёрдамчиси, кейинчалик режиссёр ва продюсер бўлиб ишлаган Киран Рао эди. Улар “Lagaan: Бир куни Ҳиндистонда” фильмини суратга олиш майдонида танишишган ва турмуш қурган. Киран суррогат онадан орқали Азад исмли ўғил кўрган. Аммо улар 2021 йилда ажрашган.
Гарчи мухлислари ва яқинлари унинг туғилган кунини катта тантана билан нишонламоқчи бўлса ҳам, Амир Хон буни хуш кўрмайди ва ўз туғилган кунини оддий кундек ўтказади.
Амир Хон бугунги кунда
Хоннинг актёрлик фаолияти ҳозирда ҳам давом этмоқда. 2024 йилда у “Лаҳор 1947” жанговар драмасида рол ўйнади. Фильмда афсонавий Митҳун Чакраборти ҳам иштирок этди. Экшн фильм премераси 2025 йил январь ойида бўлиб ўтди.
Изоҳ (0)