Ozarbayjonlik xonanda Roza Zergerli “Istedim” taronasi bilan nafaqat Ozarbayjonda, balki butun MDH mamlakatlarida mashhurlikka erishdi. Zergerli bugungi kunda O‘zbekistonda o‘tkazilayotgan turli madaniy tadbirlar va to‘ylarning doimiy ishtirokchisiga aylandi. U 2025-yilning 14-aprelida “Xalqlar do‘stligi” saroyida konsert dasturini taqdim etishni rejalashtirmoqda. Birgina qo‘shig‘i orqali olamshumul mashhurlikka erishgan xonandaning hayot va ijod yo‘li ko‘pchilikka qiziq bo‘lsa kerak.
Roza Zergerli (Roza Zargar qizi Allahverdiyeva) 1979-yili Rossiyaning Tyumen viloyatida harbiy xizmatchilar oilasida tug‘ilgan.Yoshligidan musiqaga bo‘lgan muhabbati uni avval o‘rta maxsus musiqa maktabiga undan so‘ng musiqa texnikumiga olib borgan. Bu yerda Roza akkordeon va fortepiano mutaxassisliklari bo‘yicha taʼlim olgan, 2001-2008-yillarda esa Ozarbayjon Madaniyat va sanʼat universitetining ommaviy tadbirlarning rejissyorlik fakultetida o‘qigan va 2015-yili “Rejissyorlik sanʼatining tarixi va nazariyasi” mutaxassisligi bo‘yicha magistraturani aʼlo baholar bilan tugatgan.
20 yillik ijodiy faoliyati davomida Roza Zergerli Mingechevir davlat drama teatrida sahnalashtiruvchi rejissyor bo‘lib ishlagan, ko‘plab spektakllarning bosh rejissyori sifatida turli obrazlarni yaratgan. Jozibali ovozi va ijro mahorati bilan ajralib turadigan artist, shuningdek, estrada xonandasi sifatida, Ozarbayjonni xalqaro musiqa festivallarida munosib tarzda namoyon qilgan.
Roza rejissyor sifatida ijodini doimo takomillashtirib, bir qator hujjatli filmlarni suratga olgan. 2002-yili suratga olingan “Qorabog‘noma” filmi YUNESKOning qo‘llab-quvvatlashi bilan Fransiyada o‘tkazilgan festivalda birinchi o‘rinni egallagan.
Aktrisa sifatida ham ko‘pchilikning eʼtibori markazida bo‘lgan Roza Zergerli 2000-yillarning o‘rtalaridan boshlab ko‘plab seriallarda turli xarakterdagi Ozarbayjon ayollarining obrazlarini yaratgan. U bir necha bor frontga borib, askarlar uchun qiziqarli konsert dasturlari uyushtirgan. 20 ga yaqin klip va 6 ta albom chiqargan aktrisa 2014-yildan beri turli telekanallarda namoyish etiladigan “Boku vaqti bo‘yicha” dasturining boshlovchisi va muallifi hisoblanadi. Dasturda Ozarbayjon madaniyat arboblarining hayoti va ijodi yoritiladi.
Roza Zergerli, shuningdek, bir necha biografik romanlarning muallifi hisoblanadi. 2018-yili “Sibir guli” nomli avtobiografik romani “Qaysin Kuliyev” nomidagi ordeni bilan taqdirlangan. U turkiy tilli xalqlarning madaniy aloqalarini rivojlantirgani uchun “Turksoy” medalі bilan taqdirlangan. Shuningdek, Lermontov nomidagi Yozuvchilar uyushmasining faxriy aʼzosi va Kavkaz biznesi ilmiy jamoatchilik akademiyasining akademigi unvoniga ega.
Iqtidorli pedagog Roza Zergerli Boku xoreografiya akademiyasining sanʼat fakultetida dars beradi va doktorlik darajasini olishga harakat qilmoqda. U “Mustaqillik davridagi Ozarbayjon teatrida turkiy tilli xalqlarning dramaturgiyasini sahnalashtirish” mavzusida dissertatsiya yozmoqda.
U shuningdek, xayriya ishlari bilan ajralib turadi. 4 farzandidan 3 nafarini mehribonlik uyidan asrab olgan Roza Zergerli yangi loyihalar ustida ishlamoqda va sanʼatkor sifatida faoliyatini davom ettirmoqda.
-wa6t2VDV.jpg)
Rozaning “Istedim” (Istadim) nomli kompozitsiyasi esa haqiqiy xitga aylandi va rekordlarni yangilamoqda.
Qo‘shiqning so‘zlari va musiqasi, shuningdek, recording/mix master Elvin Gasanovga, aranjirovkasi Riyod Mamedovga tegishli. “Istedim” qo‘shig‘iga ishlangan klip YouTubeda 5 oy ichida 56 million marta tomosha qilingan.
Xit hatto jahon yulduzi Jan-Klod Van Dammning ham eʼtiborini tortdi, u o‘z TikTok sahifasida ushbu qo‘shiqning bir parchasini o‘z surati bilan birga joylashtirdi.
Izoh (0)