Америкалик хонанда Майли Сайруснинг 2023 йил хит-парадларида биринчи ўринни эгаллаган ва “Гремми” мукофотини қўлга киритган “Flowers” (“Гуллар”) қўшиғи плагиатда айбланмоқда. Бу ҳақда “Корреспондент.нет” хабар берди.
Теmpo Music Investments компанияси Майли Сайрусни судга берди ва Бруно Марсга тегишли “Whеn I Wаs Your Маn” қўшиғини плагиат қилганликда ҳамда муаллифлик ҳуқуқини бузганликда айблади. Чунки компания Бруно Марс қўшиғи муаллифлик ҳуқуқининг бир қисмига эга бўлган.
Компаниянинг иддао қилишича, Сайруснинг “Flowers” қўшиғи Марснинг 2013 йилда чиққан трекига оҳанг жиҳатдан ўхшаш, матн ва нақаротларида такрорий сўзлар мавжуд. Теmpо Music Investments вакили сўзларига кўра, “икки композиция ўртасидаги ўхшашлик ва оҳангдорликка асосланиб, Бруно Марснинг қўшиғи бўлмаганида эди, “Flowers” ҳам яратилмаган бўлар эди, деб айта оламиз”.
Фото: Hollywood Reporter
Майли Сайрус ўзининг мутлақ хит қўшиғини чиқарганда кўплаб мухлислар мазкур трек Бруно Марснинг “Whеn I Wаs Your Маn” қўшиғи билан ўхшашлигини аллақачон қайд этган эди. Кейинчалик бу қўшиқ Майлининг собиқ қаллиғи Лиам Хемсвортга берган жавоби эканлиги ҳақида миш-мишлар тарқалди.
Мазкур сингл дунё бўйлаб кўплаб мусиқа чартларида юқори поғонани эгаллади ва Майлига машҳурликнинг янги тўлқинини келтирди. Бруно Марснинг ўзи эса хонандага нисбатан ҳеч қандай шикоят билдирмади.
Эндиликда Тempо Music нафақат молиявий товон пули ундиришни, балки поп-юлдузнинг “Flowers” қўшиғи ижро этилиши тақиқланишини талаб қилмоқда.
Изоҳ (0)