Болливуд юлдузларидан бадавлат меросхўрларгача: Ҳиндистонда ўтказилган энг қимматбаҳо ва дабдабaли тўйлар Топ-10 талиги

Анант Амбани ва Радхика Мерчантнинг тўйидаги ҳашамат кўпчиликни лол қолдирди. Ҳиндистонда бундай тўйлар одатий ҳол бўлса-да, бу тўй ҳақиқатдан ҳам ажойиб бўлди. Сиз учун сўнгги йиллардаги энг ҳашаматли тўй маросимларининг топ-10 тасини тўпладик.

Анант Амбани ва Радхика Мерчант: 300 дан 600 миллион долларгача

Бу тўйнинг ҳашаматини яқин вақт ичида ҳеч ким ўрнини боса олмаслиги аниқ. Анант Амбани ва Радхика Мерчантнинг тўйини бутун дунё бир неча ой давомида қизиқарли сериалдек кузатиб борди. Баҳорда ошиқлар бир неча кун тўй олди маросимларини ўтказдилар (ҳатто Рианна бир неча йилдан кейин биринчи марта саҳнага чиқди), июлда эса тўй маросими ўтказилди ва у уч кун давом этди. Расмий харажатлар ошкор этилмаган, аммо турли мутахассислар ўз фикрларини билдиришди.

Энг кам тахминларга кўра, камида 150 миллион доллар сарфланган, аммо овқат, хавфсизлик, юлдузли меҳмонлар учун транспорт ва яшаш жойлари, шунингдек, юлдузлар учун гонорарларни (Рианна 7 миллион доллар, Жастин Бибер эса 10 миллион доллар олган деган гаплар бор) ҳисобга олсак, кўпчилик 300 миллион долларгача харажат қилинган деб ҳисоблайди. Шундан кейин ҳам кенжа фарзандларни кўпроқ эркалатишади деган фикрга қаршимисиз?

Иша Амбани ва Ананд Пирамал: тахминан 100 миллион доллар

Анантнинг катта опаси ва миллиардер Мукеш Амбанининг ягона қизи Иша Амбани 2018 йилда Ананд Пирамалга турмушга чиқди. Тўй маросими бир ҳафтага яқин давом этди ва дунёнинг турли бурчакларида ўтказилди. Маросимлар Удайпурда, Италиянинг Комо кўлида ва Мумбайда жаҳон юлдузлари иштирокида ўтказилди, тўй маросими эса Ҳиндистондаги Пичола кўлидаги хусусий оролда бўлиб ўтди.

Сушанто ва Симанто Роевнинг қўшалоқ тўйи: тахминан 75 миллион доллар

2004 йилда бизнес магнат Субрата Рой ўз ўғилларини бир вақтда уйлантирди. Ҳашаматли тадбир Лакхнаудаги “Сахара” стадионида бўлиб ўтди ва бир ҳафта давом этди. Унда 11 000 дан ортиқ меҳмон, жумладан, Болливуд юлдузлари ва спортчилар иштирок этди. Дунёнинг турли бурчакларидан меҳмонлар хусусий самолётларда келди.

Брахмани ва Раджив Редди: 74 миллион доллар

2011 йилда ноқонуний кон қазиш фаолияти учун ҳибсга олинган собиқ кон магнати ва сиёсатчи Жанардхан Редди 2016 йилда ўз қизи Брахманининг тўйида ҳашаматли тарзда нишонлади. Беш кунлик тадбир Бангалор саройида (айнан Виндзор қасрининг кичик нусхаси) бўлиб ўтди ва унда 50 000 дан ортиқ меҳмон иштирок этди.

Шристи Миттал ва Гулрадж Бел: тахминан 70 миллион доллар

Пўлат магнати Прамод Митталнинг қизи Шристи 2013 йилда Барселонадаги уч кунлик ҳашаматли тўй қилиб инвестиция банкири Гулрадж Белга турмушга чиқди. Тўйда 500 меҳмон иштирок этди, менюни машҳур испан ошпази Сержи Арола тузди, тадбирнинг гастрономик кулминацияси эса 60 кг вазнли олти қаватли тўй торти бўлди.

Асосий тўй маросими Каталония санъати миллий музейида бўлиб ўтди, келин-куёвнинг ота-оналари фотографлар ва видео операторларнинг тадбирни ҳар томондан суратга олишлари учун вертолётлар ҳам ижарага олдилар.

Ваниша Миттал ва Амит Бхатия: тахминан 66 миллион доллар

Европада ўз тўйини Прамод Митталнинг жияни Ваниша ҳам нишонлади. У унинг акаси ва пўлат магнати Лакшми Митталнинг қизи. 2004 йилда у Лондон банкири Амит Бхатиага турмушга чиқди. Парижда бўлиб ўтган олти кунлик тадбирда Кайли Миноуг ва Болливуд юлдузлари, жумладан, Шоҳруҳхон ва Айшвария Рай иштирок этди. Машҳур ҳинд шоири Жавед Ахтар тўй олди маросимлари учун сценарий ёзган. Асосий тўй маросими XVII асрдаги Во-ле-Виконт қасрида бўлиб ўтди, унинг боғида Мумбайдан 35 дан ортиқ усталар жамоатчилик учун маросимлар ўтказишга мўлжалланган анъанавий павильон — мандапа қурган.

Сонам Васвани ва Навин Фабиани: тахминан 30 миллион доллар

2017 йилда Сталлион Group концернининг асосчиси Сунил Васванининг қизи Сонам Васвани Форс кўрфази минтақасидаги энг бой ҳиндлик Камал Фабианининг ўғли бизнесмен Навин Фабиани билан турмуш қурди. Байрам Вена шаҳрида бўлиб ўтди. Тўйнинг асосий кунидан олдин “Ферстел” саройида тўй олдидан зиёфат бўлиб ўтди, кейин меҳмонлар ва келин-куёв Белведер саройига кўчиб ўтишди. Бруно Марс ёш жуфтлик ва уларнинг меҳмонлари олдида чиқиш қилди.

Вират Коҳли ва Анушка Шарма: тахминан 15 миллион доллар

Ҳиндистон крикет терма жамоасининг собиқ сардори Вират Коҳли ва Болливуд актрисаси Анушка Шарма 2017 йил декабрь ойида Италиянинг Комо кўлида турмуш қуришди. У ерда нисбатан кам сонли меҳмонлар иштирокида ҳинд тўй маросимларига монанд тўй бўлиб ўтди. Бир неча кундан кейин Мумбайда ҳашаматли тўй қабули бўлиб ўтди, унда машҳурлар ва крикет ўйинчилари иштирок этди, кейин тўй Деҳли шаҳрига кўчиб ўтди — бу эрда мамлакат бош вазири Нарендра Моди ҳам тўйга ташриф буюрди.

Адел Сажжан ва Сана Кҳан: тахминан 15 миллион доллар

Бизнесмен Адел Сажжан 2017 йил апрель ойида актриса Сана Кҳан билан ҳашаматли круиз услубидаги тўй ташкиллаштирди. Жуфтлик Барселонадан Италияга Франция орқали йўл олган Cоста Фасcиноса круиз кемасида никоҳ қасамёдини қилишди. Кўп кунлик байрам давомида меҳмонларга Harrodsдан шахсийлаштирилган совғалар тўплами тақдим этилди ва байрам 10 қаватли тўй тортини кесиш билан якунланди.

Ранвир Сингҳ ва Дипика Падуконе: тахминан 11,5 миллион доллар

Албатта, бизнес империялари меросхўрларининг тўйларига кино юлдузлари тўйлари тенг кела олмайди, лекин уларнинг тўйи ҳам ўз кўлами билан барибир ҳайратга солади. 2018 йилда олти йиллик танишувдан сўнг Болливуд жуфтлиги Ранвир Сингҳ ва Дипика Падуконе Италиянинг Комо кўлида турмуш қуришди. Улар биринчи тўй маросимини Конкани халқининг анъаналарига кўра Вилла дъЭстеда, иккинчисини эса Синдҳ анъаналарига кўра Вилла Роccабруна меҳмонхонасида ўтказдилар. Кейин янги турмуш қурганлар Ҳиндистонга қайтиб, келиннинг туғилган жойи — Бангалор ва Мумбайда тўй маросимлари билан билан байрамни давом эттирдилар.