Buyuk Britaniyaning SOAX kompaniyasi Telegram foydalanuvchilari soni, eng ko‘p foydalaniladigan davlatlar hamda eng mashhur kanallar bo‘yicha olib borgan tadqiqotini e’lon qildi. Natijalar 50 mingdan ortiq respondentning javoblariga asoslanadi.
2023-yil iyul holatiga ko‘ra, Telegram 800 million oylik faol foydalanuvchiga ega bo‘lgan. Bu 2022-yil noyabri bilan solishtirganda 14,29 foiz o‘sishni anglatadi. Premium obunachilar soni esa 5 millionni tashkil etadi. Telegram foydalanuvchilarining 57,5 foizi erkaklar, 42,4 foizi esa ayollar hisoblanadi.
Telegram’dan eng ko‘p foydalanadigan davlatlar
Hindistonda messenjer ilovasi 104 million marta yuklab olingan va bu borada yetakchi. Keyingi o‘rinlarni Rossiya (34,4 million), Indoneziya (27,2 million), AQSH (26,9 million), Misr (14,9 million) egallaydi. Yetakchi 10 talikdan quyidagi davlatlar ham o‘rin olgan.
- Vyetnam — 11,8 million
- Meksika — 11,6 million
- Ukraina — 10,8 million
- Turkiya — 9,8 million
- Filippin — 9,6 million
- Nigeriya — 8,5 million
- Qozog‘iston — 7,6 million
- Fransiya — 6,5 million
Obunachilar soni bo‘yicha yetakchi bo‘lgan kanallar
Telegram’dagi eng ommabop kanal @TelegramTips bo‘lib, uning 8,92 million obunachisi bor. Ikkinchi o‘rinda rasmiy @telegram kanali 6,32 million obunachi bilan turibdi. Rus tilidagi “Pryamoy Efir” (4,64 million), Topor live (3,71 million) va Ramzan Qodirovning kanali (3,30 million) ham ro‘yxatdan joy olgan.
Telegram’dagi eng mashhur kanallar toifasi
Yangiliklar kanallari eng ommabop bo‘lib, foydalanuvchilarning 85 foizi ularni kuzatadi. Ko‘ngilochar kanallar ikkinchi o‘rinda (62 foiz) turadi. Ta’limga ixtisoslashgan kanallarni 58 foiz foydalanuvchi kuzatadi. Siyosiy kanallar foydalanuvchilarning 50 foizida qiziqish uyg‘otgan. Sohaga oid yangiliklar kanallari (masalan, texnologiya, moliya va boshqalar) esa umumiy foydalanuvchilarning 48 foiziga ega.
Izoh (0)