Yevropa ittifoqining aksar davlatlari ochiq e’lon qilmasdan Rossiya ichkarisiga uzoq masofali qurollar yordamida zarba yo‘llash uchun Ukrainaga ruxsat berdi. Bu haqda YI diplomatiyasi rahbari Josep Borrel ma’lum qildi.
Borrel AQSHning Ukrainaga Rossiya hududidagi 300 km ichkarida joylashgan nishonlarga zarbalar berishga ruxsat etgan qarorini muhim deb atagan.
“Bu ukrainaliklar uchun juda yaxshi yangilik”, dedi u.
Borrelning so‘zlariga ko‘ra, YIga aʼzo baʼzi davlatlar Kiyevga xuddi shunday ruxsatni ochiq, boshqalari yashirin tarzda bergan.
Borrel shu paytgacha bu masalada qaror qabul qilishdan o‘zini tiygan Yevroittifoq davlatlari oxir-oqibat AQSHdan o‘rnak olishiga va Ukrainaga Rossiya hududida o‘z qurollari bilan zarba yo‘llashiga imkon berishiga ishonch bildirgan. Shuningdek, u bu taklif xalqaro huquqqa to‘liq mos kelishini qo‘shimcha qilgan.
Fransiya prezidenti Emmanuel Makron Rio de Janeyroda bo‘lib o‘tayotgan G20 sammiti arafasida AQSH prezidenti Jo Bayden Rossiya hududiga uzoq masofali zarbalarga ruxsat berish haqidagi fikrni izohlar ekan, “yaxshi qaror” qabul qilinganini aytgan. Makronning so‘zlariga ko‘ra, mojaroni kuchaytirish to‘g‘risidagi qaror Rossiya tomonidan Shimoliy Koreya askarlarini o‘z qurolli kuchlariga jalb qilish orqali qabul qilingan.
“Rossiya eskalatsiya qilishga qaror qilgan yagona davlatdir”, dedi Fransiya prezidenti.
19-noyabr kuni Vladimir Putin Rossiyaning yadroviy to‘xtatib turish siyosatining yangi asosini tasdiqladi. Hujjatda, xususan, yadro davlati ko‘magida yadro quroliga ega bo‘lmagan davlat tomonidan mamlakat va uning ittifoqchilariga qarshi tajovuz qilish ularning birgalikdagi hujumi sifatida baholanishi ta’kidlangan. Rossiya prezidenti matbuot kotibi Dmitriy Peskov yangi doktrinaga ko‘ra, Ukrainaning Rossiyaga qarshi G‘arbning yadroviy bo‘lmagan raketalarini qo‘llashi ham yadroviy javobga olib kelishi mumkinligini e’tirof etgan.
Ukraina AQSH qurollari bilan Rossiyaga zarba bera oladi
17-noyabr kuni The New York Times gazetasi va Reuters agentligi manbalarga tayanib, AQSH prezidenti Jo Bayden Ukrainaga AQSH tomonidan yetkazib berilgan uzoq masofali ATACMS raketalaridan Rossiya hududiga zarba berish uchun foydalanishga ruxsat etgani haqida xabar berdi. Davlat departamenti 18-noyabr kuni kechqurun bu ma’lumotni “hozircha tasdiqlay olmasliklarini” ma’lum qildi.
Bayden maslahatchilarining Rossiyaga zarba berishda ATACMS’dan foydalanish bo‘yicha fikrlari turlicha. Ular hozircha gap faqat Kursk viloyatidagi nishonlarga zarba berish haqida ketayotganini aytgan. Keyinchalik Bayden bu qurolni boshqa joylarda ham ishlatishga ruxsat berishi mumkin. Donald Tramp prezidentlik lavozimini egallaganidan keyin Baydenning bu qarorini bekor qiladimi yoki yo‘q, hozircha noma’lum.
Izoh (0)