Turkiya prezidenti Rajab Toyyib Erdo‘g‘on G20 sammitida Ukrainadagi mojaroni hozirgi front chizig‘ida muzlatib qo‘yishni taklif qiladi. Bu haqda manbalarga tayanib, Bloomberg xabar berdi.
Manbalarning ta’kidlashicha, Erdo‘g‘on o‘z tashabbusini bugun, 18-noyabr kuni bo‘lib o‘tadigan davlatlar rahbarlari uchrashuvida taqdim etadi. Turkiyaning taklifi Donbassda qurolsizlantirilgan hudud yaratish va Ukrainaning NATOga kirishini kechiktirishni o‘z ichiga olishi mumkin. Buning evaziga Turkiya rahbari Ukrainaga xavfsizlik kafolatlari va harbiy ta’minotni davom ettirishni taklif qilishi kutilmoqda.
Turkiya prezidenti harbiy mojaro muhokamasiga qo‘shilgan NATOga a’zo mamlakatning so‘nggi rahbari bo‘ldi. AQSH prezidenti Donald Tramp yanvarda Oq uyga qaytib, urushni 24 soag ichida tugatishga va’da bermoqda. Germaniya kansleri Olaf Shols 14-noyabr kuni telefon orqali suhbatda Rossiya prezidenti Vladimir Putinni tinchlik muzokaralarini boshlashga chaqirgan. Fransiya prezidenti Emmanuel Makron 17-noyabr kuyni kuni vaqti kelganda Rossiya rahbari bilan gaplashishini aytgan.
Erdo‘g‘on Zelenskiyni Istanbuldagi tinchlik muzokaralarida qatnashishga ko‘ndira olishiga umid qilmoqda. Chunki janglar to‘xtatilmasa, Ukraina keyingi bir necha oy ichida yanada ko‘proq hududini yo‘qotishi mumkin, deyiladi xabarda. Biroq, jang maydonidagi vaziyat Putinga ham kurashni davom ettirish uchun rag‘bat bermoqda.
Putin nima deyishidan qat’i nazar, u tinchlikni istamaydi va muzokaralarga tayyor emas. Putinning maqsadi jangni kuchaytirish, buni biz bir necha haftadan beri ko‘rib kelmoqdamiz, degan Fransiya prezidenti Buenos-Ayres aeroportida.
G20 sammiti 18-19-noyabr kunlari Rio-de-Janeyroda o‘tkaziladi, unda Rossiya tashqi ishlar vaziri Sergey Lavrov ishtirok etadi. Lavrovga ko‘ra, Ukraina mojarosini to‘qnashuv chizig‘i bo‘yicha muzlatish imkoniyati — “yangi qadoqdagi o‘sha Minsk kelishuvlari”dir. The Wall Street Journal gazetasi xabar berishicha, janglarni tugatishning bunday variantini 2025-yil yanvarda lavozimga kiradigan AQSHning saylangan prezidenti Donald Tramp jamoasi ham ko‘rib chiqmoqda.
Ukrainadagi urush bo‘yicha avvalgi muzokaralar va shartlar
Rossiya va Ukraina o‘rtasida 2022-yil 17-mart, 15-aprel va 29-mart kuni Istanbulda muzokaralar bo‘lib o‘tgandi. Moskva Qrimni Rossiyaning bir qismi sifatida tan olishni, Rossiyaga qarshi barcha sanksiyalarni bekor qilishni, barcha sud da’volarini to‘xtatishni, mamlakat Xalqaro jinoiy sudga tortilmasligi bo‘yicha talablarni ilgari surgan. Ukraina tomoni ularni muhokama qilishdan bosh tortgan.
Kiyev Rossiyaning harbiy ittifoqlarga, avvalambor NATOga qo‘shilmaslik bo‘yicha talabini bajarishga tayyor bo‘lgan, buning evaziga Rossiya Ukrainaning Yevroittifoqqa kirishiga qarshilik qilmagan.
Ukraina esa hududiy yaxlitlikni ta’minlash, harbiy hujumlarni to‘xtatib, kuchlarni olib chiqish, Qrimning maqomini muhokama qilish, infratuzilmani tiklash talabini ilgari surgan. Prezident Vladimir Zelenskiy Rossiyaning talablarini “ishonib bo‘lmaydigan ultimatum” deb baholagan. Ukraina tomoni mojaroni 1991-yilgi chegaralarga qaytish bilan yakunlanishi kerakligini ta’kidlagan.
Izoh (0)