Forbes jurnali 2025-yilgi dunyoning eng boy odamlari reytingini e’lon qildi. O‘tgan yilgi ro‘yxatda rossiyaliklar deb atalgan 24 nafar milliarder boshqa davlatlar vakillari sifatida ko‘rsatildi. Ular qatorida rossiyalik oligarx Alisher Usmonov ham bor.

Usmonov birinchi marta reytingga O‘zbekiston nomidan kiritildi, biroq vaqt o‘tib boshqalar singari yana Rossiya fuqarosi sifatida aks etdi. U 16,7 milliard dollar bilan 125-o‘rinni egallab turibdi. So‘nggi bir yil ichida Rossiyada dollarli milliarderlar soni va ularning umumiy boyligi sezilarli darajada oshdi. Ikkala ko‘rsatkich ham rekord o‘rnatdi.
Rossiya milliarderlar soni bo‘yicha dunyoda beshinchi o‘rinda turadi
Ro‘yxatda jami 3028 kishi bor. Eng ko‘p AQSH (902), Xitoy (516), Hindiston (205) va Germaniya (171) vakillaridan iborat. Rossiya fuqarolari orasidagi dollarli milliarderlar soni bir yil ichida 120 dan 140 kishiga, umumiy boyligi esa 537 milliard dollardan 580 milliard dollarga oshgan.
Rossiyalik oligarxlarning 14 nafariga nisbatan G‘arbning sanksiyalari amal qilmoqda. O‘tgan yilgi reytingda rossiyaliklar deb atalgan 24 nafar milliarder dastlab boshqa davlatlar vakillari sifatida ko‘rsatildi.
Mamlakatini o‘zgartirganlar orasida Usmonovdan tashqari, Moskvaning sobiq meri Yuriy Lujkovning bevasi Yelena Baturina ham bor edi, u reytingda Buyuk Britaniya vakili sifatida aks etgandi.
“Lukoyl” sobiq vitse-prezidenti Leonid Fedun esa Monako, “Alfa-Grupp” hammuassisi Aleksey Kuzmichev — Fransiya, “Alfa-Bank” sobiq prezidenti Petr Aven — Latviya nomidan reytingda joy olgandi.
Bundan tashqari, “Yandeks” hammuassisi Arkadiy Voloj va Rambler Group’ning sobiq hammuassisi Aleksandr Mamut isroillik tadbirkorlar sifatida taqdim etilgan. Rossiyaliklar asosan Shveysariya va Isroil vakili sifatida ko‘rsatilgandi.
Biroq davlatlari o‘zgartirilgan rossiyaliklar reytingdagi yangilanishda yana Rossiya fuqarolari sifatida aks etmoqda. Odatda mamlakat bo‘limidagi o‘zgarishlar ishbilarmonlar vakillarining talabiga binoan kiritiladi.
Forbes’ning 2025-yilgi reytingida dunyoning barcha milliarderlari boyligi 16,1 trillion dollarga baholangan. Reytingga 3000 ga yaqin kishi kiritilgan. Ro‘yxatning birinchi qatoridan 342 milliard dollar boyligi bilan Ilon Mask joy olgan. Undan keyingi o‘rinlarni Meta korporatsiyasi rahbari Mark Sukerberg (216 milliard dollar), Amazon rahbari Jeff Bezos (215 milliard dollar), Oracle asoschi Larri Ellison (192 milliard dollar) va Louis Vuitton kompaniyasi rahbari Bernard Arno va oilasi (178 milliard dollar) egallab turibdi.
Izoh (0)