Bloomberg: Yevroittifoq yetakchilari Putin bilan uchrashishdan bosh tortdi

Bryusseldagi sammitda Yevropa Ittifoqi mamlakatlari yetakchilari Germaniya va Fransiyaning Rossiya prezidenti Vladimir Putin bilan rasmiy muzokaralar o‘tkazish taklifini rad etdi. Bu haqda vaziyatdan xabardor yevropalik diplomatlarga tayanib, Bloomberg xabar berdi.

Ma’lum bo‘lishicha, Germaniya kansleri Angela Merkel va Fransiya prezidenti Emmanuel Makronning taklifi uzoq davom etgan muzokaralardan so‘ng Yevropa Ittifoqi sammitining yakuniy kommyunikesidan chiqarib tashlangan.

Ta’kidlanishicha, ba’zi Sharqiy Yevropa davlatlari munozara davomida ushbu hujjatga veto qo‘yishga tayyor ekani haqida ogohlantirgan. Boshqa bir ma’lumotga ko‘ra, Yevropa Ittifoqining o‘nga yaqin davlati bu g‘oyaning o‘zi ham, uning so‘nggi daqiqada paydo bo‘lgani ham ularga yoqmaganini oshkora bildirgan.

Merkel jurnalistlarga Ittifoq mamlakatlari rahbarlaridan “dadilroq qadam” kutgani haqida aytgan. “Rossiya bilan muzokaralar uchun format va shartlar ishlab chiqiladi. Ammo rahbarlar darajasida emas”, — dedi u.

Bloomberg xabariga ko‘ra, Yevropa komissiyasi rahbari Ursula fon der Lyayen va Yevropa kengashi rahbari Sharl Mishelning Rossiya rahbari bilan uchrashuv o‘tkazishi — murosaviy takliflardan biri bo‘ldi.

Ayni paytda, Litva prezidenti Gitanas Nauseda Yevropa Ittifoqi sammitining birinchi kuni yakunlari bo‘yicha Yevropa Kengashi Rossiya bilan muloqot qilish uchun tegishli format va shartlarni belgilashini aytdi. Nauseda Fransiya va Germaniyaning Putinni Ittifoq sammitlaridan biriga taklif qilish g‘oyasiga qarshi ekanini ta’kidladi.

Avvalroq Financial Times manbalariga asoslanib, Merkel Putinni Yevropa Ittifoqi sammitiga taklif qilish g‘oyasini bildirgani, uni Makron qo‘llab-quvvatlagani haqida xabar bergan edi. Gazetaning yozishicha, Berlin Jenevada o‘tkazilgan Rossiya—AQSh sammiti Rossiya bilan munosabatlarni qayta tiklash mumkinligidan dalolat beradi, degan xulosaga kelgan.

Yevropa Ittifoqining sammiti 24-iyun kuni boshlandi. Boshqa masalalar qatori, Ittifoq mamlakatlari prezidentlari va hukumat rahbarlari Rossiya bilan munosabatlarga umumiy yondashuv mavzusini muhokama qilmoqda.