Fransiya prezidenti Emmanuel Makron Yevropa mamlakatlarida fransuz yadro qurolini tashiydigan samolyotlarni joylashtirish bo‘yicha muzokaralarni boshlashga tayyorligini bildirdi. Bu haqda u TF1 telekanali efirida ma’lum qildi.
Makron AQSH allaqachon Yevropa hududiga “yadroviy soyabon” joylashtirganini qayd etdi. Siyosatchi Yevropa Ittifoqi mamlakatlarida yadro qurolini tashiydigan samolyotlarni joylashtirish shartlarini ham aytdi.
Fransiya boshqalarning xavfsizligi uchun haq to‘lamaydi. Bundan tashqari, yadroviy tiyib turish strategiyasi doirasida himoya qilinadigan hududni kengaytirish maqsadida, Fransiya o‘zining shaxsiy mudofaasi uchun zarur bo‘lgan qurollarni boshqa davlatlarga jo‘natmaydi. Fransiya yadro qurolini boshqa mamlakatlarga joylashtirish bo‘yicha yakuniy qaror har doim Fransiya prezidenti — oliy bosh qo‘mondon tomonidan qabul qilinadi, deya ta’kidladi u.
Stokgolm tinchlik tadqiqotlari instituti (SIPRI)ning 2024-yilgi ma’lumotlariga ko‘ra, Fransiya dunyodagi 12 100 ga yaqin yadro kallaklaridan 290 tasiga ega. Bu mamlakatni Rossiya, AQSH va Xitoydan keyin dunyodagi to‘rtinchi yirik yadroviy davlatga aylantiradi.
Fransiya to‘rtta atom suvosti kemasiga ega bo‘lib, ulardan taxminan 10 ming kilometr radiusga ega yadroviy kallakli raketalar uchiriladi. Bundan tashqari, mamlakatda Rafale qiruvchi samolyotlaridan uchirilishi mumkin bo‘lgan yadroviy kallakli 50 ga yaqin qanotli raketa mavjud.
Izoh (0)