So‘nggi haftalarda Yevropa davlatlari o‘z qo‘shinlarini Ukrainaga yuborish ehtimolini muhokama qilmoqda. Bu haqda manbalarga tayanib, Le Monde xabar berdi.
Gap birinchi navbatda Fransiya va Buyuk Britaniya haqida ketmoqda. Bu masala 2024-yil fevral oyida ham muhokama qilingan. Biroq Yevropa ittifoqining barcha davlatlari ham taklifni qo‘llab-quvvatlamagan.
Le Monde manbasiga ko‘ra, Fransiya va Britaniya o‘rtasida Rossiya-Ukraina mojarosi doirasida “mudofaa sohasidagi hamkorlik” bo‘yicha muzokaralar olib borilmoqda. Bunga 11-noyabr kuni Britaniya bosh vaziri Kir Starmerning Fransiyaga tashrifi turtki bo‘lgan. Hozirda muzokaralar “maxfiy tarzda” kechmoqda.
G‘arb qo‘shinlarini urushga yuborish Yevropa ittifoqining 2025-yil yanvarida Donald Tramp prezidentlik lavozimini egallaganidan so‘ng AQSH Ukrainaga yordamni qisqartirishi mumkinligi haqidagi xavotirlariga bog‘liq.
G‘arb qo‘shinlarini Ukrainaga yuborish masalasi
2024-yil fevral oyida Fransiya prezidenti Emmanuel Makron birinchi bo‘lib Yevropa qo‘shinlarini Ukrainaga yuborish mumkinligini aytgandi. Biroq Yevropaning barcha mamlakatlari uning fikrini qo‘llab-quvvatlamagan.
Masalan, Germaniya bunga qarshi chiqqan. 2024-yil noyabr oyida Estoniya tashqi ishlar vaziri Margus Tsahkna ushbu variantdan mojaro tugaganidan so‘ng Ukraina xavfsizligi kafolati sifatida foydalanishni taklif qilgan. Rossiya prezidenti Vladimir Putin G‘arb harbiy instruktorlari va maslahatchilari allaqachon Ukraina hududida ekanini ta’kidlagandi. Biroq Rossiyaning o‘zi ham Shimoliy Koreya harbiylari urushga jalb qilgan.
Shimoliy Koreya harbiylari Rossiya armiyasi safida jang qilmoqda
Ukraina, Janubiy Koreya va AQSH razvedkasi urushda ishtirok etish uchun Shimoliy Koreya harbiylari Rossiyaga yuborilgani haqida bir necha bor xabar bergandi. Pxenyanning bunday xatti-harakati BMTda xavotirga, NATO va Yevropa ittifoqi tomonidan tanqidga sabab bo‘lgan.
KXDR kuchlarining bir qismi qarshi hujumda ishtirok etish uchun Ukraina bilan chegaradosh Kursk viloyatiga yuborilgan. Shimoliy Koreya harbiylari allaqachon ushbu hududda yo‘qotishlar olib bormoqda, degan Ukraina prezidenti Vladimir Zelenskiy.
Izoh (0)