Eron AQSH prezidenti Donald Trampning kuchayib borayotgan tahdidlari fonida ehtimoliy javob uchun raketalarini shay holatga keltirdi. Bu haqda Tehran Times xabar berdi.
Ma’lum qilinishicha, gap Eron qurolli kuchlarining AQSHga aloqador obyektlarga zarba bera oladigan raketalari haqida ketmoqda.
Uchirishga tayyor bo‘lgan ushbu raketalarning katta qismi butun mamlakat bo‘ylab havo hujumlariga bardosh bera oladigan tarzda loyihalashtirilgan yerosti inshootlariga joylashtirilgan, deyiladi xabarda.
Eron oliy rahnamosi Oyatulloh Ali Xomanaiy esa AQSHning tashqaridan zarba berishi ehtimoli kamligini aytmoqda.
Yovuzlik tashqaridan amalga oshirilishi dargumon, ammo agar u amalga oshirilsa, ular, albatta, qattiq javob zarbasini oladi, degan u.
AQSH prezidenti tahdidi va Eron javobi
Tramp mart oyi boshida Eron oliy rahnamosiga maktub yo‘llab, unga yangi yadroviy kelishuv tuzish uchun ikki oy muhlat bergan edi. Maktubda yangi yadroviy bitim bo‘yicha muzokaralar o‘tkazish qat’iy talab qilingan. Tramp taklifni rad etish oqibatlaridan ogohlantirgan. AQSH maktub mazmuni haqida bir necha ittifoqchisini, jumladan Isroil, Saudiya Arabistoni va Birlashgan Arab Amirliklarini ham xabardor qilgan.
Eron oliy rahnamosi 12-mart kuni maktubni olgach, Trampning muzokaralar haqidagi taklifini “aldov” deb atadi. 30-mart kuni esa Eron prezidenti Mas’ud Pezeshkiyon maktubga javoban AQSH bilan ikki tomonlama muzokaralar o‘tkazishdan bosh tortdi. Tehron Vashington bilan yadro dasturi bo‘yicha muloqot faqat uchinchi davlatlar vositachiligida amalga oshirilishi mumkinligini ta’kidlagan.
Ikki tomon o‘rtasida to‘g‘ridan to‘g‘ri muzokaralar o‘tkazish imkoniyati rad etilgan bo‘lsa-da, bilvosita muzokaralar uchun yo‘l ochiqligi ta’kidlandi, degan Eron prezidenti
Bunga javoban Tramp agar kelishuv bo‘lmasa, Eronni bombardimon qilish bilan tahdid qildi.
Agar ular kelishuvga erishmasa, unda bombardimon bo‘ladi. Bu ular hech qachon ko‘rmagan bombardimon bo‘ladi, degan AQSH rahbari.
Yadroviy kelishuvdan chiqish
2015-yilda Buyuk Britaniya, Germaniya, Xitoy, Rossiya, AQSH, Fransiya va Eron yadroviy kelishuvni — Eron yadroviy dasturiga cheklovlar evaziga sanksiyalarni bekor qilishni nazarda tutuvchi Qo‘shma keng qamrovli harakatlar rejasini imzoladi. AQSH Tramp prezidentligi davrida 2018-yilning may oyida ushbu kelishuvdan chiqqan va Tehronga qarshi sanksiyalarni tiklagan. Bunga javoban Eron kelishuv bo‘yicha o‘z majburiyatlarini bosqichma-bosqich qisqartirish, yadroviy tadqiqotlar, sentrifugalar va uranni boyitish darajasidagi cheklovlardan voz kechishini e’lon qilgan.
Tramp qayta prezidentlikka saylangach, Eronga “maksimal bosim o‘tkazish” kampaniyasini boshladi. Uning maqsadi Isroilning asosiy dushmanini zaiflashtirish, Eron yadroviy bombasi yaratilishiga yo‘l qo‘ymaslik va Eron ballistik raketalarining uzoqligini cheklashdir.
Vashingtonning asosiy raqibi hisoblangan Xitoy esa Eronga qarshi noqonuniy sanksiyalarga chek qo‘yishni taklif qilmoqda. U buni yadro dasturi bo‘yicha muzokaralarni boshi berk ko‘chadan olib chiqishga yordam beradi, deb hisoblaydi. Mart oyi o‘rtalarida Xitoy Eron va Rossiya delegatsiyalarining uchrashuvini qabul qilgandi, bir hafta oldin esa Rossiya Tramp ma’muriyatiga Eron bilan muloqotda yordam berishga rozi bo‘lgani haqida xabarlar paydo bo‘lgan edi.
Izoh (0)