Rossiya harbiy razvedkasi Ukrainaga yuborilayotgan G‘arb yordamini kuzatish va uni izdan chiqarish maqsadida chegaradagi xavfsizlik kameralarini xakerlik yo‘li bilan buzgan. Bu haqda The Guardian xabar berdi.
Ma’lumotlarga ko‘ra, Rossiyaning harbiy razvedka bo‘linmasi “xorijiy yordam” ko‘rsatuvchi tashkilotlarni nishonga olish uchun chegara o‘tish punktlari, temiryo‘l bekatlari va harbiy obyektlar yaqinidagi qariyb 10 ming kameraga ruxsatsiz kirgan. Ushbu kameralarning 80 foizi Ukrainada, 10 foizi Ruminiyada, 4 foizi Polshada, 2,8 foizi Vengriyada va 1,7 foizi Slovakiyada joylashgan. Qolganlari qayerdaligi ma’lum qilinmagan.
Xakerlik hujumlari natijasida kameralardan skrinshotlar olingan, poyezdlar harakati jadvallari va yuk hujjatlariga oid maxfiy ma’lumotlar qo‘lga kiritilgan.
Ta’kidlanishicha, Rossiya harbiy razvedkasining 26165-bo‘linmasi fishing xatlari yuborish, pornografik yoki soxta ma’lumotlarni tarqatish, buzilgan akkauntlar va o‘g‘irlangan parollar orqali tizimlarga kirishda ayblanmoqda.
O‘nta davlat, jumladan, AQSH, Fransiya va Germaniya tomonidan e’lon qilingan bayonotga ko‘ra, kamida bir holatda xakerlar o‘zlarini IT mutaxassisi sifatida ko‘rsatib, imtiyozli hisoblarga kirish uchun telefon orqali firibgarlik uyushtirishga uringan.
Fishing xatlarining mavzusi esa turlicha bo‘lgan: kasbiy masalalardan tortib kattalar kontentigacha. Ular ko‘pincha buzilgan akkauntlar yoki bepul pochta xizmatlari orqali yuborilgan bo‘lib, qabul qiluvchining tilida yozilgan va aniq bir shaxsga yo‘naltirilgan.
Buyuk Britaniya Milliy kiberxavfsizlik markazi (NCSC) Ukrainaga yordam yetkazib berishda ishtirok etayotgan xususiy kompaniyalarni zudlik bilan xavfsizlik choralarini ko‘rishga chaqirmoqda.
Logistika kompaniyalariga hujumlardan tashqari, 26165-sonli harbiy bo‘linma xodimlari Ukrainaga materiallar harakatini kuzatish maqsadida chegara o‘tish punktlari, harbiy obyektlar va temiryo‘l bekatlari kabi muhim joylardagi shaxsiy kameralarga kirishdan foydalangan... Jinoyatchilar, shuningdek, qonuniy munitsipal xizmatlardan, xususan, yo‘l harakatini nazorat qiluvchi kameralardan ham foydalangan, deyiladi ogohlantirishda.
Rossiya razvedkasining bu kampaniyasi Ukrainaga yordam yetkazishda ishtirok etayotgan tashkilotlar uchun jiddiy xavf tug‘diradi.
Buyuk Britaniya hamkorlar bilan birgalikda qo‘llanayotgan taktika haqida xabardorlikni oshirishga harakat qilmoqda. Biz tashkilotlarni hisobotda keltirilgan tahdid tavsifi va himoya bo‘yicha tavsiyalar bilan tanishib chiqishga qat’iy chaqiramiz, deydi NCSC operatsion direktori Pol Chichester.
Tavsiya etilayotgan choralar quyidagilarni o‘z ichiga oladi: kuchaytirilgan monitoring, kirishda ko‘p bosqichli autentifikatsiya (passkeylar yordamida), ishonchli tekshiruv usullari va zaifliklarni bartaraf etishga qaratilgan tezkor yangilanishlar.
Mazkur ogohlantirish AQSH, Germaniya, Chexiya, Polsha, Avstraliya, Kanada, Daniya, Estoniya, Fransiya va Niderlandiya razvedka xizmatlari bilan hamkorlikda tayyorlangan.
Izoh (0)