AQSH sobiq prezidenti Donald Tramp 2025-yilda mamlakatdan bir millionga yaqin noqonuniy muhojirni deportatsiya qilishni rejalashtirmoqda. Bu haqda The Washington Post sobiq va amaldagi federal amaldorlarga tayanib xabar berdi.
Agar bu reja amalga oshsa, u AQSH tarixidagi eng yirik deportatsiya bo‘ladi. Oxirgi rekord bir yilda 400 mingdan ortiq deportatsiyani tashkil etgan va bu Barak Obama prezidentligi davrida (2009-2017) o‘rnatilgan.
Biroq tahlilchilarning fikricha, Trampning maqsadi haqiqatga mos emas. Ular bunga sabab qilib moliyalashtirish yetarli emasligini, xodimlar yetishmasligini, shuningdek, muhojirlarning aksariyati sudga murojaat qilib, deportatsiyaga qarshi chiqish huquqiga ega ekanini aytmoqda. Sud jarayonlari esa yillab davom etishi mumkin.
Ma’lum qilinishicha, deportatsiya strategiyasini ishlab chiqishda Tramp ma’muriyatidagi siyosiy masalalar bo‘yicha mas’ul Stiven Miller muhim rol o‘ynagan. U Ichki xavfsizlik vazirligi va boshqa federal idoralar bilan hamkorlikda ishlagan.
Variantlardan biri sifatida 1,4 million muhojirning ba’zilarini deportatsiya qilish ko‘rib chiqilmoqda, ularga nisbatan chiqarib yuborish to‘g‘risida yakuniy qarorlar chiqarilgan. Ammo kelib chiqish mamlakatlari ularni qaytarib olishdan bosh tortgani sababli muhojirlar hali ham AQSHda qolmoqda. Hozirda AQSH 30 ta davlat bilan ularning fuqarosi bo‘lmagan muhojirlarni deportatsiya qilish uchun muzokaralar olib bormoqda.
Tramp ma’muriyati deportatsiyalarga oid oylik statistikani e’lon qilishni to‘xtatgan. Shunga qaramay, Ichki xavfsizlik vazirligi yil boshidan beri 117 ming kishi mamlakatdan chiqarib yuborilganini bildirgan.
AQSHda noqonuniy bo‘lib turganlar deportatsiya qilinishi
AQSH prezidenti Donald Tramp maʼmuriyati noqonuniy migrantlarni sudsiz deportatsiya qilishga ruxsat bergan. Tramp saylovoldi kampaniyasidayoq muhojirlarni ommaviy deportatsiya qilishga va’da bergan. 2025-yil fevralida Kosta Rika O‘zbekiston, Qozog‘iston, Qirg‘iziston, Pokiston va Hindiston kabi davlatlarning AQSHdan deportatsiya qilingan 200 nafar fuqarosini qabul qilishga rozi bo‘ldi.
O‘zbekiston tashqi ishlar vaziri matbuot kotibi Ahror Burhonov diplomatik vakolatxonalar O‘zbekistonning barcha fuqarolariga, ular qayerda bo‘lishidan qat’i nazar, har tomonlama yordam ko‘rsatishini aytdi. 2025-yil fevralida 7 nafari Nyu York—Toshkent yo‘nalishi bo‘yicha O‘zbekistonga olib kelindi. Mart oyi boshlarida yana 10 nafar fuqaro AQSHdan O‘zbekistonga qaytarildi.
Deportatsiya qilinadigan O‘zbekiston fuqarolari soni 975 kishini tashkil etmoqda. Umumiy hisobda, turli davlatlardan 1 445 549 nafar chet el fuqarosi chiqarib yuboriladi. AQSHdan 2023-yil sentyabrdan 2024-yil sentyabrgacha O‘zbekistonga 572 kishi deportatsiya qilingan.
AQSHda migrantlar uchun o‘z-o‘zini deportatsiya qilishga mo‘ljallangan ilova ishga tushirilgan. CBP Home deb nomlangan mobil ilova noqonuniy migrantlarga hibsga olinmasdan, mamlakatni mustaqil ravishda tark etish imkonini beradi. Ular keyinchalik qonuniy ravishda qaytib kelishi mumkin bo‘ladi.
Izoh (0)