АҚШ собиқ президенти Дональд Трамп 2025 йилда мамлакатдан бир миллионга яқин ноқонуний муҳожирни депортация қилишни режалаштирмоқда. Бу ҳақда The Washington Post собиқ ва амалдаги федерал амалдорларга таяниб хабар берди.
Агар бу режа амалга ошса, у АҚШ тарихидаги энг йирик депортация бўлади. Охирги рекорд бир йилда 400 мингдан ортиқ депортацияни ташкил этган ва бу Барак Обама президентлиги даврида (2009-2017) ўрнатилган.
Бироқ таҳлилчиларнинг фикрича, Трампнинг мақсади ҳақиқатга мос эмас. Улар бунга сабаб қилиб молиялаштириш етарли эмаслигини, ходимлар етишмаслигини, шунингдек, муҳожирларнинг аксарияти судга мурожаат қилиб, депортацияга қарши чиқиш ҳуқуқига эга эканини айтмоқда. Суд жараёнлари эса йиллаб давом этиши мумкин.
Маълум қилинишича, депортация стратегиясини ишлаб чиқишда Трамп маъмуриятидаги сиёсий масалалар бўйича масъул Стивен Миллер муҳим рол ўйнаган. У Ички хавфсизлик вазирлиги ва бошқа федерал идоралар билан ҳамкорликда ишлаган.
Вариантлардан бири сифатида 1,4 миллион муҳожирнинг баъзиларини депортация қилиш кўриб чиқилмоқда, уларга нисбатан чиқариб юбориш тўғрисида якуний қарорлар чиқарилган. Аммо келиб чиқиш мамлакатлари уларни қайтариб олишдан бош тортгани сабабли муҳожирлар ҳали ҳам АҚШда қолмоқда. Ҳозирда АҚШ 30 та давлат билан уларнинг фуқароси бўлмаган муҳожирларни депортация қилиш учун музокаралар олиб бормоқда.
Трамп маъмурияти депортацияларга оид ойлик статистикани эълон қилишни тўхтатган. Шунга қарамай, Ички хавфсизлик вазирлиги йил бошидан бери 117 минг киши мамлакатдан чиқариб юборилганини билдирган.
АҚШда ноқонуний бўлиб турганлар депортация қилиниши
АҚШ президенти Дональд Трамп маъмурияти ноқонуний мигрантларни судсиз депортация қилишга рухсат берган. Трамп сайловолди кампаниясидаёқ муҳожирларни оммавий депортация қилишга ваъда берган. 2025 йил февралида Коста Рика Ўзбекистон, Қозоғистон, Қирғизистон, Покистон ва Ҳиндистон каби давлатларнинг АҚШдан депортация қилинган 200 нафар фуқаросини қабул қилишга рози бўлди.
Ўзбекистон ташқи ишлар вазири матбуот котиби Аҳрор Бурҳонов дипломатик ваколатхоналар Ўзбекистоннинг барча фуқароларига, улар қаерда бўлишидан қатъи назар, ҳар томонлама ёрдам кўрсатишини айтди. 2025 йил февралида 7 нафари Нью Йорк—Тошкент йўналиши бўйича Ўзбекистонга олиб келинди. Март ойи бошларида яна 10 нафар фуқаро АҚШдан Ўзбекистонга қайтарилди.
Депортация қилинадиган Ўзбекистон фуқаролари сони 975 кишини ташкил этмоқда. Умумий ҳисобда, турли давлатлардан 1 445 549 нафар чет эл фуқароси чиқариб юборилади. АҚШдан 2023 йил сентябрдан 2024 йил сентябргача Ўзбекистонга 572 киши депортация қилинган.
АҚШда мигрантлар учун ўз-ўзини депортация қилишга мўлжалланган илова ишга туширилган. CBP Home деб номланган мобил илова ноқонуний мигрантларга ҳибсга олинмасдан, мамлакатни мустақил равишда тарк этиш имконини беради. Улар кейинчалик қонуний равишда қайтиб келиши мумкин бўлади.
Изоҳ (0)