AQSHga borish maqsadida Meksikaga kelayotgan noqonuniy migrantlar o‘z vatanlariga qaytarib yuboriladi. Bu haqda Meksika prezidenti Klaudiya Sheynbaum ma’lum qildi.
Markaziy Amerikaning barcha mamlakatlari, ayniqsa Gvatemala bilan kelishuv mavjud va yaqinda shu maqsadda uchrashuv ham bo‘lib o‘tdi. Kuba bilan ham kelishuvga erishilgan. Noqonuniy migrantlar Meksika hududiga emas, balki kelgan joylariga bevosita qaytarilishi lozim, dedi Sheynbaum.
U Meksikadagi noqonuniy muhojirlarga insonparvarlik yordami ham ko‘rsatilishini ma’lum qildi.
Agar bu odamlar Meksika hududida bo‘lsa, biz ularga gumanitar nuqtai nazaridan e’tibor qaratamiz, ammo migratsiya siyosatimiz doirasida ularning vatanlariga qaytishini xohlaymiz, chunki ular chet el fuqarolaridir, dedi Sheynbaum.
Prezidentning aytishicha, Meksika hukumati AQSH rasmiy vakillari bilan migrantlarning ahvoli yuzasidan muzokaralar olib bormoqda. U hokimiyat tepasiga kelganidan buyon, birinchi navbatda, migrantlarning ixtiyoriy ravishda vatanlariga qaytishini rag‘batlantirib kelayotganini qo‘shimcha qildi.
Trampning migratsiya siyosati
Tramp 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va Davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Izoh (0)