32 yoshli xonanda va aktrisa Selena Gomes AQSH prezidentining immigratsiya siyosatidan noroziligi va meksikaliklarni qo‘llab-quvvatlagani uchun siyosiy mojarolar markazida qoldi.
28-yanvar kuni Gomes AQSH prezidenti Donald Trampning noqonuniy migrantlarni ommaviy deportatsiya qilish qaroriga javoban videomurojaat qoldirdi. Unda xonanda o‘zini yig‘idan to‘xtata olmadi va qashshoqlik tufayli uylarini tark etishga majbur bo‘lgan muhojirlarga ko‘z yoshlar bilan hamdardlik bildirdi:
“Men butun xalqimga achinaman. U yerda bolalar ham bor. Afsus, men buni o‘zgartirish uchun biror narsa qilishga harakat qilaman, ammo nimadan boshlashni ham bilmayman. Men qo‘limdan kelganicha harakat qilaman, va’da beraman”, dedi xonanda.
Tanqidlar to‘lqinidan so‘ng xonanda postni o‘chirib tashladi, biroq video internetda tarqalishga ulgurgan edi. AQSH Senatiga nomzod bo‘lgan Sem Parker bunga javoban xonandani deportatsiya qilish lozimligini aytdi. Uning so‘zlariga ko‘ra, “Selena Gomes Amerika fuqaroligini qadrlamaydigan shaxsdir”.
Gomes ham sukut saqlamadi va siyosatchiga kinoya bilan javob berdi:
“Eh, janob Parker, janob Parker. Kuldirganingiz va tahdidlar uchun rahmat”.
Selena Gomes meksikalik avlod sifatida mas’uliyat his qilishini va o‘z platformasidan foydalangan holda, ushbu mavzuda baralla gapirishga tayyor ekanini bildirgan edi. Xonanda ichki qo‘rquv adolat uchun kurashishga xalaqit bermasligi va millionlab odamlar kelajagiga ta’sir qiladigan ushbu muammoni yoritish dolzarb masala ekanligini ham ta’kidladi.
Immigratsiya va bojxona politsiyasi (ICE) ma’lumotlariga ko‘ra, AQSHda olib borilgan reydlarda 956 kishi hibsga olingan, bu raqam Tramp prezidentlikka saylanganidan beri eng katta ko‘rsatkichdir. BBC ma’lumotlariga ko‘ra, reydlar Chikago, Nyuark va Mayami kabi shaharlarda, kengaytirilgan vakolatlarga ega federal agentliklar ishtirokida o‘tkazilgan.
Trampning migratsiya siyosati haqida
AQSH prezidenti 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Meksika prezidenti AQSHga borish uchun uning mamlakatiga kelayotgan noqonuniy migrantlar o‘z vatanlariga qaytarib yuborilishini aytdi. Meksika AQSHdan noqonuniy migrantlarni olib kelayotgan harbiy transport samolyotini qabul qilishdan bosh tortdi.
Izoh (0)