AQSH Immigratsiya va bojxona nazorati 2023-yil sentyabrdan 2024-yil sentyabrgacha O‘zbekistonga 572 kishini deportatsiya qilgan. Bu haqda 2024-yil 19-dekabr kuni e’lon qilingan hisobotda keltirilgan.
Hisobotga ko‘ra, bu davr ichida 192 mamlakatga 271 484 kishi deportatsiya qilingan bo‘lib, bu so‘nggi 10 yildagi eng yuqori ko‘rsatkichdir. Deportatsiya qilinganlar soni o‘tgan yilning shu davriga nisbatan deyarli ikki baravar ko‘p, ya’ni 142 580 kishi chiqarib yuborilgan.
O‘n yillikda maksimal ko‘rsatkich 2014-yilda qayd etilgan – 315 943 kishi. Donald Trampning AQSHda birinchi muddatda prezidentlik qilgan paytida (2019-yilda) eng ko‘p deportatsiya qilinganlar soni 267 258 nafarni tashkil qilgan.
Deportatsiyalar sonining ko‘payishi parvozlar, jumladan, dam olish kunlari uchish va Gvatemala, Gonduras va Salvador kabi mamlakatlarga migrantlarni qaytarishning oson tartiblari ortib borayotgani bilan bog‘liq. Olti yil ichida birinchi marta Xitoyga parvoz amalga oshirildi, shuningdek, Albaniya, Misr, Gruziya, Hindiston, Ruminiya, Tojikiston, O‘zbekiston va boshqa mamlakatlarga deportatsiyalar tashkil etildi.
O‘zbekistonliklar deportatsiyasi oshgan
2024-yilda AQSH hukumati 572 o‘zbekni deportatsiya qilgan bo‘lsa, bu o‘tgan yilga nisbatan 6,5 baravar ko‘p. 2013-yilda 88 kishi, 2022 va 2021-yillarda esa deportatsiya qilingan o‘zbekistonliklar soni mos ravishda 21 va 55 kishini tashkil qilgan.
O‘zbekiston fuqarolari asosan O‘zbekiston—Turkiya (Ispaniya)—Boliviya—Kolumbiya—Meksika—AQSH yo‘nalishi bo‘yicha AQSHga borishga harakat qilmoqda. 2021-yildan 2023-yilgacha O‘zbekistonning 13 600 nafar fuqarosi Meksika orqali AQSHga noqonuniy kirishga uringan. Markaziy Osiyo davlatlaridan 2023-yilda 50 mingdan ortiq odam AQSH chegarasini noqonuniy kesib o‘tgan.
2024-yil fevralida AQSHga Meksika orqali kelgan O‘zbekiston fuqarolari Bayden ustidan sudga murojaat qilgandi.
Tramp davrida bu yanada kuchayishi mumkin
AQSH prezidentlik saylovlarida g‘alaba qozongan Donald Tramp saylovoldi kampaniyasidagi ommaviy deportatsiya haqidagi va’dasini bajarishdan boshqa chorasi yo‘qligini ma’lum qildi. Tramp uchun immigratsiya siyosatini kuchaytirish saylov kampaniyasining asosiy nuqtalaridan biriga aylangandi. U Jo Bayden ma’muriyatining “o‘ta yumshoq” siyosati Qo‘shma Shtatlarning uchinchi dunyo davlatiga aylanishiga olib kelganini bir necha bor ta’kidlagan. Tramp ommaviy deportatsiyalarni amalga oshirish uchun harbiy kuch ishlatishga ham tayyorligini aytgan.
Izoh (0)